¿Xiñee qué ricabi Dios guiráʼ oración?
Jehová, Bixhózenu ni nuu guibáʼ, riuulaʼdxiʼ gucaadiaga ca oración ni rúninu de guidubi ladxidoʼno. Peru qué ricábibe guiráʼ oración. ¿Xiñee yaʼ? ¿Xi naquiiñeʼ gánnanu ante guni orarnu? Guidúʼyanu xi ná Biblia.
«Ora guni orarluʼ, cadi guiniʼluʼ ngueca ca ngueca» (Mateo 6:7).
Qué racalaʼdxiʼ Jehová gúninu oración de memoria o guidúʼndanu ti oración ni cá lu ti libru. Racaláʼdxibe guininu ni nuu ndaaniʼ ladxidoʼno. Bixuiʼlú ñápaluʼ ti xhamíguluʼ ni ñabi lii ngueca ca ngueca guiráʼ dxi. ¡Nireeluʼ gana, ¿njaʼ?! Chupa binni ni dxandíʼ xhamigu, sinceru laacaʼ ne riniʼcaʼ ni cazaacacaʼ. Ora runi orarnu Dios né ca diidxaʼ ni guiree de ndaaniʼ ladxidoʼno la? rusihuínninu ridúʼyanu laabe casi ti xhamígunu.
«Ora rinábatu la? qué ricaatu, purtiʼ rinábatu para gúnitu cosa malu» (Santiago 4:3).
Cadi jneza cuézanu guicabi Dios ca oración stinu pa canábanu laabe cosa ni nánnanu qué riuuláʼdxibe. Guzéʼtenu ti ejemplu, guníʼ ique caguite ti binni apuesta pur bueltu ne canábabe Dios gudii laabe suerte. ¿Ñee rábiluʼ zacabi Dios oración stibe pa maca cá lu Stiidxaʼ cadi naquiiñeʼ gachelú binni gapa jma ne cadi guni cré suerte la? Coʼ njaʼ (Isaías 65:11; Lucas 12:15). Cadi naquiiñeʼ cuézanu guicabi Jehová tipu oración ca. Para guicabi Dios laanu, naquiiñeʼ guni orarnu modo canábabe ni laanu lu Biblia.
«Pa qué naʼ tuuxa chinanda ni ná ley, dede ribixhilaʼdxiʼ Dios ca oración stiʼ» (Proverbios 28:9).
Tiempu gucuá Biblia, qué nucaadiaga Dios ca oración stiʼ ca binni ni qué ñuni ni ná ley stibe, ne laaca zacaca riníʼ íquebe tiempu riʼ (Isaías 1:15, 16; Malaquías 3:6). Pa racaláʼdxinu guicabi Dios ca oración stinu, caquiiñeʼ gúninu stipa chinándanu ni ná ca ley stibe. Yanna, pa bíninu xiixa cosa malu dxiqué, ¿ñee riníʼ nga qué ziuu dxi gucaadiaga Dios ca oración stinu la? Coʼ. Racaláʼdxibe guni perdonarbe laanu pa gusihuínninu maʼ guca arrepentirnu ne cayúninu stipa gúninu ni riuuláʼdxibe (Hechos 3:19).