Gápanu fe zabáninu ndaaniʼ ti Guidxilayú cubi

1, 2. ¿Xi caquiiñeʼ gúninu laga cabézanu gaca Guidxilayú riʼ ti paraísu?

RUDIʼNU xquixe peʼ Jehová, purtiʼ maʼ biʼniʼ prometer laanu zabáninu ndaaniʼ ti Guidxilayú cubi ra zaca puru si ni jneza (2 Ped. 3:13). Neca qué gánnanu padxí gueeda Guidxilayú cubi ca la? peru pur guiráʼ ni cazaacaʼ tiempu riʼ cahuinni maʼ cadi candaa zaca cumplir ni (Mat. 24:32-34, 36; Hech. 1:7).

² Biaʼ tiica iza zinenu ndaaniʼ xquidxi Jehová guiranu caquiiñeʼ guquídxinu fe stinu lu ca promesa riʼ. ¿Xiñee yaʼ? Purtiʼ neca naguidxi nuu fe stinu zanda gueeda guirá ni. Apóstol Pablo guníʼ ora guirá fe stinu zeeda gácani casi ti «pecadu ni ruchenda laanu nagueendaca» (Heb. 12:1). Para cadi guizaacanu ndiʼ la? caquiiñeʼ guiníʼ íquenu lu ca cosa ni rusihuinni dxandíʼ zuni Jehová Guidxilayú riʼ ti paraísu (Heb. 11:1).

3. ¿Xi zadúʼyanu lu artículo riʼ?

³ Lu artículo riʼ zadúʼyanu chonna cosa ni zacané laanu gápanu fe zuni Jehová Guidxilayú riʼ ti paraísu: 1) guiníʼ íquenu lu sacrificiu ni biʼniʼ Jesús ne Jehová pur laanu, 2) guiníʼ íquenu pabiáʼ poder napa Jehová ne 3) gúninu cosa ni guchiña laanu gaxha de Jehová. Laaca zadúʼyanu ca diidxaʼ ni gudxi Jehová Habacuc ni zuquidxi fe stinu ca dxi riʼ. Peru primeru guininu, xiñee caquiiñeʼ gaca fe stinu naguidxi.

XIÑEE CAQUIIÑEʼ GACA FE STINU NAGUIDXI

4. ¿Gunáʼ nga ca decisión ra caquiiñeʼ gaca fe stinu naguidxi?

⁴ Guiráʼ dxi ricaanu decisión ra caquiiñeʼ gaca fe stinu naguidxi. Casi tu gaca xhamígunu, xi zanda gúʼyanu o quítenu para chuʼnu nayecheʼ, pa ziuunu scuela, pa zachagananu, pa zápanu xiiñinu ne xi tipu dxiiñaʼ gúninu. Nga runi, galán guiníʼ íquenu: «¿Xi rusihuinni ca decisión ni ricaaʼ? ¿Ñee rusihuinni ca ni runeʼ cré zidiʼdiʼ si guidxilayú riʼ ne maʼ cadi candaa zaca ni ti paraísu la? o rusihuinni ca ni riníʼ iqueʼ casi ca binni ni qué gapa esperanza? (Mat. 6:19, 20; Luc. 12:16-21). Nga runi, pa gaca fe stinu naguidxi ne guni crenu zabáninu ndaaniʼ Guidxilayú cubi zacaanu decisión galán.

5, 6. ¿Xiñee caquiiñeʼ gápanu ti fe naguidxi ora cadídinu lu xiixa guendanagana? Bizeeteʼ ti ejemplu.

⁵ Laaca ridxaagalunu guendanagana ra caquiiñeʼ gaca fe stinu naguidxi. Casi ora sanándacabe laanu, gápanu xiixa guendahuará malu o guidxaagalunu xiixa ni cuee ganna laanu. Ora guidxaagalunu ca guendanagana riʼ cadi guiníʼ íquenu stúbinu zanda guni huantarnu ca ni, purtiʼ óraca nga ra jma caquiiñeʼ gaca fe stinu naguidxi para guni huantarnu ca ni ne gúninu ni ná Jehová né guendanayecheʼ (Rom. 12:12; 1 Ped. 1:6, 7).

