Ti gayuaa iza de careeche stiidxaʼ Reinu
1. Xi guluucabe gana xquidxi Jiobá guni raca casi ti gayuaa iza.
1 «¡Laguuyaʼ, Rey ca maʼ cayuni mandar! Laatu nga cani chigucheeche stiidxabe. Nga runi, laguiníʼ, laguiníʼ, laguiníʼ de Rey ne reinu stiʼ.» Ne ca diidxaʼ riʼ, hermanu Rutherford guluu gana xquidxi Jiobá maʼ raca casi ti gayuaa iza para gucheechecaʼ stiidxaʼ Reinu lu guidubi naca Guidxilayú. ¡Ne maʼ bigaanda bíninu ni! Cásica ca xpinni Cristu de primé siglu que maʼ bicheechenu ca diidxaʼ nacubi ne galán stiʼ Reinu riʼ lu «idubi naca guidxilayú» (Col. 1:23). Xi huayúninu lu ti gayuaa iza maʼ gudiʼdiʼ ca para gucheechenu stiidxaʼ Reinu ca yaʼ. Xiruʼ zanda gúninu para gucheecherunu stiidxaʼ Reinu ca ra mayaca gusaani ti gayuaa iza yaʼ.
2. Ximodo huaníʼ ca publicación stinu de Reinu stiʼ Dios.
2 Xi huayaca lu ca iza gudiʼdiʼ ca. Ca publicación stinu maʼ zinécani stale iza de caníʼcani de Reinu stiʼ Dios. Dede lu iza 1939, revista jma runibiáʼ binni stinu lani Torre stiʼ ni rapa. Ni caníʼ de Reinu stiʼ Jiobá. Revista riʼ gatigá rusiidini de Reinu riʼ ne xi chiguni ni. Revista ¡Despertad! laaca rusiidini Reinu stiʼ Dios ca si nga esperanza stiʼ binni guidxilayú. ¡Riéchenu stale purtiʼ guiropaʼ revista riʼ nga ni jma huayaca traducir lu xcaadxi diidxaʼ ne ni jma ruundaʼ binni lu Guidxilayú! (Apoc. 14:6).
3. Bizeeteʼ caadxi modo huaquiiñenu para gucheechenu stiidxaʼ Reinu.
3 Xquidxi Jiobá huaquiiñeʼ gadxé gadxé modo para guiniʼcaʼ de Reinu riʼ. Ca dxi bizulúcabe biquiiñecabe caadxi carru napa ti equipu de sonidu ndaaniʼ, biquiiñecabe programa stiʼ radiu ne ti aparatu láʼ gramófono portátil. Nabé gucané ca modo que para gunda gunna stale binni de ca diidxaʼ nacubi ne galán stiʼ Reinu, neca huaxieʼruʼ publicador nuu tiempu que (Sal. 19:4). Lu ca últimu iza riʼ maʼ guluʼnu stale información lu jw.org, zacá laaca cucheechenu stiidxaʼ Reinu riʼ ra nuu millón de binni, dede né ra nuu ca binni nabeza ndaaniʼ ca guidxi ra qué riná gobiernu gucheechenu diidxaʼ.
4. Xi programa especial maʼ gudixhe chaahuinu gúninu.
4 Xquidxi Jiobá laaca huaguixhe chaahuicaʼ caadxi programa especial para gucheechecaʼ stiidxaʼ Reinu riʼ. Ti ejemplu de laani nga, dede biaʼ galaa de década stiʼ 1990, rúninu stipa pur gucheechenu diidxaʼ ra parque, ra ribeza binni carru ne ra nuu ca negocio ca ne cadi de yoo pur yoo si. Cadi tan xadxí guluucabe ti programa especial para gucheechenu diidxaʼ ra riuu stale binni ndaaniʼ ca guidxi naroʼbaʼ lu guidubi naca Guidxilayú. Ne laaca nuu stale congregación ni rucheechecaʼ diidxaʼ modo riʼ lu territorio sticaʼ ne ruzuhuaacaʼ exhibidor ne mexaʼ ra riguíxhecaʼ caadxi publicación ra jma ridiʼdiʼ binni. Neca zacá la? jma nga ricá íquenu gucheechenu diidxaʼ de yoo pur yoo (Hech. 20:20).
5. Xi zanda gúninu ra guzulú iza dxiiñaʼ riʼ.
5 Guidúʼyanu xi chiguizaaca lu ca iza zeeda ca. Ra guzulú iza dxiiñaʼ lu beeu septiembre riʼ, stale tu zuzulú zaca precursor regular. Ñee zácaluʼ tobi de laacabe la? Pa coʼ la? Ñee maʼ guníʼ íqueluʼ gácaluʼ precursor auxiliar gatigá la? Pa ganda gácaluʼ precursor o pa coʼ la? zaguu Jiobá ndaayaʼ stipa gúniluʼ pur gucheecheluʼ stiidxaʼ Reinu ca biaʼ gándatiʼ (Mal. 3:10).
6. Xiñee nabé risaca beeu octubre 2014.
6 Lu beeu octubre 2014 zusaa Reinu riʼ ti gayuaa iza de nuu. Nga runi, revista Torre stiʼ ni rapa ni zusaananenu binni beeu ca, puru si de Reinu stiʼ Dios chigusiidiʼ ni. Gúninu stipa pur gusaananu revista riʼ biáʼ gándatiʼ ra nuu jma binni. Laga cabézanu guiráʼ ni gueedané Reinu riʼ, cadi gusaana de guinínenu guiráʼ binni racalaʼdxiʼ gucaadiaga laanu «de enda runi mandar sti Dios» (Hech. 8:12).