¿Ñee huachaacabe ni cá lu Biblia la?

Nuu binni rinabadiidxaʼ pa huachaacabe ni cá lu Biblia. Sicaríʼ guníʼ profeta Isaías: «Stiidxaʼ Dios stinu qué ziuu dxi guinitilú» (Isaías 40:8). ¿Ximodo zanda chuʼnu seguru qué huadxaa ca promesa ni biʼniʼ Dios?

Napa Dios poder para gapa Stiidxaʼ ne qué rudiibe lugar guchaa binni ni cá luni. Dxiqué, dxi biʼniʼ copiar hombre ca libru stiʼ Biblia lu nacaʼ, bigábacaʼ cada letra stiʼ ca textu que para chuʼcaʼ seguru qué nidxaa gastiʼ, qué niguucaʼ ne qué nibeecaʼ nin ti letra luni. Peru cumu binni ruchee laanu la? guyuu ora bicheecabe ora biʼniʼ copiárcabe Biblia, peru qué nuchaacabe significadu stiʼ Biblia purtiʼ cadi naroʼbaʼ peʼ ra bicheecabe.

¿XIÑEE ZANDA CHUʼNU SEGURU NI CÁ LU BIBLIA NGA MENSAJE ORIGINAL STIʼ DIOS?

Nuu stale mil copia stiʼ ca manuscritu nayooxhoʼ stiʼ Biblia. Peru ora ridxela tuuxa ti cosahuiiniʼ maʼ gadxé lu ti copia la? ruchaaga ni né xcaadxi copia para guʼyaʼ pa ti error ni (pa racaláʼdxiluʼ gánnaluʼ jma, guyé lu sitiu jw.org ne biindaʼ tema ni láʼ «¿Se ha cambiado o manipulado la Biblia?»).

Guzéʼtenu ti ejemplu, lu iza 1947 ndaaniʼ caadxi cueva ni nuu gaxha de mar Muerto bidxela ca beduino (caadxi árabe ni runi viajar lu desiertu) caadxi documentu yooxhoʼ ni runibiáʼcabe casi Rollos del mar Muerto. Lu ca rollo yooxhoʼ riʼ zeeda parte de Biblia luni ni gucuá raca jma de chupa mil iza. Ca binni ni nanna de Biblia bichaagacaʼ ni cá lu ca rollo que né ni cá lu Biblia ni nápanu tiempu riʼ. ¿Xi bidxélacabe luni yaʼ?

Ca binni ni nanna de Biblia, bidiicaʼ cuenta biaʼsi ni cá lu ca rollo yooxhoʼ que né ni cá lu Biblia ni nápanu tiempu riʼ.a Ora biindaʼ chaahuicabe ca rollo yooxhoʼ que, bíʼyacabe dxandíʼ laani nga mensaje original stiʼ Dios ni zeeda lu Biblia ni nápanu tiempu riʼ. Rihuinni dxíchica, huayapa Jehová Stiidxaʼ para cadi guchaa guirutiʼ ni cá luni dede ca dxi stinu riʼ.

Nga runi zanda chuʼnu seguru dxandíʼ nga ni ridúʼndanu lu Biblia. Yanna guidúʼyanu xi rusiidiʼ ca profeta laanu de Dios.