⁶ Ora tídinu lu xiixa guendanagana zándaca guiníʼ íquenu maʼ qué zuni Jehová Guidxilayú riʼ ti paraísu. ¿Ñee riníʼ nga huaxiéʼ fe nápanu la? Coʼ. Guiníʼ íquenu ejemplu riʼ. Ora maʼ stale dxi cayaba nisaguié, zándaca guiníʼ íquenu maʼ qué zabezadxí ni peru redandá dxi ribezadxí ni ne riree gubidxa. Zaqueca rizaaca ora maʼ bireʼnu gana, zándaca zuni sentirnu maʼ qué zedandá dxi gaca Guidxilayú riʼ ti paraísu. Peru pa naguidxi fe stinu la? nánnanu zuni cumplir Dios ca ni maʼ guníʼ (Sal. 94:3, 14, 15; Heb. 6:17-19) Ne zacané ni laanu cadi gusaana de guninu ni ná Jehová primé lu xquendanabáninu.

7. ¿Xi zándaca gueeda guizaacanu pa qué chuʼnu cuidadu?

⁷ Laaca caquiiñeʼ gápanu ti fe naguidxi ora guni predicarnu. Ora rinínenu binni de ca noticia galán stiʼ Reinu, stale de laacaʼ riniʼcaʼ galán ca ni peru qué runi crecaʼ pa dxandíʼ zaca ca ni (Mat. 24:14; Ezeq. 33:32). Peru cadi gudiʼnu lugar guicá modo riníʼ íquecabe ca laanu. Ne para cadi guizaaca nga la? caquiiñeʼ guquídxinu fe stinu. Guidúʼyanu chonna modo zanda gúninu ni.

GUINÍʼ ÍQUENU LU SACRIFICIU NI BIʼNIʼ JESÚS NE JEHOVÁ PUR LAANU

8, 9. ¿Ximodo riguidxi fe stinu ora riníʼ íquenu lu sacrificiu ni biʼniʼ Jesús ne Jehová pur laanu?

⁸ Ti modo zanda guquídxinu fe stinu nga guiníʼ íquenu lu sacrificiu ni biʼniʼ Jesús ne Jehová pur laanu. Ni bíʼnicabe riʼ racaneni laanu guni crenu dxandíʼ zuni cumplir Dios guiráʼ ni maʼ guníʼ. Ora guiníʼ ique chaahuinu xiñee bidii Jehová lugar gati’ Xiiñiʼ pur laanu ne guiráʼ ni bíʼnibe para gácani, racané ni laanu gápanu fe zedandá dxi zabáninu galán ndaaniʼ Guidxilayú riʼ sin qué chuʼ dxi gátinu. ¿Xiñee riguidxi fe stinu yaʼ?

⁹ Guiníʼ íquenu xi guiráʼ biʼniʼ Jehová. Biseendabe Xiiñibe ni bizaʼbe primé, xhamígube, ni guyuunebe tobi si guibáʼ para gueeda gale lu Guidxilayú riʼ casi ti binni ni qué gapa donda. Dxi guyuu Jesús lu Guidxilayú riʼ bidxaagalú stale guendanagana, gupa xidé biʼniʼ sufrir ne guizáʼ naná modo guti. Stale nga ni gudixe Jehová pur laanu. Qué nudii Jehová lugar ñuni sufrir ne ñati Xiiñiʼ para si nibáninu galán chupa chonna si iza (Juan 3:16; 1 Ped. 1:18, 19). Cumu stale nga ni gudixe Jehová pur laanu la? laapebe zuyúbibe modo guibáninu galán ndaaniʼ Guidxilayú cubi ca.

GUINÍʼ ÍQUENU PABIÁʼ PODER NAPA JEHOVÁ

10. Casi ná Efesios 3:20, ¿xi guiráʼ zanda guni Jehová?

¹⁰ Guiropa cosa ni zacané laanu iguidxi fe stinu nga guiníʼ íquenu pabiáʼ poder napa Jehová. Nápabe stale poder para guni cumplirbe guiráʼ ni maʼ guniʼbe. Peru tiempu riʼ stale binni raca nagana para laacaʼ guni crecaʼ dxandíʼ zabáninu sin qué chuʼ dxi gátinu. Runi prometer Jehová stale cosa ni para binni qué zanda gaca, peru laabe zanda gúnibe ca ni purtiʼ laabe nga ni jma napa poder (Job 42:2; Mar. 10:27). Nga runi qué ridxagayaanu ora guiniʼbe zúnibe xiixa (biindaʼ Efesios 3:20).

