Lachinanda ejemplu stiʼ ca profeta: Miqueas
1. Xi zándaca guníʼ ique Miqueas, ne xiñee cadi pur gana si bicheechebe diidxaʼ.
1 Nuu tu laa huaníʼ ique: «Padxí nga guinitilú guiráʼ cosa malu nuu lu Guidxilayú riʼ». Zándaca zacaca nga guníʼ ique Miqueas dxi canatídxibe ca binni de Israel ne de Judá zunitilú Jiobá laacaʼ. Peru cadi pur gana si bicheechebe diidxaʼ. Purtiʼ lu iza 740 ante de ca dxi stiʼ Jesús, biiyabe ximodo bisabanáʼ Jiobá guidxi Samaria casi guniʼbe zaca ni (Miq. 1:6, 7). Xhupa xhonna iza despué, lu iza 607, binitilú Jerusalén (Miq. 3:12). Yanna, laanu ximodo zanda chinándanu ejemplu stiʼ Miqueas laga cabézanu dxi guni juzgar Jiobá binni yaʼ.
2. Xiñee cadi jneza guixhacaláʼdxinu laga cabézanu dxi stiʼ Jiobá, ne ximodo gusihuínninu ni.
2 Cadi guixhacaláʼdxinu. Sicaríʼ bicaa Miqueas: «Naa la? pur Jiobá zatanaʼyaʼ. Dxandipeʼ zusihuinneʼ cabezaʼ Dios ni zulá naa» (Miq. 7:7). Qué riníʼ diʼ nga guiidxinabe cabézabe guedandá dxi ca. Laabe qué nusaanabe de niguixhenabe binni. Zacaca nga laanu, laga cabézanu dxi stiʼ Jiobá, galán chinándanu conseju riʼ: «Naquiiñeʼ gácatu binni ni nabani jneza ne gúnitu ni na Dios modo riuulaʼdxiʼ» (2 Ped. 3:11, 12, TNM). Naquiiñeʼ gánnanu napa binni tiempu para gaca arrepentir purtiʼ cayapa Dios paciencia laacaʼ (2 Ped. 3:9). Nga runi, jneza nga chinándanu conseju ni cudii Dios laanu: cadi guixhacaláʼdxinu cásica biʼniʼ ca profeta (Sant. 5:10).
3. Xiñee naquiiñeʼ guinábanu Jiobá gatigá gudii espíritu santu laanu.
3 Guni crenu zudii Jiobá stipa laanu. Neca nagana dxiiñaʼ ni gucuaa Miqueas la? gunda bíʼnibe ni purtiʼ biyúbibe gudii Jiobá stipa laabe (Miq. 3:8). Nga runi, cayabi Stiidxaʼ Jiobá laanu guyúbinu gudiibe stipa laanu. Ne laabe rudiibe stipa cani maʼ bidxaga para gúnicaʼ dxiiñaʼ bidiibe laacaʼ (Sal. 84:5, 7; Is. 40:28-31). Stale de laanu huayuuyaʼ pabiáʼ rudii Jiobá stipa laa ca iza napa de cayuni xhiiñabe. Nga runi, gatigá naquiiñeʼ guinábanu Jiobá gudii laanu espíritu santu (Luc. 11:13).
4. Xi ejemplu bisaana Miqueas para laanu.
4 Dxi bibani Miqueas jma bisisaca guni ni na Jiobá. Laabe gudixhe íquebe guzuubabe stiidxaʼ Dios neca gulézabe lade binni ni biʼniʼ cosa dxabaʼ. Yanna riʼ laaca nuu stale cosa ni zucaa laanu guchéʼnenu Jiobá. Nga runi, cadi gusaananu de guiníʼ íquenu sicaríʼ: «Qué ziuu dxi gusaanadu de sadu lu lá Jiobá, Dios stidu» (Miq. 4:5).