Jiobá rusiidiʼ laanu gúninu dxiiñaʼ ni bisaanané laanu
1. Xi runi Jiobá cada biaje gudii xiixa dxiiñaʼ ca xpinni.
1 Cada biaje gudii Jiobá xiixa dxiiñaʼ ca xpinni, rábibe laacaʼ ximodo zanda gúnicaʼ ni. Casi dxi gúdxibe Noé guni ti arca —ti cosa ni qué huayuu dxi guni—, bisiénebe laa ximodo guni ni (Gén. 6:14-16). Ne dxi naca Moisés ti pastor huiiniʼ, gudxi Dios laabe chebe nezalú ca binnigola stiʼ Israel ne nezalú Faraón. Jiobá gudxi laabe: «Naa ziuaaniáʼ lii ora guiniʼluʼ ne dxandipeʼ zusiideʼ lii xi naquiiñeʼ guiniʼluʼ» (Éxo. 4:12). Yanna riʼ, laaca qué huasaana Jiobá laanu stúbinu lu dxiiñaʼ ni bidii laanu de gucheechenu ca diidxaʼ nacubi ne galán. Ni rúnibe nga rusiidibe laanu gúninu dxiiñaʼ riʼ lu Scuela stiʼ cani Rucheeche Diidxaʼ ne lu Guendaridagulisaa stiʼ Dxiiñaʼ Stinu. Xi naquiiñeʼ gúninu para guizíʼdinu jma lu ca guendaridagulisaa riʼ yaʼ.
2. Xi caquiiñeʼ gúninu para ganda guizíʼdinu jma lu Scuela stiʼ cani Rucheeche Diidxaʼ.
2 Scuela stiʼ cani Rucheecheʼ Diidxaʼ. Biindaʼ dede ante ni chitiidiʼ lu cada tobi de ca guendaridagulisaa ca. Ne ora gúʼyaluʼ modo gusiene cani tiidiʼ lu scuela ca xiixa tema zacaneni lii gusiidiluʼ jma jneza (Pro. 27:17). Ora cheluʼ guendaridagulisaa riʼ yené libru Benefíciese stiluʼ ne biquiiñeʼ ni casi ti libru ni né ejerciciu para gúniluʼ. Ora guinabaʼ binnigola ni rutiidiʼ scuela ca guxhéletu xiixa yaza stiʼ libru ca tiidiʼ si xiixa libana la? bizaa raya ra cá ca diidxaʼ ni cusiene xiixa ni racaláʼdxiluʼ gúniluʼ ne zanda gucaaluʼ xiixa guriá libru stiluʼ. Peru modo jma zanda guiziidiluʼ lu scuela riʼ nga gutiidiluʼ xiixa libana luni. Ñee maʼ rutiidiluʼ libana lu scuela riʼ la? Ora gaca caber lii xiixa libana, biʼniʼ ni jneza ne yenanda cani gábicabe lii guʼnuʼ. De racá biʼniʼ cani biziidiluʼ ora maʼ zigucheecheluʼ diidxaʼ.
3. Xi zacané laanu para guizíʼdinu jma lu Guendaridagulisaa stiʼ Dxiiñaʼ Stinu.
3 Guendaridagulisaa stiʼ Dxiiñaʼ Stinu. Para ganda guietenaláʼdxinu ca conseju ni rieeteʼ lu guendaridagulisaa ca la? naquiiñeʼ guidúʼndanu guiráʼ cani chiguiquiiñeʼ luni ne chuʼnu listu para guicábinu. Ne pa qué gutálenu diidxaʼ ora guicábinu la? zudiʼnu lugar guicabi xcaadxi xpinni Cristu. Biiyaʼ chaahuiʼ ora ridíʼdicabe para guluíʼcabe laanu ximodo zanda gusaananenu binni xiixa libru ne revista, ne biʼniʼ cani rábiluʼ zanda gacané lii para gucheecheluʼ diidxaʼ jneza. Pa lu Xhiiñaʼ Reinu ni Rúninu zeeda xiixa tema ni zanda iquiiñeluʼ la? gundisaʼ chaahuiʼ ni ti ganda iquiiñeluʼ ni sti ora.
4. Xiñee galán iquiiñenu cani rusiidiʼ Jiobá laanu.
4 Cásica nagana guca para Noé ne Moisés gúnicaʼ dxiiñaʼ ni bidii Dios laacaʼ la? laaca nagana dxiiñaʼ ni nápanu de gucheechenu ca diidxaʼ nacubi ne galán lu guidubi naca Guidxilayú (Mat. 24:14). Neca zacá, zanda gundúʼxenu dxiiñaʼ riʼ né stale guendanayecheʼ pa guni crenu zacané Jiobá laanu, Dios ni jma nanna gusiidiʼ, ne pa iquiiñenu cani rudiibe laanu para guizíʼdinu (Isa. 30:20).