¿Ñee zanitilú Guidxilayú riʼ la?

Ni qué ziuu dxi guinitilú

BINNI

¿Xi rusiidiʼ Biblia? «Dios ni dxandíʼ, ni bizáʼ guidxilayú ne ni biʼniʼ ni [...], cadi bizáʼsibe ni, sínuque bizaʼbe ni para cueza binni luni» (ISAÍAS 45:18).

GUIDXILAYÚ

¿Xi rusiidiʼ Biblia? «Riluxe ti generación ne ruzulú sti generación, peru guidxilayú riʼ qué ziuu dxi guiluxe» (ECLESIASTÉS 1:4).

¿XI RINÍʼ NI? Biblia ná qué ziuu dxi guinitilú Guidxilayú ne siempre zabani binni ndaaniʼ ni. Peru ¿xiñee ná Biblia zanitilú guidxilayú riʼ yaʼ?

GUNÍʼ IQUE NDIʼ. Ruzeeteʼ Biblia zazaaca caadxi cosa ora mayaca guinitilú Guidxilayú casi ni bizaaca dxi bibani Noé. Tiempu que la? runi binni stale cosa malu (Génesis 6:13). Cumu bizuubaʼ Noé stiidxaʼ Dios la? bilá Dios laa né familia stiʼ, peru binitilube ca binni malu né ti diluvio. Biblia ná: «Binitilú guidxilayú guyuu tiempu que, dxi bilaahua ni» (2 Pedro 3:6). Zacá nga binitilú guidxilayú. Peru ¿xii nga ni binitilú yaʼ? Qué ninitilú Guidxilayú ra nabáninu, sínuque ca binni malu nuu ndaaniʼ ni. Nga runi, ora ruzeeteʼ Biblia zanitilú guidxilayú riʼ cadi caníʼ diʼ ni Guidxilayú ra nabáninu riʼ, sínuque ca binni malu nuu ndaaniʼ ni.

Ni dxandíʼ zanitilú

GUENDANAGANA NE COSA MALU

¿Xi rusiidiʼ Biblia? «Maʼ xcaadxi si tiempu cayaadxaʼ, ne maʼ qué ziuu binni malu; zuuyadxiluʼ ra guyuucaʼ ne maʼ qué guínnicaʼ raqué. Peru ca ni nadóʼ zacaacaʼ guidxilayú, ne zabánicaʼ nayecheʼ purtiʼ ziuu stale paz» (SALMO 37:10, 11).

¿XI RINÍʼ NI? Tiempu bibani Noé bisaba Dios ti diluvio ndaaniʼ Guidxilayú para gunitilú ca binni malu. Peru despué de Diluvio que bidálecaʼ sti biaje ne binitilucaʼ Guidxilayú. Peru maʼ cadi candaa zunitilú Dios laacaʼ ne maʼ qué ziuurucaʼ ndaaniʼ Guidxilayú riʼ. Cásica guníʼ salmista que, «maʼ qué ziuu binni malu». Zaquiiñeʼ Dios Reinu stiʼ para gunitilú ca binni riʼ, gobiernu riʼ ziuuni guibáʼ ne zuni mandarni ca binni ni guzuuba stiidxabe.

GUNÍʼ IQUE NDIʼ. ¿Xi zazaaca né ca gobiernu nuu lu Guidxilayú riʼ? ¿Ñee zuni apoyarcaʼ Reinu stiʼ Dios la? Biblia ná coʼ, sínuque zucaalucaʼ Reinu riʼ (Salmo 2:2). Peru ¿xi chiguizaaca despué yaʼ? Zunitilú Reinu stiʼ Dios ca gobiernu nuu lu Guidxilayú riʼ ne «laasi ni ziaana ni para siempre» (Daniel 2:44). Yanna, ¿xiñee caquiiñeʼ gusaana de guni mandar ca gobiernu nuu lu Guidxilayú riʼ yaʼ?

MAʼ CADI NAQUIIÑEʼ guni mandar binni

¿Xi rusiidiʼ Biblia? «Cadi lu náʼ diʼ binni nuu guni mandar ra guzuhuaa ñee» (JEREMÍAS 10:23).

¿XI RINÍʼ NI? Qué nuzáʼ Dios binni para guni mandarcaʼ laca laacaʼ. Nga runi, qué ganda guni mandárcabe binni ne cueecabe ca guendanagana ni nápacaʼ.

GUNÍʼ IQUE NDIʼ. Enciclopedia Britannica Academic ná qué ganda cuee ca gobiernu nuu lu Guidxilayú riʼ «guendapobre, hambre, guendahuará, desastre natural, guerra ne xcaadxi cosa malu nuu ndaaniʼ ni». Ne laaca bizeeteʼ enciclopedia riʼ: «Nuu tu runi cré pa ñuu ca gobiernu ca tobi si la? ñanda nibeecaʼ guiráʼ ca guendanagana nuu lu Guidxilayú». Peru neca chuʼcaʼ tobi si qué zanda gúnicaʼ ni. ¿Xiñee yaʼ? Purtiʼ binni ruchee laacaʼ ne qué gápacaʼ poder para cueecaʼ guiráʼ guendanagana ni nuu. Reinu si stiʼ Dios nga napa poder para cuee guiráʼ ca guendanagana nuu lu guidubi Guidxilayú.

Pur guiráʼ ni riete lu Biblia, cadi naquiiñeʼ guidxibi binni nachaʼhuiʼ ora guinitilú guidxilayú o ca cosa malu nuu ndaaniʼ ni, sínuque naquiiñeʼ guiéchecaʼ purtiʼ zunitilú Dios ca cosa malu nuu ndaaniʼ Guidxilayú riʼ ne zúnini ti lugar sicarú.

¿Padxí gaca ndiʼ yaʼ? Lu sti artículo ca zadúʼyanu xi ná Biblia.