«¡Yanna huaxa maʼ riuuladxeʼ guneʼ predicar!»

BIREEʼ GANA

Dxi maʼ joven naa, chaahuidugá bixeleʼ de Jehová. Biiyaʼ ruluíʼ libre ca compañeru ni riniáʼ scuela ne zanda gúnicaʼ ni gápacaʼ gana, laaca gucalaʼdxeʼ gacaʼ casi laacabe. Nagana guca para naa chinandaʼ ca regla stiʼ bixhozeʼ ne chinandaʼ ni ná Biblia, ne laaca guca nagana para naa guneʼ ni ná Jehová. Neca nannaʼ nuu Jehová bineʼ sentir nuaaʼ zitu de laabe.

Qué ñuaaʼ inactiva, peru huaxiéʼ bineʼ predicar, ne bineʼ ni para si cadi guiníʼ xcaadxi qué runeʼ predicar. Maʼ qué racaʼ preparar para ora chiguneʼ predicar, ngue runi guca nagana para naa guinieniaʼ binni. Laaca maʼ qué ñapaʼ revisita nin estudiu ne maʼ huaxiéʼ riuuladxeʼ guneʼ predicar, ne pur ngue bireeʼ gana. Dede guníʼ iqueʼ: «¿Ximodo runi ca hermanu para guni predicarcaʼ guiráʼ semana ne guiráʼ beeu pue?».

Dxi napaʼ 17 iza, guizáʼ maʼ racalaʼdxeʼ guireeʼ de ra lidxeʼ. Ngue runi, yendezaʼ Australia. Guyuu bixhozeʼ ne jñaaʼ xizaa pur naa, peru nánnacabe zuneruaʼ ni ná Jehová.

Dxi maʼ nabezaʼ Australia jmaruʼ si bixeleʼ de Jehová. Huaxiéʼ guyaaʼ reunión ne bidxaagaʼ caadxi joven ni rié reunión peru sti dxi riecaʼ baile ne rixúdxicaʼ. Raqué nga bidieeʼ cuenta cayuneʼ ni ná Jehová ne laaca cayuneʼ ni ná binni guidxilayú, peru nin ti ladu qué ñuaaʼ nayecheʼ.

GUCA XIIXA NI CADI CABEZAʼ

Chupa iza despué, binebiaʼyaʼ ti hermana ne neca qué nudiibe cuenta gucanebe naa guiníʼ iqueʼ ximodo nabaneʼ. Gulezaʼ ndaaniʼ ti yoo ra nabeza gaayuʼ hermana soltera, ne biʼniʼ invitardu superintendente de circuito ne Tamara, xheelabe, guiaanacaʼ ra lídxidu ti semana. Laga cayuni tender hermanu que xiixa cosa stiʼ congregación, rié hermana que ra nuudu ne guizáʼ ruxidxinedu laa. Guizáʼ guyuuladxeʼ ngue. Nannaʼ espiritual hermana que, peru qué lica niníʼ iqueʼ pabiáʼ nadoʼbe ne alegre laabe.

Nabé nadxii Tamara Jehová ne runi predicar né stale gana. Rúnibe ni ná Jehová né stale guendanayecheʼ, peru naa neca runeʼ stipa guneʼ ni ná Jehová, cadi nayecheʼ diʼ nuaaʼ. Modo laabe que, gucaneni naa stale. Ejemplu stiʼ hermana riʼ, bisiidini naa ti cosa nabé risaca, racalaʼdxiʼ Jehová gúninu ni ná «né stale guendanayecheʼ» (Sal. 100:2).

GUYUULADXEʼ GUNEʼ PREDICAR STI BIAJE

Racalaʼdxeʼ chuaaʼ nayecheʼ casi Tamara, peru naquiiñeʼ guchaaʼ modo nabaneʼ. Cadi casi ziaaʼ bineʼ ca cambiu que. Primeru guca preparar para guneʼ predicar ne guyuu beeu gucaʼ precursora auxiliar. Gucaneni naa cadi chuaaʼ nerviosa ne cadi guidxibeʼ. Cumu jma biquiiñeʼ Biblia la? jma nayecheʼ guyuaaʼ. Ne qué nindaa gudixheʼ iqueʼ gacaʼ precursora auxiliar guiráʼ beeu.

Bidxaagaʼ hermana ne hermanu ni runi ni ná Jehová. Ejemplu stícabe gucaneni naa guuyaʼ xii nga ni jma risaca para naa ne guneʼ estudiar Biblia guiráʼ dxi. Ra gudiʼdiʼ tiempu, jma guyuuladxeʼ guneʼ predicar ne gucaʼ precursora regular. Despué de stale iza biguetaʼ guyuaaʼ nayecheʼ ndaaniʼ congregación.

BIDXELAʼ TI COMPAÑERU NI LAACA PRECURSOR LAA

Ti iza despué, binebiaʼyaʼ Alex, ti hermanu nachaʼhui, nadxii Jehová ne riuulaʼdxiʼ guni predicar. Siervu ministerial laabe ne maʼ zinebe xhoopaʼ iza de precursor. Laaca biʼniʼ predicarbe caadxi beeu ndaaniʼ guidxi Malaui, ti lugar ra caquiiñeʼ jma publicador para gaca predicar. Raqué bidxaagabe caadxi misioneru, gucané ca hermanu riʼ laabe ne guluucaʼ gana laabe gúnibe jma lu xhiiñaʼ Reinu.