11. Bizeeteʼ ti promesa ni biʼniʼ cumplir Jehová (biiyaʼ cuadru ni láʼ «Caadxi promesa ni biʼniʼ cumplir Jehová»).

¹¹ Biʼniʼ prometer Jehová ca xpinni de dxiqué xiixa ni para binni ruluíʼ qué zanda gaca. Neca maʼ huaniisi Abrahán ne Sara gudxi Jehová laacaʼ zápacaʼ ti xiiñicaʼ (Gén. 17:15-17). Laaca gúdxibe Abrahán zudiibe ca ni zá de laa layú stiʼ Canaán. Zándaca guníʼ ique ca ni zá de Abrahán, ca israelita, maʼ qué zaca cumplir ni guníʼ Jehová purtiʼ maʼ xadxí de nuucaʼ de esclavu Egipto. Peru guca cumplir ni. Ne gudiʼdiʼ si iza, gudxi Jehová Elisabet, zapa ti xiiñiʼ neca maʼ huaniisi. Ne laaca gúdxibe ti binnidxaapaʼ láʼ María, zacaxiiñiʼ ne zapa ti hombrehuiiniʼ ni zábicabe laa Xiiñiʼ Dios. Zaqué zaca cumplir ti promesa ni biʼniʼ Jehová raca stale iza ndaaniʼ jardín de Edén (Gén. 3:15).

12. ¿Xi rusiidiʼ Josué 23:14 ne Isaías 55:10, 11 laanu de poder stiʼ Jehová?

¹² Ora riníʼ íquenu lu ca promesa ni maʼ biʼniʼ Jehová ne ximodo biʼniʼ cumplirbe ca ni ridúʼyanu pabiáʼ nápabe poder. Racané ni laanu gápanu fe dxandíʼ zúnibe Guidxilayú riʼ ti paraísu (biindaʼ Josué 23:14; Isaías 55:10, 11). Nga runi, pa guni crenu ca promesa riʼ zanda gacanenu binni guni cré dxandíʼ zabáninu ndaaniʼ ti paraísu. Laaca risaca gápanu confianza dxandíʼ zuni Jehová «ti guibáʼ cubi ne ti guidxilayú cubi» (Apoc. 21:1, 5).

GÚNINU COSA NI GUCHIÑA LAANU GAXHA DE JEHOVÁ

13. ¿Ximodo riguidxi fe stinu ora riuunu reunión?

¹³ Gúninu cosa ni guchiña laanu gaxha de Jehová nga guionna modo zanda iguidxi fe stinu. Guiníʼ íquenu pabiáʼ racané ca reunión ca laanu. Guzéʼtenu ni guníʼ ti hermana láʼ Anna,b ni maʼ ziné stale iza de cayuni xhiiñaʼ Jehová de tiempu completu. Laa guníʼ: «Naca ca reunión ca casi ti ancla purtiʼ ruquidxi ca ni fe stinneʼ, lúcani siempre riete xiixa ni racané naa guieneʼ chaahueʼ ni zeeda lu Biblia dede né ora huaxiéʼ galán gutiidiʼ tuuxa hermanu discursu». Laaca riguidxi fe stinu ora runadiáganu ca comentariu ni rudii ca hermanu stinu (Rom. 1:11, 12; 10:17).

14. ¿Ximodo riguidxi fe stinu ora runi predicarnu?

¹⁴ Laaca riguidxi fe stinu ora runi predicarnu (Heb. 10:23). Barbara ti hermana ni maʼ napa jma de 70 iza de nuu ndaaniʼ xquidxi Jehová, guníʼ: «Guizáʼ riguidxi fe stinneʼ ora runeʼ predicar. Purtiʼ ora jma rinieeʼ de Jehová ne de ca promesa sicarú ni chiguni rudieeʼ cuenta jma riroobaʼ fe stinneʼ».

15. ¿Ximodo riguidxi fe stinu ora runi estudiarnu Biblia stúbinu? (Biiyaʼ ca imagen ca).

¹⁵ Sti cosa ni zuquidxi fe stinu nga guni estudiarnu Biblia stúbinu. Ti hermana láʼ Susan guníʼ ni jma huayacané laa nga quixhe ora guni estudiar Biblia. Laabe guniʼbe: «Guiráʼ domingu ruundaʼ revista Torre stiʼ ni rapa ni chiguiuunda semana zeeda ca, lunes ne martes la? racaʼ preparar para ca reunión ni raca ndaaniʼ semana ne xcaadxi dxi ca riquiiñeʼ ca ni para guneʼ estudiar Biblia stubeʼ». Cumu qué rusaana hermana riʼ ni maʼ gudixhe la? jma naguidxi ziyaca fe stiʼ. Ti hermana láʼ Irene ni maʼ ziné stale iza de nuu ra central mundial, nabé riguidxi fe stiʼ ora runi estudiar ca profecía ni zeeda lu Biblia. Laabe guniʼbe: «Guizáʼ ridxagayaa’ ora guuyaʼ cayaca cumplir ca profecía ni guníʼ Jehová casi peʼ modo maʼ guniʼbe ni».c

«DXANDÍʼ PEʼ ZEDANDÁ DXI GACA NI»

