Riguu Jehová ndaayaʼ laanu pur stipa rúninu para cadi guiáʼdxanu Conmemoración

1, 2. ¿Xiñee riuunu Conmemoración guiráʼ iza?

RACA biaʼ chupa mil iza, bidii Jesús xquendanabani pur laanu ne pur laani nápanu oportunidad de guibáninu sin qué chuʼ dxi gátinu. Gueelaʼ ante gátibe, gudixhestibe ti eventu ra biquiiñebe pan ne vinu. Biʼniʼ mandarbe ca discípulo stibe cadi gusaana de gúnicaʼ ni para guietenaláʼdxicaʼ pabiáʼ nadxiibe laacaʼ (1 Cor. 11:23-26).

² Laanu, ca xpinni Cristu, rinándanu mandatu ni bidii Jesús purtiʼ guizáʼ nadxiinu laabe (Juan 14:15). Ante ne despué de Conmemoración rusihuínninu pabiáʼ rusisácanu sacrificiu ni bíʼnibe. Ribeenu tiempu para guni orarnu ne riníʼ íquenu pabiáʼ risaca guendaguti stibe para laanu. Laaca ribeenu tiempu para guni predicarnu ne guni invitarnu binni para guidagulisaanecaʼ laanu dxi nabé risaca riʼ. Ne qué racaláʼdxinu chuʼ xiixa ni gucueeza laanu para cadi chuunu Conmemoración.

3. ¿Xi zadúʼyanu lu artículo riʼ?

³ Laanu, ca xpinni Jehová, rúninu stipa guietenaláʼdxinu guendaguti stiʼ Cristu. Lu artículo riʼ zadúʼyanu chonna cosa ni rusihuinni zacá ni. Primé, rúninu Conmemoración casi guníʼ Jesús. Guiropa, runi invitarnu xcaadxi para guidagulisaanecaʼ laanu. Ne guionna, rúninu ni neca nuu guendanagana.

RÚNINU CONMEMORACIÓN CASI GUNÍʼ JESÚS

4. a) ¿Xii nga ca cosa ni rizíʼdinu lu discursu stiʼ Conmemoración? (Lucas 22:19, 20). b) ¿Xiñee nabé risaca gánnanu respuesta stiʼ ca pregunta ni riete lu discursu ca?

⁴ Guiráʼ iza ora riuunu Conmemoración, rucaʼdiáganu ti discursu ni biree de lu Biblia ne nayaʼniʼ modo ricábini caadxi pregunta. Lu ni riete xiñee caquiiñeʼ gulá Cristu laanu. Ne ximodo ra gutiʼ ti hombre si randa raca perdonar ca pecadu stiʼ stale binni. Rusietenalaʼdxiʼ ni laanu tu zanda gó pan ne gueʼ vinu ne xi runi representar ca ni (biindaʼ Lucas 22:19, 20). Lu discursu riʼ ridúʼyanu xi ndaayaʼ zapa ca binni ni napa esperanza de guibani lu Guidxilayú riʼ (Is. 35:5, 6; 65:17, 21-23). Nabé risaca guiénenu ca cosa ca. Nuu millón de binni qué riénecaʼ ne qué rusisácacaʼ sacrificiu ni biʼniʼ Jesús. Ne laaca qué rietenaláʼdxicaʼ guendaguti stiʼ Jesús casi guniʼbe gaca ni. ¿Xiñee yaʼ?

5. ¿Ximodo bietenalaʼdxiʼ binni guendaguti stiʼ Jesús despué de guti ca apóstol?

⁵ Guti si stale de ca apóstol stiʼ Jesús, qué nindaa bihuinni caadxi xpinni Cristu falsu ndaaniʼ congregación (Mat. 13:24-27, 37-39). Bisiguii ca hombre riʼ «ca discípulo para chinándacaʼ laacabe» (Hech. 20:29, 30). Tobi de ca guendarusiguii ni bisiidicabe nga qué nudii «Cristu xpida ti biaje si para guáʼ pecadu stiʼ stale binni». Qué nusiidicabe ni ná Biblia ne bisiidicabe naquiiñeʼ gudii Cristu xpida stale biaje (Heb. 9:27, 28). Tiempu riʼ, stale binni nachaʼhuiʼ runi crecaʼ guendarusiguii riʼ, riécabe yuʼduʼ guiráʼ semana o guiráʼ dxi para guni celebrárcabe ti ceremonia ni láʼ sacrificiu stiʼ mixaʼ o Eucaristía.b Ne nuu stale religión huaxiéʼ rietenaláʼdxicaʼ guendaguti stiʼ Jesús ne stale de ca xpínnicaʼ qué gánnacaʼ xi riníʼ ni. Zándaca nuu tu guinabadiidxaʼ: «¿Dxandíʼ nga zanda gaca perdonar ca pecadu stinneʼ pur guendaguti stiʼ Jesús la?». Nuu tu laa riníʼ ique zacá purtiʼ huasiidicabe laacaʼ qué zanda gaca perdonar ca pecadu stinu pur sacrificiu stiʼ Jesús. Peru ¿xi huayuni ca ni dxandíʼ xpinni Cristu yaʼ?

