ARTÍCULO DE ESTUDIU 20
Gúninu stipa gaca ca oración stinu jma galán
«Laguxheleʼ ladxidoʼto nezalube» (SAL. 62:8).
CANCIÓN 45 «Riníʼ iqueʼ de Dios de guidubi ladxiduáʼ»
NI ZAZÍʼDINUa
Zanda guni orarnu Jehová ora tiica si para guinábanu laa gacané laanu. (Biiyaʼ párrafo 1).
1. ¿Xi cayabi Jehová laanu gúninu? (Biiyaʼ ca imagen ca).
ORA caquíʼñenu tu quixhedxí ladxidoʼno ne gabi laanu xi gúninu, ¿tu ruyúbinu yaʼ? Zanda guni orarnu Jehová purtiʼ laa peʼ cayabi laanu: «Cadi gusaana de guni orartu» (1 Tes. 5:17). Zanda guni orarnu laabe ora tiica si ne guinábanu laabe gacanebe laanu gánnanu xi gúninu lu xquendanabáninu (Prov. 3:5, 6). Ne cumu guizáʼ nachaʼhuiʼ Jehová la? qué riguixhe pabiáʼ zanda guni orarnu laa sínuque racaláʼdxibe guni orarnu laabe stale biaje.
2. ¿Xi zadúʼyanu lu artículo riʼ?
2 Naca oración ca ti regalu ni guizáʼ rusisácanu peru neca zacá nuu biaje raca nagana para laanu guinínenu Jehová purtiʼ qué gápanu tiempu. Laaca zándaca guiníʼ íquenu caquiiñeʼ gaca ca oración stinu jma galán. Peru cumu nápanu Biblia la? zacané ni laanu gánnanu xi gúninu. Lu artículo riʼ zadúʼyanu ejemplu stiʼ Jesús ni rusiidiʼ laanu ximodo zanda cueenu tiempu para guni orarnu. Ne laaca zadúʼyanu gaayuʼ cosa ni zacané laanu para gúninu ca oración stinu jma galán.
GULEE JESÚS TIEMPU PARA GUNI ORAR
3. ¿Xi nanna Jesús?
3 Nanna Jesús rusisaca Jehová ca oración ca purtiʼ ante gueedabe lu Guidxilayú riʼ, guyuube gaxha de laa. Biiyabe ximodo bicabi Bixhózebe ca oración ni biʼniʼ ca xpinni de guidubi ladxidoʼcaʼ casi: Ana, David, Elías ne xcaadxi (1 Sam. 1:10, 11, 20; 1 Rey. 19:4-6; Sal. 32:5). Nga runi, gudxi Jesús ca discípulo stiʼ cadi gusaana de guni orarcaʼ ne gápacaʼ confianza zacabi Jehová laacaʼ (Mat. 7:7-11).
4. ¿Xi ejemplu galán bisaana Jesús?
4 Guca Jesús ti ejemplu para ca discípulo stiʼ purtiʼ qué nusaana de ñuni orar. Neca nabé guyuu xhiiñabe ne zeʼ zeeda binni ra nuube siempre guleebe tiempu para guni orarbe (Mar. 6:31, 45, 46). Riásabe siadóʼ guieʼruʼ para chuʼbe stúbibe ne guiníʼnebe Bixhózebe (Mar. 1:35). Dede guyuu biaje biʼniʼ orarbe guidubi gueelaʼ para guicaabe ti decisión risaca (Luc. 6:12, 13). Ne gueelaʼ ante gátibe que biʼniʼ orarbe stale biaje, purtiʼ nánnabe maʼ bedandá ora guidxagalube guendanagana ni jma nadipaʼ chitídibe lu Guidxilayú riʼ (Mat. 26:39, 42, 44).
5. ¿Ximodo zanda chinándanu ejemplu stiʼ Jesús ora guni orarnu?
5 Rusiidiʼ ejemplu stiʼ Jesús laanu neca nabé nuu xhiiñanu, caquiiñeʼ cueenu tiempu para guinínenu Jehová. ¿Ximodo yaʼ? Zanda guiásanu siadóʼ guieʼruʼ o cueenu tiempu huaxhinni para guni orarnu. Pa gúninu ni la? zusihuínninu cudiʼnu xquixe peʼ Jehová pur regalu ni maʼ bidii laanu. Guizáʼ biecheʼ ti hermana láʼ Lynne, ora gunna zanda guiniʼné Jehová. Laa guníʼ: «Ora gunnaʼ nuuca Jehová listu para gucaadiaga naa ora tiica si guinieniáʼ laa la? gucané ni naa guuyaʼ laabe casi ti xhamiguaʼ ni guizáʼ nadxii naa. Ne gudixheʼ iqueʼ guneʼ ca oración stinneʼ jma galán». ¿Cadi dxandíʼ laaca zacá runi sentirnu la? Yanna, guidúʼyanu gaayuʼ cosa risaca ni zanda guzéʼtenu lu ca oración stinu.
