Rihuinni nápanu paciencia ora maʼ cucheechenu diidxaʼ
1. Gunáʼ nga tobi de ca modo rusihuinni Jiobá napa paciencia binni guidxilayú.
1 Tobi de ca guenda ni rusihuinni Dios né binni guidxilayú nga paciencia (Éxo. 34:6; Sal. 106:41-45; 2 Ped. 3:9). Ne modo jma rusihuínnibe guenda riʼ nga ra cudiibe lugar careeche stiidxaʼ Reinu lu guidubi naca Guidxilayú. Maʼ ziné Jiobá biaʼ chupa mil iza de cayuni invitar ca binni ni nayá ladxidóʼ para guidxíñacaʼ laabe, ne dede yanna cadi cusaanabe de gúnibe ni (Juan 6:44). Yanna laanu, ximodo zanda gusihuínninu nápanu paciencia cásica napa Dios ora maʼ cucheechenu diidxaʼ.
2. Ximodo zanda gusihuínninu nápanu paciencia ora maʼ cucheechenu diidxaʼ.
2 Ora gucheechenu diidxaʼ de yoo pur yoo. Rihuinni nápanu paciencia cásica Jiobá ora qué rusaanaʼ de gucheechenu diidxaʼ neza ra nabeza ca binni ni caʼruʼ gusihuinni pa riuuláʼdxicaʼ guiziidicaʼ de Dios (Hech. 5:42). Rusihuínninu guenda ca ora runi huantarnu guiráʼ ni guni binni laanu, casi ora guni búrlacaʼ laanu ne ora qué rinacaʼ gucaadiágacaʼ (Mar. 13:12, 13). Laaca rusihuínninu nápanu paciencia ora qué rusaanaʼ de gúninu stipa pur chigánnanu ca binni ni riuulaʼdxiʼ guiziidiʼ de Dios, neca raca nagana para laanu guidxélanu laacaʼ ralídxicaʼ.
3. Xiñee caquiiñeʼ gápanu paciencia ora chigánnanu binni sti biaje ne ora guidúʼndanenu laacaʼ Biblia.
3 Cani cayúʼndanenu Biblia. Riquiiñeʼ stale paciencia nga para ganda guiroobaʼ ti yaga huiiniʼ. Neca zanda gacanenu para chuʼni galán la? qué zanda gúninu gastiʼ para guiroobaʼ ni nagueenda (Sant. 5:7). Zacaca nga para guiniisi tuuxa lu stiidxaʼ Dios, laaca naquiiñeʼ gácani chaahuiʼ chaahuiʼ (Mar. 4:28). Zándaca gaca nagana para binni ni cayúʼndanenu gusaana ca cosa ni maca runi cré o ca costumbre ni na Biblia cadi jneza. Cadi gucaʼnu laacabe guchaacabe para guiniisicabe nagueenda lu stiidxaʼ Dios, sínuque naquiiñeʼ gusihuínninu nápanu paciencia ne gudiʼnu tiempu laacabe para guniibi espíritu stiʼ Dios ladxidóʼcabe (1 Cor. 3:6, 7).
4. Ximodo racané paciencia ca laanu para gusíʼdinu ca binnilídxinu ni cadi naca xpinni Cristu.
4 Ca binnilídxinu ni cadi naca xpinni Cristu. Neca guizáʼ riuuláʼdxinu guiziidiʼ ca binnilídxinu ni cadi naca xpinni Cristu de Dios la? rápanu paciencia ora ribézanu dede ora ganda gusiénenu laacabe de ni cazíʼdinu ne qué rábinu laacabe stale cosa de Stiidxaʼ Dios dede guireecabe gana (Ecl. 3:1, 7). Laaca zanda gusíʼdinu laacabe ora gúʼyacabe modo laanu ne chuʼnu listu guiráʼ ora para gusíʼdinu laacabe né diidxaʼ nadóʼ de cani runi crenu ne gúninu ni né respetu (1 Ped. 3:1, 15). Laanu nánnanu pa gápanu paciencia ora gucheechenu diidxaʼ la? zúninu dxiiñaʼ riʼ jneza, zabeendunu ni galán ne zusiéchenu Bixhózenu ni nuu guibáʼ.