6. ¿Xi biene ti grupu de binni ruundaʼ Biblia lu iza 1872?

⁶ Lu iza 1870, ti grupu de binni ruundaʼ Biblia ra guzániruʼ Charles Russell, bizulú biʼniʼ estudiar chaahuicaʼ Stiidxaʼ Dios. Biyúbicabe gánnacabe xi riníʼ sacrificiu stiʼ Jesús ne ximodo naquiiñeʼ guietenaláʼdxicabe guendaguti stibe. Lu iza 1872, gucané Biblia laacabe guiénecabe bidii Jesús xpida para guiaxa pecadu stiʼ binni. Ne qué nucaachicabe ni biziidicabe riʼ, sínuque guleecabe ni lu libru, periódicu ne revista. Qué nindaa bíʼnicabe Conmemoración ti biaje lu ti iza casi biʼniʼ ca xpinni Cristu ni bibani lu primé siglu.

7. Ni biʼniʼ investigar ca xpinni Cristu raca caadxi iza, ¿ximodo racané ni laanu tiempu riʼ?

⁷ Ni biʼniʼ investigar ca xpinni Cristu raca caadxi iza, ¿ximodo racaneni laanu tiempu riʼ? Guluu Jehová ndaayaʼ stipa ni bíʼnicabe ne pur laani, tiempu riʼ riénenu ximodo zanda gacané guendaguti stiʼ Cristu laanu ne xi guiráʼ zazaaca pur laani (1 Juan 2:1, 2). Laaca maʼ bizíʼdinu cudii Biblia chupa esperanza ca binni ni guzuubaʼ stiidxaʼ Dios, guibánicaʼ guibáʼ sin qué chuʼ dxi gáticaʼ o guibánicaʼ lu Guidxilayú riʼ. Runi sentirnu nuunu gaxha de Jehová ora guiníʼ íquenu pabiáʼ nadxiibe laanu ne pabiáʼ racané sacrificiu stiʼ Jesús laanu (1 Ped. 3:18; 1 Juan 4:9). Nga runi, cásica ca hermanu de dxiqué, runi invitarnu xcaadxi binni guietenaláʼdxinecaʼ laanu guendaguti stiʼ Jesús casi biʼniʼ mandarbe ni.

RUNI INVITARNU BINNI CHEʼ CONMEMORACIÓN

8. ¿Xi huayuni ca xpinni Jehová para guni invitarcaʼ binni Conmemoración? (Biiyaʼ ca imagen).

⁸ Maʼ raca stale iza de runi invitar ca xpinni Jehová binni para Conmemoración. Lu iza 1881, revista Torre stiʼ ni rapa biʼniʼ invitar ni ca hermanu de Estados Unidos para checaʼ Conmemoración ra lidxi ti hermanu ndaaniʼ guidxi Allegheny (Pensilvania). Despué maʼ cada congregación biʼniʼ Conmemoración. Peru lu beeu marzo iza 1940 gúdxicabe ca publicador maʼ zanda guni invitarcaʼ tutiica binni ni gusihuinni interés. Ne lu iza 1960, ngue nga primé biaje biseendaʼ Betel invitación ni guca imprimir ra nuu ca congregación. Ne dede dxi que, laanu, ca testigu stiʼ Jehová, huaguíʼzinu stale millón de invitación. ¿Xiñee riquiiñenu stale tiempu ne stipa para gúninu dxiiñaʼ riʼ yaʼ?

9, 10. ¿Turuʼ ribeendú ni galán pur stipa ni rúninu para guni invitarnu xcaadxi Conmemoración? (Juan 3:16).

