¿Ñee zabániluʼ nayecheʼ pa gácaluʼ ti binni nachaʼhuiʼ la?

Maʼ xadxí riníʼ ique binni pa gácaluʼ nachaʼhuiʼ la? zacané nga lii guibániluʼ nayecheʼ. Guzéʼtenu ti ejemplu, Confucio, ti maestru ne filósofo ni bibani lu iza 551 hasta 479 ante de ca dxi stinu, guníʼ: «Cadi gúniluʼ binni ni qué racaláʼdxiluʼ gúnicabe lii».a Stale binni de Asia nacaʼ biaʼsi ni guníʼ hombre riʼ.

NI RUNI STALE BINNI

Stale binni riníʼ ique para guibániluʼ galán la? caquiiñeʼ gúniluʼ ni jneza. Nga runi, rúnicaʼ stipa guni respetarcaʼ binni, gaca xpiaʼcaʼ galán ne gápacaʼ ti conciencia nayá. Ti gunaa láʼ Linh, ni nabeza Vietnam ná: «Dede dxi nahuiineʼ guníʼ iqueʼ pa guneʼ ni jneza la? zié ni naa galán».

Cudii gunaa riʼ guendaró caadxi binni pobre ne ni qué gapa lidxi.

Nuu binni runi ni jneza purtiʼ nga nga ni rusiidiʼ religión sticaʼ. Ti hombre de Taiwán ni láʼ Hsu-Yun, guníʼ: «Bisiidicabe naa ora rati ti binni la? zabani nayecheʼ pa biʼniʼ ni jneza, peru pa coʼ la? zacaná».

NI RIBEENDÚ BINNI

Rihuinni nuu gunaa riʼ triste ne maʼ bidxaga, ne naguube xiiñibe ndaaniʼ nabe.

Nuu binni ná ora racanecaʼ xcaadxi la? rié ni laacaʼ galán. Peru stale de laacaʼ maʼ bidiicaʼ cuenta qué riree ca cosa ca modo cabézacaʼ. Shiu Ping, ti gunaa de Hong Kong, guníʼ: «Pur ni maʼ bizaacaʼ, zanda guinieeʼ cadi guiráʼ binni ni runi ni jneza ribeendú ni galán. Bineʼ biaʼ gúndatiʼ para gapa familia stinneʼ ni iquiiñeʼ, bineʼ ni jneza, peru qué nibaneniáʼ xheelaʼ nayecheʼ ne últimu la? bisaanabe naa ne xiiñeʼ».

Stale tu laa maʼ bidii cuenta qué racané religión binni guni ni jneza. Etsuko, ti gunaa nabeza Japón, bizeeteʼ: «Guyuaaʼ lade ti religión ne bineʼ caadxi dxiiñaʼ para gacaniaʼ ca joven de raqué. Bireeʼ gana ora biiyaʼ nabé feu xpiaʼ ca binni rié yuʼduʼ que, ridíndecaʼ para tídicaʼ lú stobi ne cadi jneza modo riquiiñecaʼ bueltu stiʼ yuʼduʼ que».

«Bineʼ biaʼ gúndatiʼ para gapa familia stinneʼ ni iquiiñeʼ, bineʼ ni jneza, peru qué nibaneniáʼ xheelaʼ nayecheʼ ne últimu la? bisaanabe naa ne xiiñeʼ» (SHIU PING, HONG KONG)

Caadxi binni ni napa religión riuucaʼ triste purtiʼ pur gana si bíʼnicaʼ ni jneza. Ne nga peʼ nga ni bizaaca Van, ti gunaa de Vietnam. Sicaríʼ guniʼbe: «Guiráʼ dxi ribaqueʼ cuananaxhi, guieʼ ne guendaró lu bidóʼ. Runeʼ ni para guicaaʼ ti ndaayaʼ galán despué. ¡Xadxí bineʼ ni jneza ne bineʼ adorar bidóʼ...! Peru neca bineʼ guiráʼ ndiʼ la? qué nibaneʼ nayecheʼ purtiʼ nabé guca huará xheelaʼ. Ne baʼdudxaapaʼ stinneʼ ni cayuni estudiar sti guidxi gutiʼ dxi napa 20 iza».

XIÑEE NECA NACHAʼHUIʼ BINNI QUÉ RIBANI NAYECHEʼ

Neca risaca gácaluʼ nachaʼhuiʼ né binni qué riníʼ diʼ nga zabániluʼ nayecheʼ. ¿Xiñee coʼ yaʼ? Guidúʼyanu xi rusiidiʼ Stiidxaʼ Dios.

CADI GUIRÁʼ BINNI RACALAʼDXIʼ GUNI NI JNEZA

«Ti binni ruchee si zanda gunitilú stale cosa galán» (ECLESIASTÉS 9:18).

Neca runi binni stipa guni ni jneza la? zanda gacanacaʼ pur ni guni xcaadxi binni. Guzéʼtenu ti ejemplu, ora nuu ti pandemia, zándaca lii zuzuubaluʼ stiidxaʼ ca autoridad ne qué zadxaagaluʼ xcaadxi binni. Peru ¿pa xcaadxi qué guzuubaʼ diidxaʼ yaʼ? Zanda cúʼcabe xquendanabani binni ni cayuni ni jneza ra naxoo.

STALE BINNI QUÉ GANNA XII NGA NI JNEZA NE NI CADI JNEZA

«Nuu ti neza galán para binni, peru riné ni laacaʼ lu guendaguti» (PROVERBIOS 14:12).

Biaʼ dxi huabani binni huayuu tu laa riníʼ ique cayuni ni jneza, peru despué huadiicaʼ cuenta cadi zacá ni. Nga runi, neca nuu tu laa racalaʼdxiʼ guni ni jneza la? stale de laacaʼ racanacaʼ pur ca decisión cadi jneza ni ricaacaʼ.

QUÉ GANNA BINNI XI CHIGUIZAACA NÉ XQUENDANABANI

«Nin qué gánnatu xi chigaca de laatu guixíʼ» (SANTIAGO 4:14).

Dede ti binni nachaʼhuiʼ zanda gueeda gatiʼ ora cadi cabeza ni. Guzéʼtenu ti ejemplu, lu pandemia COVID-19, huayati stale binni ni huayacané xcaadxi ni huará. Guidúʼyanu ni bizaaca Liting, ti gunaa de China, ni guti bixhoze lu ti accidente. Sicaríʼ guniʼbe: «Qué ñeneʼ xiñee guti ti binni ni runi ni jneza. Nabé biʼniʼ bixhozeʼ dxiiñaʼ, guca humilde ne nachaʼhuiʼ, peru de guiráʼ ca binni ni zeʼ lu carru que, laasibe nga gútibe».

Neca nuu binni ni runi ni jneza, stale de laacaʼ qué ribánicaʼ galán, peru ¿xi naquiiñeʼ gúninu para guibáninu nayecheʼ yaʼ? Para gánnanu ni la? caquiiñenu xiixa ni gacané laanu, ni guicabi ca pregunta stinu ne ni guluíʼ laanu ximodo zanda guibáninu nayecheʼ. Peru ¿paraa zanda guidxélanu ni yaʼ?

a Pa racaláʼdxiluʼ gánnaluʼ jma de ni bisiidiʼ Confucio, biindaʼ capítulo 7, párrafo 31 hasta 35 stiʼ libru ni láʼ El hombre en busca de Dios, ni biʼniʼ ca testigu stiʼ Jehová, nuuni lu www.jw.org.