16. Xiñee laaca racané ca diidxaʼ ni gudxi Jehová profeta Habacuc laanu? (Hebreos 10:36, 37).

¹⁶ Nuu xpinni Jehová maʼ ziné stale iza de cabeza guinitilú guidxilayú malu riʼ. Zándaca para stale binni candaa peʼ ni. Peru Jehová riene xi runi sentir ca xpinni. Nga runi, gúdxibe profeta Habacuc ca diidxaʼ riʼ: «Caʼruʼ diʼ guidxiña dxi nexheʼ gaca ni bihuinni lu visión que, ne nagueenda zedadxiña dxi, qué zuchee diʼ ni. Neca ruluíʼ candaa ni, ¡gutaná! purtiʼ dxandíʼ peʼ zedandá dxi gaca ni. ¡Qué zandaa ni!» (Hab. 2:3). ¿Ñee para Habacuc si gucuá ca diidxaʼ riʼ la? o laaca riguu ca ni gana laanu tiempu riʼ? Biquiiñeʼ Jehová apóstol Pablo para gusietenalaʼdxiʼ ca diidxaʼ riʼ ca xpinni Cristu ni maʼ cabeza guibani ndaaniʼ Guidxilayú cubi (biindaʼ Hebreos 10:36, 37). Neca guni sentirnu candaa Jehová, guietenaláʼdxinu promesa stibe ni ná: «Dxandíʼ peʼ zedandá dxi gaca ni. ¡Qué zandaa ni!».

17. ¿Xi biʼniʼ ti hermana para chinanda conseju bidii Jehová Habacuc?

¹⁷ Stale xpinni Cristu maʼ yenándacaʼ conseju stiʼ Jehová, maʼ gutanacaʼ ne huayúnicaʼ ni pur stale iza. Guidúʼyanu ni bizaaca ti hermana ni láʼ Louise, bizulú bíʼnibe ni ná Jehová lu iza 1939. Sicaríʼ guniʼbe: «Qué niníʼ iqueʼ pa zusaaʼ 18 iza lu guidxilayú malu riʼ, purtiʼ guníʼ iqueʼ maʼ cadi candaa zuzulú Armagedón. Peru qué nizaaca ngue. Ngue runi, bineʼ stipa guundaʼ ca relatu stiʼ ca xpinni Dios ni gupa stale paciencia, casi Noé, Abrahán, José ne xcaadxi xpinni Jehová. Ora bineʼ ni la? bidieeʼ cuenta gupa xidé gulézacabe para guicaacabe ca ndaayaʼ ni bi’ni’ prometer Jehová laacabe. Cumu huayuneʼ stipa gatanaʼyaʼ cásica huayuni xcaadxi la? nga huayacané naa gudieeʼ cuenta maʼ cadi candaa zabáninu ndaaniʼ ti guidxilayú cubi». Nanna dxiichinu ngaca huayuni sentir ca xpinni Jehová ni huayuni ni nabe pur stale iza.

18. Pur guiráʼ ni maʼ bizáʼ Jehová, ¿ximodo racané ni laanu gánnanu dxandíʼ peʼ zedanebe ti Guidxilayú cubi?

¹⁸ Neca cadi nabáninu ndaaniʼ ti Guidxilayú cubi, peru ridúʼyanu guibáʼ, beleguí, yaga, maniʼ ne binni. Cadi maca nuu guirá’ cosa ri’, peru yanna nuucani purtiʼ Jehová bizáʼ ca ni (Gén. 1:1, 26, 27). Maʼ biʼniʼ prometer Dios zuni ti Guidxilayú cubi ne dxandíʼ peʼ zúnibe ni. Zabáninu para siempre ne maʼ qué zaca huaranu. Ora guedandá dxi ni maca gudixhe Jehová, zadúʼyanu Guidxilayú cubi ca cásica ridúʼyanu ca cosa ni maʼ bizaʼbe (Is. 65:17; Apoc. 21:3, 4).

19. ¿Xi zanda gúninu para iguidxi fe stinu?

¹⁹ Laga cabézanu guedandá Guidxilayú cubi ca, gúninu stipa iguidxi fe stinu. Nga runi, guiníʼ íquenu lu sacrificiu ni biʼniʼ Jesús ne Jehová pur laanu, guiníʼ íquenu pabiáʼ poder napa Jehová ne gúninu cosa ni guchiña laanu gaxha de Jehová. Pa gúninu ca ni bizéʼtenu riʼ la? ziuʼnu lade ca «binni ni gucuaa promesa stiʼ Dios, purtiʼ gúpacaʼ fe ne paciencia» (Heb. 6:11, 12; Rom. 5:5).