⁹ Tobi de ca razón riuuláʼdxinu guni invitarnu binni Conmemoración nga purtiʼ racaláʼdxinu gánnacaʼ xi maʼ biʼniʼ Jehová ne Jesús pur laanu (biindaʼ Juan 3:16). Racaláʼdxinu ni gúʼyacabe ne ni gunadiágacabe gueelaʼ ca gucaani laacabe gunibiáʼ chaahuicabe Jehová ne gácacabe xpinni. Peru cadi laasicabe nga ni ribeendú ni galán pur stipa ni rúninu para guni invitarnu xcaadxi.

¹⁰ Laaca runi invitarnu ca ni nuu inactivu. Runi invitarnu ca binni riʼ Conmemoración para gusietenaláʼdxinu laacabe nadxiiruʼ Jehová laacabe. Guizáʼ riéchenu ora guidúʼyanu guidagulisaanécabe laanu. Gueelaʼ riécabe Conmemoración rusietenalaʼdxiʼ ni laacabe pabiáʼ nayecheʼ guyuucabe dxi biʼniʼ servírcabe Jehová. Guidúʼyanu ni bizaaca Mónica.c Lu pandemia stiʼ COVID-19 bizulú biʼniʼ predicarbe sti biaje. Despué de guyebe Conmemoración lu iza 2021, guniʼbe: «Nabé risaca Conmemoración riʼ para naa. Despué de gande iza biguetaʼ bineʼ predicar ne bineʼ invitar binni Conmemoración. Bineʼ ni de guidubi ladxiduáʼ purtiʼ zacatiʼ zanda gudieeʼ xquixe peʼ Jehová ne Jesús pur ni bíʼnicaʼ pur naa» (Sal. 103:1-4). Pa guicaa binni invitación stinu o coʼ, rúninu stipa guni invitarnu laacabe purtiʼ nánnanu rusisaca Jehová stipa ni rúninu.

11. ¿Ximodo huaguu Jehová ndaayaʼ laanu pur stipa ni rúninu pur guni invitarnu binni cheʼ Conmemoración? (Ageo 2:7).

¹¹ Guizáʼ riguu Jehová ndaayaʼ laanu pur stipa ni rúninu pur guni invitarnu binni cheʼ Conmemoración. Guzéʼtenu ti ejemplu, lu iza 2021, neca nuu pandemia stiʼ COVID-19, gúpanu ti asistencia de 21,367,603 binni, ti asistencia ni qué huayuu dxi gápanu, jma de doble de guiráʼ ca testigu stiʼ Jehová ni nuu lu guidubi Guidxilayú. Dxandíʼ, ni jma risaca para Jehová nga cada binni ne cadi ti cantidad (Luc. 15:7; 1 Tim. 2:3, 4). Nanna dxíchinu ora runi invitarnu binni cheʼ Conmemoración racané Jehová laanu guidxélanu binni ni nayá ladxidóʼ (biindaʼ Ageo 2:7).

RÚNINU CONMEMORACIÓN NECA NUU GUENDANAGANA

12. ¿Gunáʼ nga ca guendanagana ni zándaca gucueeza laanu para cadi gúninu Conmemoración? (Biiyaʼ imagen).

¹² Maca guníʼ Jesús lu ca últimu dxi riʼ zápanu stale guendanagana casi gucaalú familia stinu laanu, sananda binni laanu, chuʼ guerra, epidemia ne xcaadxi cosa (Mat. 10:36; Mar. 13:9; Luc. 21:10, 11). Intiica de ca guendanagana riʼ zanda gucueeza ca ni laanu para cadi gúninu Conmemoración. ¿Xi huayuni ca hermanu stinu ora ridxaagalucaʼ ca guendanagana riʼ, ne ximodo huayacané Jehová laacabe yaʼ?

13. ¿Ximodo guluu Jehová ndaayaʼ guendanadxibalú ni bisihuinni Artiom para gunda biʼniʼ Conmemoración ndaaniʼ cárcel?

