Ni rinabadiidxaʼ ca ni ruundaʼ

Pa gaca divorciar ti xpinni Cristu ne cadi pur razón ruzeeteʼ Biblia, ne guichaganáʼ sti biaje, ¿ximodo naquiiñeʼ guʼyaʼ ca hermanu de congregación guendaxheelaʼ ni gúpabe que ne guendaxheelaʼ nacubi ca?

Pa guizaaca nga la? naquiiñeʼ guiene ca hermanu de congregación maʼ biluxe guendaxheelaʼ stibe dxi bichaganabe sti biaje ne binni ni nacubi bichaganabe ca nga xheelabe nezalú ley. Para ganda guiénenu ni bizéʼtenu riʼ, guidúʼyanu xi guníʼ Jesús de ora gaca divorciar binni ne guichaganáʼ sti biaje.

Lu Mateo 19:9 bisiene Jesús gunáʼ nga razón ni nuu para gaca divorciar ti guendaxheelaʼ, textu riʼ ná: «Guiráʼ hombre gaca divorciar de xheelaʼ —peru zanda gaca ni pur ti pecadu sexual— ne guichaganáʼ sti gunaa la? maʼ guendarapa jnadxii nga». Ca diidxaʼ ni guníʼ Jesús riʼ, rusiidiʼ ni laanu chupa cosa 1) zanda gaca divorciar ti guendaxheelaʼ pa tobi de laacaʼ gúnicaʼ pecadu sexual ne 2) pa gaca divorciar ti hombre de xheelaʼ ne cadi guni ni pur razón rusiidiʼ Biblia ne guichaganáʼ sti biaje la? maʼ guendarapa jnadxii ni.a

Pur ca diidxaʼ ni guníʼ Jesús riʼ, pa ti hombre guni cometer pecadu sexual ne gaca divorciar de xheelaʼ, ¿ñee riníʼ nga maʼ nuube libre para guichaganabe sti biaje la? Cadi caquiiñeʼ peʼ gaca ni zacá. Ora tobi de laacabe gapa jnadxii, stobi ni qué gapa donda ca nga chiguni decidir pa zuni perdonar laabe o pa coʼ. Pa qué náʼ xheelabe guibiguetané laabe ne gaca divorciárcabe nezalú ley la? guirópacabe maʼ ziuucabe libre para guichaganácabe sti biaje guiluxe si ca trámite de divorcio stícabe.

Peru laaca zándaca guiníʼ binni ni qué gapa donda ca qué racalaʼdxiʼ guibiá xquendaxheelaʼ ne nuu dispuestu guni perdonar laabe. Yanna, ¿pa qué náʼ hombre riʼ guibiguetané xheelaʼ neca maʼ biʼniʼ perdonar laabe ne gaca divorciar de laabe nezalú ley yaʼ? Pur ni rusiidiʼ Biblia, cadi nuu diʼ hombre ca libre para guichaganáʼ sti biaje purtiʼ nuu gunaa ca dispuesta guni perdonar laabe ti cadi guilaa xquendaxheelacabe. Peru pa cá hombre ca tema guni ni ná ne guichaganáʼ sti binni neca gastiʼ razón ni ruzeeteʼ Biblia para guni ni, sti biaje ca cayuni cometerbe adulterio o nápabe jnadxiibe. Ne napa xidé guni ca ancianu de congregación sti comité judicial pur pecadu ni bíʼnibe ca (1 Cor. 5:1, 2; 6:9, 10).

Pa guichaganáʼ ti hombre sti biaje neca cadi nuu libre para guni ni casi rusiidiʼ Biblia, ¿ximodo naquiiñeʼ guʼyaʼ ca hermanu de congregación guendaxheelaʼ ni gúpabe que ne guendaxheelaʼ nacubi stibe riʼ yaʼ? ¿Ñee caʼruʼ guixiá primé guendaxheelaʼ gúpabe que la? ¿Ñee zándaruʼ guni decidir binni ni qué gapa donda ca pa zuni perdonar ni guca xheelaʼ o pa coʼ la? ¿Ñee zuuyaʼ ca hermanu guendaxheelaʼ nacubi riʼ casi guendarapa jnadxii la?

