Ndaa ra rinabadiidxaʼ
◼ Ante guiníʼ ca binnigola zanda chúʼnisa tuuxa, xi naquiiñeʼ gusihuinni binni ca ora cheʼ guendaridagulisaa ne ora gucheeche diidxaʼ.
Ti cosa ni jma risaca quixhe ique binni ugaandaʼ nga chúʼnisa. Nga runi, ante guiníʼ ca binnigola zanda chúʼnisa tuuxa, maʼ naquiiñeʼ guiene binni ca xi ribeza Dios de laa. Ne laaca maʼ naquiiñeʼ gusihuínnibe dxandíʼ racaláʼdxibe guibánibe casi na Dios.
Guiráʼ xpinni Cristu cadi naquiiñeʼ gusaana de guidagulisaa. Nga runi, ti binni ni maʼ rucheeche diidxaʼ ni racalaʼdxiʼ chúʼnisa la? ngaca nga naquiiñeʼ guni (Heb. 10:24, 25). Ne naquiiñeʼ guicábibe lú ca guendaridagulisaa ca. Laaca zándaca maʼ gucuá labe lu Scuela stiʼ cani Rucheeche Diidxaʼ, neca cadi caquiiñepeʼ ni para ganda chúʼnisabe.
Laanu ca xpinni Cristu, cumu biaanenu ti dxiiñaʼ: gucheechenu ca diidxaʼ nacubi ne galán ne gacanenu binni gaca xpinni Cristu la? guiráʼ binni ni maʼ rucheeche diidxaʼ ni racalaʼdxiʼ chúʼnisa, cadi naquiiñeʼ gusaana de chigucheeche diidxaʼ (Mat. 24:14; 28:19, 20). Panda beeu naquiiñeʼ gucheechebe diidxaʼ ante chúʼnisabe yaʼ. Para ganda gusihuinni ti binni racalaʼdxiʼ gucheeche diidxaʼ né gana guiráʼ beeu la? naquiiñeʼ tiidiʼ ti tiempu (Sal. 78:37). Peru laaca cadi tan xadxí, zanda gácani chupa chonna beeu. Panda hora naquiiñeʼ gúnibe ti beeu yaʼ. Gastiʼ diʼ ti ley ni caníʼ pabiaʼpeʼ naquiiñeʼ guni ti binni. Ca binnigola ca naquiiñeʼ gúʼyacaʼ ximodo nuu cada tobi de cani rucheeche diidxaʼ ne guiénecabe laacaʼ (Luc. 21:1-4).
Ca binnigola —o ca siervu ministerial ni nuu ndaaniʼ ca neza binni ridagulisaa ra gástipeʼ binnigola— ni guidagulisaané tuuxa ni racalaʼdxiʼ chúʼnisa, naquiiñeʼ gánnacaʼ gadxé gadxé nga cada binni, ne naquiiñeʼ guʼyaʼ chaahuicaʼ pa maʼ zanda chúʼnisa binni ca. Binni ni chichuu nisa ca naquiiñeʼ gusihuínnibe dxandíʼ racaláʼdxibe gácabe testigu stiʼ Jiobá ne gusihuínnibe risaca para laabe guidagulisaanebe xquidxi Dios ne gucheechebe diidxaʼ. Ca binnigola cadi naquiiñeʼ cuézacaʼ gánnabe guiráʼ xixé ni rusiidiʼ xquidxi Dios o gácabe casi cani maʼ ziné iza de rucheeche diidxaʼ para ganda chúʼnisabe. Pa guʼyaʼ ca binnigola nuuruʼ xi cayaadxaʼ gúnibe para ganda chúʼnisabe la? galán iquiiñecabe Biblia para gusiénecabe laabe né diidxaʼ nadóʼ xi pur qué zanda chúʼnisabe ne guizaaláʼdxicabe guidxela tu gacané laabe guiziidibe cani cayaadxaʼ gánnabe de Dios.