GUIDÚʼYANU GAAYUʼ COSA RISACA NI ZANDA GUZÉʼTENU LU CA ORACIÓN STINU
6. Casi ná Apocalipsis 4:10, 11, ¿xi caquiiñeʼ guicaa Jehová?
6 Gusisácanu Jehová. Biiyaʼ apóstol Juan cayuni adorar 24 ancianu Jehová guibáʼ lu ti visión. Cusisácacabe Dios ne caníʼcabe: «Lii nga runi merecerluʼ guicaaluʼ gloria, honra ne poder» (biindaʼ Apocalipsis 4:10, 11). Laaca napa ca ángel ca stale razón para gusisácacaʼ Jehová. Purtiʼ nuunécabe laa guibáʼ ne runibiáʼ chaahuicabe laa. Ne pur ca cosa ni runi Jehová ruuyacabe ca cualidad ni napa ne riale de laacabe gusisácacabe laa (Job 38:4-7).
7. ¿Ximodo zanda gusisácanu Jehová lu ca oración ni rúninu?
7 Laanu laaca naquiiñeʼ gusisácanu Jehová ora guinínenu laa. Ne rúninu ni ora rábinu laabe ca cosa ni jma riuuláʼdxinu de laabe ne xiñee nadxiinu laabe. Nga runi, ora guidúʼndanu ne guni estudiarnu Biblia gúninu stipa guidúʼyanu ca cualidad ni jma riuuláʼdxinu de laabe (Job 37:23; Rom. 11:33). De racá galán gábinu laabe xi runi sentirnu ora guiníʼ íquenu de ca cualidad stibe. Laaca zanda gusisácanu Jehová ora racané laanu ne ora racanebe ca hermanu stinu. Nuu Jehová listu para gacané ne para gapa laanu (1 Sam. 1:27; 2:1, 2).
8. ¿Xi zanda guzéʼtenu lu ca oración stinu para gudiʼnu xquixe peʼ Jehová? (1 Tesalonicenses 5:18).
8 Gudiʼnu xquixe peʼ Jehová. Ora guni orarnu zanda gudiʼnu xquixe peʼ Jehová pur stale cosa (biindaʼ 1 Tesalonicenses 5:18). Gudiʼnu xquixe peʼ Jehová pur guiráʼ regalu sicarú ni nápanu purtiʼ de laabe nga zeeda ca ni (Sant. 1:17). Zanda gudiʼnu xquixe peʼ Jehová pur Guidxilayú sicarú ni nápanu riʼ, ca cosa sicarú ni maʼ bizaʼbe, pur xquendanabáninu, familia stinu, ca xhamígunu ne esperanza ni maʼ bidiibe laanu. Ne laaca zanda gudiʼnu xquixe peʼ laabe purtiʼ maʼ bidiibe laanu privilegiu de gaca xhamígunu laabe.
9. ¿Xiñee zándaca gaca nagana para laanu gudiʼnu xquixe peʼ?
9 Zándaca zaca nagana guiníʼ íquenu ca razón ni nápanu para gudiʼnu xquixe peʼ Jehová. Purtiʼ nabáninu ndaaniʼ Guidxilayú ra nuu binni ni ruyubi puru si para laa ne maʼ qué ricá íquecaʼ gudiicaʼ xquixe peʼ pur ca cosa ni nápacaʼ. Ne pa qué gápanu cuidadu zándaca gueeda guiníʼ íquenu casi laacabe ne guinábanu Dios puru si ni caquíʼñenu. Yanna, ¿xi zanda gúninu yaʼ? Cadi gusaanaʼ de gúninu stipa gácanu binni ni rudii xquixe peʼ ne gudiʼnu xquixe peʼ Jehová pur guiráʼ cosa galán ni rudii laanu (Luc. 6:45).
Ora rudiʼnu xquixe peʼ Jehová racané ni laanu guni huantarnu. (Biiyaʼ párrafo 10).