Lu iza 2003, naa ne Alex bichaganadu, cayúnidu ni ná Jehová de tiempu completu. Maʼ bizíʼdidu stale cosa ra cayúnidu ni ná Jehová, ne huaguube ndaayaʼ laadu de stale modo.

GUCUAADU JMA NDAAYAʼ

Lu iza 2009, guca invitardu gácadu misioneru ndaaniʼ ti guidxihuiiniʼ ni láʼ Timor Oriental, riaanaʼ guidxi riʼ gaxha de Indonesia. Guizáʼ nayecheʼ nuudu, peru laaca cadxibihuiinidu. Gaayuʼ beeu despué, guyuudu Dili, capital stiʼ Timor Oriental.

Gupa xidé biaʼdu cultura, idioma, guendaró ne modo nabani binni guidxi que. Ora runi predicardu, ridxéladu binni ni nabé pobre, ni qué ñé scuela ne ni ruquiichiʼ nácabe laa. Laaca binibiaʼdu binni ni gucaná pur ca guerra ne violencia guyuu ndaaniʼ guidxi que.a

¡Galán raca predicar raqué! Ti dxi, gunieniaʼ ti dxaapahuiiniʼ ni láʼ María, ni napa 13 iza.b Nuube triste purtiʼ guti jñaabe ne huaxiéʼ ruuyabe bixhózebe. Cásica xcaadxi xcuidihuiiniʼ biaʼ laabe, qué ganna María xi guni. Dede cayuunabe cayábibe naa xi cayuni sentirbe. Peru qué ñeneʼ diaʼ laabe purtiʼ deruʼ caziideʼ idioma que. Ngue runi, bineʼ ti oración ne gunabaʼ Jehová gacané naa ti cuaaʼ gana laabe. Laaca biindaniáʼ laabe caadxi textu stiʼ Biblia para quixhedxieʼ ladxidoʼbe. Caadxi iza despué, biiyaʼ ximodo gucané Biblia María guchaa modo nabani. Guyuunisa María ne yanna maʼ cusiidiʼ binni de Dios. Laaca maʼ nuube ndaaniʼ ti familia ni runi ni ná Jehová ne ni nadxii laabe.

Rihuinni dxichi caguu Jehová ndaayaʼ dxiiñaʼ ni cayaca ndaaniʼ guidxi Timor Oriental. Lu ca últimu chii iza riʼ huayuunisa stale publicador, stale de laaca nácacaʼ precursor, siervu ministerial ne ancianu. Xcaadxi de laacaʼ racanecaʼ ndaaniʼ Oficina Remota de Traducción ne racanecaʼ para gaca traducir ca publicación lu idioma ni riníʼcabe raqué. Riuaaʼ nayecheʼ ora runadiagaʼ cayuundacabe ra reunión, ora ruxídxicabe ne ora ruuyaʼ pabiáʼ cayuni progresárcabe.

GUIZÁʼ NAYECHEʼ NABÁNIDU

Maʼ gadxé modo nabani binni ndaaniʼ guidxi Timor Oriental que modo nabani binni Australia. Peru jma nayecheʼ biʼniʼ sentirdu dxi guyuʼdu Timor Oriental. Nuu biaje riguíbadu ndaaniʼ autobús ra dxaʼ binni ni yesí benda ni nabidxi ne verdura ra luguiaa ni nuu guidxi que. Laaca bidiʼdu estudiu binni ndaaniʼ yoohuiiniʼ neca guizáʼ nandáʼ ndaaniʼ cani, de yu pisu stícani ne canazá bere ndaaniʼ cani. Neca gudídidu ra nagana, stale biaje guníʼ iqueʼ: «¡Guizáʼ galán nuaaʼ raríʼ!».

Ora riníʼ iqueʼ modo bibaneʼ dxiqué, rudieeʼ xquixe peʼ jñaaʼ ne bixhozeʼ purtiʼ bisiidicaʼ naa de Jehová ne gucanecaʼ naa dxi gucaʼ joven. Guca cumplir ca diidxaʼ ni zeeda lu Proverbios 22:6 luguiaʼyaʼ. Nuu jñaaʼ ne bixhozeʼ orgulloso de naa ne de Alex. Laaca nuucabe nayecheʼ purtiʼ caquiiñeʼ Jehová laadu para gúnidu ni ná. Dede lu iza 2016, naa ne Alex cayúnidu dxiiñaʼ de circuito lu territorio ni runi tender sucursal de Australasia.

Qué guirá guidxagayaaʼ xiñee qué ñuuladxeʼ guneʼ predicar dxiqué, peru ¡yanna huaxa maʼ riuuladxeʼ guneʼ predicar! Maʼ bidieeʼ cuenta riuu tobi nayecheʼ ora runi ni ná Jehová de guidubi ladxidóʼ neca tidiʼ ra nagana. Naa ne Alex maʼ zinedu 18 iza de cayúnidu ni ná Jehová, ne guizáʼ nayecheʼ nuudu. Yanna huaxa zanda guinieeʼ ca diidxaʼ ni gudxi David Jehová: «Guiráʼ ca ni guyubi gulaluʼ laa la? ziuucaʼ nayecheʼ; qué zusaana de gucaacaʼ ridxi purtiʼ nuucaʼ nayecheʼ [...], ne guiráʼ ca ni nadxii laluʼ ziuucaʼ nayecheʼ pur lii» (Sal. 5:11).