Ñee maʼ nuu ca xiiñiluʼ listu la?
1. Xiñee caquiiñeʼ chuʼ ca xiiñiluʼ listu.
1 Maʼ cadi candaa zuzulú zié ca hombrehuiiniʼ ne ca dxaapahuiiniʼ xpinni Cristu scuela sti biaje. Ne nanna dxíchinu zadxagalúcabe guendanagana ne ziuu tu zucaa laacabe gúnicabe xiixa ni cadi jneza. Peru laaca nánnanu zanda güinécabe cani rinécabe scuela ne ca maestru stícabe «xii nga ni dxandíʼ» (Juan 18:37). Ñee maʼ nuu ca xiiñiluʼ listu la?
2. Xi naquiiñeʼ ganna ca xiiñiluʼ para guihuinni maʼ nuucaʼ listu.
2 Ñee nanna ca xiiñiluʼ raca caadxi cosa ra scuela ni zucaa laacaʼ gusihuínnicaʼ pa nadxiicaʼ xquídxicaʼ, casi guni saludarcaʼ bandera, ne laaca raca caadxi saa ni runi ca binni ni qué runi adorar Dios la? Nánnacabe xiñee cadi jneza gúnicabe cani la? Ñee maʼ nuucabe listu para gánnacabe xi gúnicabe ora chuʼ tu gucaa laacabe chécabe scuela roʼ la? Ñee maʼ nánnacabe xi gúnicabe ora chuʼ tu uquiidxi laacabe tuuxa, gucaa laacabe guécabe nisa dxuʼniʼ o cúbacabe guixi la? Ñee riníʼcabe qué rudii religión stícabe lugar laacabe gúnicabe cani la? o nánnacabe ximodo gusiénecabe cani runi crécabe (1 Ped. 3:15).
3. Ximodo zanda iquiiñeʼ binni gueelaʼ runi adorar Dios né binnilidxi para gacané ca xiiñiʼ chuʼ listu.
3 Laguiquiiñeʼ gueelaʼ runi adorartu Dios né binnilídxitu. Zándaca ora maʼ bizulú ca xiiñitu scuela zaniʼcaʼ de ca guendanagana ni cadxagalucaʼ. Peru pa gúnitu stipa pur guiníʼnetu laacabe de ca guendanagana ca ante guzulúcabe scuela la? jma zánnacabe xi gúnicabe ora guidxagalúcabe cani. Galán iquiiñetu tobi o chupa gueelaʼ ni maʼ guleetu para guni adorartu Dios né binnilídxitu para güitu de laacani. Zanda guinabadiidxatu ca xiiñitu xi jma riguu xizaa laacaʼ yanna ra maʼ checaʼ scuela. Galán guiniʼtu de ca tema ni maca huayuiʼtu xcaadxi iza, zándaca yanna jma ziénecabe cani (Sal. 119:95). Zanda guni ensayarnetu laacabe, ne gúnitu casi ora laatu nga maestru stícabe o cani rinécabe scuela. Lagusiidiʼ ca xiiñitu iquiiñecaʼ Biblia ora guicábicaʼ ne gánnacaʼ iquiiñecaʼ xcaadxi libru ni nápanu casi Razonamiento ne ca volumen stiʼ Los jóvenes preguntan. Ti gunaa xpinni Cristu runi ensayarné ca xiiñiʼ ante guixeleʼ scuela para ganda guiníʼnecaʼ cani chigaca maestru sticaʼ ne gunibiáʼcabe laacaʼ casi testigu stiʼ Jiobá. (Biiyaʼ Torre stiʼ ni rapa 15 stiʼ diciembre 2010, yaza 3 dede 5.)
4. Xi naquiiñeʼ guni binni ti ganda gacané ca xiiñiʼ chuʼ listu dede ante.
4 Jma «nagana zaca» para ca hombrehuiiniʼ ne ca dxaapahuiiniʼ gudxiilucaʼ ca guendanagana ni guidxaagalucaʼ lu ca últimu dxi riʼ (2 Tim. 3:1). Peru stale tu laa racané ca xiiñiʼ dede ante ti gánnacabe ximodo gudxiilúcabe ca guendanagana ni gápacabe (Pro. 22:3). Nga runi, ante guzulú ca xiiñitu scuela, lagacané laacaʼ para chuʼcaʼ listu.