¹³ Ca ni nuu ndaaniʼ cárcel. Ca hermanu ni nuu ndaaniʼ cárcel pur ni runi crecaʼ, rúnicaʼ stipa guietenaláʼdxicaʼ guendaguti stiʼ Cristu. Guidúʼyanu ni bizaaca ti hermanu láʼ Artiom. Lu iza 2020, caadxi semana ante ne despué de Conmemoración, biseguyoocabe laabe ndaaniʼ ti celda de 17 metru cuadradu, ra riuu gaayuʼ binni. Neca zaqué gunda bidxélabe caadxi cosa ni iquiiñebe para ca emblema stiʼ Conmemoración ne biʼniʼ prepararbe discursu ni gutiidibe para laabe. Peru gúpabe ti guendanagana, ca compañeru stibe rigúʼbacaʼ gueza ne riniʼcaʼ diidxaʼ dxabaʼ. ¿Xi biʼniʼ Artiom yaʼ? Gúdxibe laacaʼ pa zanda guiaanacaʼ ti hora sin guiniʼcaʼ diidxaʼ dxabaʼ ne cadi cúbacaʼ gueza. Dede bidxagayaabe purtiʼ gúdxicaʼ laabe zúnicaʼ ni canábabe laacaʼ. Sicaríʼ guniʼbe: «Gudxeʼ laacabe zanda gusieneʼ laacabe ximodo raca Conmemoración». Neca gúdxicaʼ laabe qué riuuláʼdxicaʼ, peru despué de biiyacaʼ ximodo bíʼnibe ni, gunábacaʼ laabe gusiénebe laacaʼ jma de laani.

14. ¿Xi biʼniʼ xquidxi Jehová para biʼniʼ Conmemoración neca nuu pandemia stiʼ COVID-19?

¹⁴ Pandemia stiʼ COVID-19. Pur pandemia riʼ, qué ñanda nidagulisaa xquidxi Jehová para gápacaʼ Conmemoración. Peru qué nucueeza ni laanu para cadi ñúninu ni.d Ca congregación ra nuu internet gunda gúpacabe ni pur videoconferencia. Peru ¿xi gúcaxa de ca hermanu ni qué gapa internet yaʼ? Ndaaniʼ caadxi guidxi gudiʼdiʼ discursu ca lu televisión o lu radiu. Ne ndaaniʼ caadxi sucursal guca grabar discursu ca lu jma de gaayuʼ gayuaa idioma, ti zacá gapa ca hermanu ni nabeza zitu Conmemoración. Ne guyuu hermanu ni yené grabación que ra nuucabe.

15. ¿Xi rizíʼdinu de ti binni ni ricaa estudiu ni láʼ Sue?

¹⁵ Ca ni rucaalú familia stiʼ laa. Guendanagana jma nadipaʼ rapa caadxi para cadi gápacaʼ Conmemoración nga ora rucaalú familia sticaʼ laacaʼ. Nga peʼ nga ni bizaaca ti baʼdudxaapaʼ ni ricaa estudiu ni láʼ Sue. Lu iza 2021, ti dxi ante de Conmemoración, gudxi Sue hermana ni rudii estudiu laa qué zanda gapa Conmemoración purtiʼ cucaalú familia stiʼ laa. Biindané hermana que laabe Lucas 22:44. Ne bisiénebe laa ora nápanu guendanagana, ni jma galán nga chinándanu ejemplu stiʼ Jesús, guni orarnu Jehová ne gápanu confianza zacané laanu. Sti dxi que, biʼniʼ preparar Sue pan ne vinu que ne biiyabe programa especial stiʼ adoración matutina ni nuu lu jw.org. Ne dxi que biuube ndaaniʼ xcuártube ne bicaadiágabe discursu stiʼ Conmemoración lu teléfono stibe. Despué bicaabe ca diidxaʼ riʼ ra nuu hermana ni rudii laabe estudiu: «Guizáʼ guluuluʼ gana naa neegueʼ. Bineʼ guiráʼ ni gúndatiʼ para guyuaaʼ lu Conmemoración, ne gucané Jehová naa. Qué gánnaluʼ pabiáʼ nayecheʼ nuaaʼ ne rudieeʼ xquixe peʼ lii». Pa cadíʼdiluʼ ti guendanagana casi gudiʼdiʼ Sue, ¿ñee runi creluʼ zanda gacané Jehová lii la?

16. ¿Xiñee nanna dxíchinu zaguu Jehová ndaayaʼ laanu pa gúninu stipa chuunu Conmemoración? (Romanos 8:31, 32).

¹⁶ Guizáʼ rusisaca Jehová stipa ni rúninu para guietenaláʼdxinu guendaguti stiʼ Xiiñiʼ. Nanna dxíchinu zaguu Dios ndaayaʼ laanu pa gusihuínninu cudiʼnu xquixe peʼ laa pur ni biʼniʼ (biindaʼ Romanos 8:31, 32). Qué racaláʼdxinu chuʼ xiixa ni gucueeza laanu para cadi chuunu Conmemoración iza riʼ. Nga runi gúninu jma lu xhiiñaʼ Jehová tiempu Conmemoración.