Dxiqué la? guníʼ íquenu neca maʼ bichaganáʼ ti binni nezalú ley peru pa nabániruʼ ni guca xheelabe que, ne caʼruʼ guichaganáʼ o qué huayuni nin ti pecadu sexual la? binni ni bichaganabe riʼ cadi xheelabe laa, sínuque jnadxiibe laa. Peru Jesús qué nuzeeteʼ diʼ de binni ni qué gapa donda ca ora guníʼ de divorcio ne guichaganáʼ binni sti biaje. Ni bisiene Jesús nga pa gaca divorciar ti hombre sin ti razón ni ruzeeteʼ Biblia, ne guichaganáʼ sti biaje la? maʼ guendarapa jnadxii ni. Ne racá nga riluxe primé guendaxheelaʼ stiʼ binni ca.

Ora gaca divorciar tuuxa ne guichaganáʼ sti biaje, ni guca xheelabe que neca qué nucheené laabe maʼ cadi naquiiñeʼ guiníʼ ique pa zuni perdonar laabe o pa coʼ. Nga runi neca nabániruʼ xheelabe ni qué nucheené laabe, caʼruʼ guichaganáʼ o qué ñuni cometer pecadu sexual, cadi naquiiñeʼ diʼ guʼyaʼ ca hermanu guendaxheelaʼ nacubi ca casi guendarapa jnadxii.b

Lu ejemplu ni bizéʼtenu ra bizulunu que hombre ca nga gupa jnadxii ne guca divorciar. Peru ¿xi guizaaca pa gaca divorciar hombre riʼ neca qué ñapa jnadxii ne guichaganáʼ sti biaje yaʼ? Yanna, ¿xi guizaaca pa qué ñuni cometer hombre riʼ ti pecadu sexual ante gaca divorciar ne bíʼnibe ni despué ne laaca bichaganabe neca xheelabe guyuu dispuestu ñuni perdonar laabe yaʼ? Modo tiica si bizaaca ni, pa guca divorciar binni ca ne bichaganáʼ sti biaje la? maʼ guendarapa jnadxii ni, ne laaca maʼ biluxe primé guendaxheelaʼ stibe que. Peru nezalú ley la? maʼ legal guendaxheelaʼ nacubi riʼ. La Atalaya 15 de febrero de 1980, yaza 30 bisiene, pa ti binni gaca divorciar ne guichaganáʼ sti biaje, qué zanda diʼ gusaanabe xheelabe para guibiguetaʼnebe ni guca xheelabe primé que, purtiʼ ra gúpabe jnadxiibe, guca divorciarbe ne bichaganabe sti biaje la? raqué nga biluxe primé guendaxheelaʼ stibe que.

Neca maʼ gadxé modo cayénenu tema riʼ yanna, qué riníʼ diʼ nga huaxiéʼ risaca guendaxheelaʼ para laanu ne cadi malu nga gapa binni jnadxii. Pa gaca divorciar ti hombre de xheelaʼ sin ti razón ni rudii Biblia ne guichaganáʼ sti binni neca cadi nuu libre para guni ni casi ruzeeteʼ Biblia la? naquiiñeʼ guni ca ancianu ti comité judicial stiʼ binni ca purtiʼ maʼ guendarapa jnadxii ni. (Pa laaca xpinni Cristu gunaa ni nacubi bichaganabe ca la? naquiiñeʼ gúnicabe sti comité judicial para laabe, purtiʼ laaca cayuni cometerbe adulterio). Neca cadi guendarapa jnadxii nga guendaxheelaʼ nacubi riʼ, peru naquiiñeʼ tidiʼ stale iza para ganda gapa hombre riʼ ti responsabilidad ndaaniʼ congregación. Naquiiñeʼ cueza ca ancianu dede ora maʼ qué riníʼ ique binni mal de laabe pur ni bíʼnibe que. Laaca naquiiñeʼ guʼyaʼ ca ancianu pa qué gapa ni guca xheelabe ne ca xiiñibe nahuiiniʼ xiixa guendanagana pur bisaanabe laacaʼ (Mal. 2:14-16).

Yanna ra maʼ biénenu xi guiráʼ guendanagana rapa binni ora gaca divorciar ne guibiguetaʼ guichaganáʼ neca cadi nuu libre casi rusiidiʼ Biblia, guiráʼ ca xpinni Cristu naquiiñeʼ gúninu stipa pur chinándanu ejemplu stiʼ Jehová purtiʼ laa guizáʼ rusisaca guendaxheelaʼ (Ecl. 5:4, 5; Heb. 13:4).