10. Pur guca hermana riʼ ti binni ni rudii xquixe peʼ, ¿ximodo gucané ni laabe? (Biiyaʼ imagen ca).
10 Ora nácanu binni ni rudii xquixe peʼ, racané ni laanu gudxíʼlunu ca guendanagana ni nápanu. Guiníʼ íquenu ni bizaaca ti hermana láʼ Kyung-sook, riete de laabe lu Torre stiʼ ni rapa 15 de enero de 2015. Gúdxicabe laabe nápabe cáncer lu pulmón. Laabe guniʼbe «Guizáʼ triste guyuaaʼ ora gunnaʼ ni. Bineʼ sentir biniteʼ guiráʼ ni napaʼ ne guizáʼ bidxibeʼ». ¿Xi gucané laabe para guni huantarbe yaʼ? Guiráʼ gueelaʼ ante gátabe riguíbabe ique lídxibe para guni orarbe Jehová, ne rudiibe xquixe peʼ laa pur gaayuʼ cosa galán ni bizaacabe dxi que. Ne ora rúnibe ni ratadxí ladxidoʼbe ne rucaa ni laabe gusihuínnibe nadxiibe Jehová. Bidii hermana riʼ cuenta racané Jehová laanu ora peʼ jma cadídinu lu guendanagana ne laaca bidiibe cuenta nápanu jma ndaayaʼ qué guendanagana. Cásica Kyung-sook, laanu laaca nápanu stale razón para gudiʼnu xquixe peʼ Jehová dede né ora cadídinu lu guendanagana. Gudiʼnu xquixe peʼ Jehová, racané ni laanu guni huantarnu ne chuʼnu nayecheʼ.
11. ¿Xiñee caquiiñeʼ ca discípulo stiʼ Jesús valor?
11 Guinábanu Jehová gudii laanu valor para guni predicarnu. Ante guibiguetaʼ Jesús guibáʼ, bisietenaláʼdxibe ca discípulo stibe caquiiñeʼ guiniʼcaʼ de laabe ndaaniʼ guidxi «Jerusalén, guidubi Judea ne Samaria, ne dede ra jma zitu lu guidxilayú» (Hech. 1:8; Luc. 24:46-48). Despué gunaaze ca líder stiʼ ca judíu Pedro ne Juan, ne yenécabe laacaʼ nezalú Sanedrín. Biʼniʼ amenazárcabe ne biʼniʼ mandarcabe laacaʼ gusaanacaʼ de guni predicarcaʼ (Hech. 4:18, 21). Yanna, guidúʼyanu xi biʼniʼ guiropaʼ apóstol riʼ.
12. Casi ná Hechos 4:29, 31, ¿xi biʼniʼ ca discípulo que?
12 Sicaríʼ bicabi Juan ne Pedro: «Pa jma jneza para Dios guzúʼbadu stiidxatu que guzúʼbadu stiidxaʼ Dios la? laatu laguuyaʼ ni racá. Peru laadu la? qué zusaanadu de guinidu de ca cosa ni maʼ bidúʼyadu ne ni maʼ binadiágadu» (Hech. 4:19, 20). Bindaa si ca xaíque stiʼ ca judíu que laacabe, guyécabe ra nuu xcaadxi discípulo que. Ne juntu biʼniʼ orárcabe Jehová gunábacabe laa gacané laacabe cadi gusaana de gúnicabe xhiiñaʼ. Guníʼcabe: «Gucané ca esclavu stiluʼ guni predicarcaʼ stiidxaluʼ né valor». Bíʼnicabe oración riʼ de guidubi ladxidóʼcabe ne bicabi Jehová laacabe (biindaʼ Hechos 4:29, 31).
13. ¿Xi rusiidiʼ ejemplu stiʼ hermanu riʼ laanu?
13 Pa guinabaʼ ca autoridad laanu gusaananu de guni predicarnu la? zanda chinándanu ejemplu stiʼ ca discípulo que. Ne nga nga ni biʼniʼ ti hermanu láʼ Jin-hyuk, biseguyoocabe laabe purtiʼ nácabe neutral. Bidiicabe laabe ti dxiiñaʼ, gúʼyabe xi caquiiñeʼ ca ni deguyoo ndaaniʼ ca celda ra cadi tuu tiica ridxiña. Peru qué zanda guiníʼnebe laacaʼ de ni rusiidiʼ Biblia. Ngue runi gunábabe Jehová gudii valor ne gacané laabe guni predicarbe ca ni deguyoo que (Hech. 5:29). Laabe guniʼbe: «Bicabi Jehová ca oración stinneʼ, bidiibe naa valor ne guendabiaaniʼ ni caquiiñeʼ. Zacá bizuluáʼ bidieeʼ stale de laacabe estudiu de gaayuʼ si minutu. Ne guiráʼ gueelaʼ rucaaʼ carta para gudieeʼ laacabe sti dxi que». Cásica biʼniʼ hermanu Jin-hyuk laanu laaca zanda guinábanu Jehová valor ne guendabiaaniʼ para cadi gusaana de guni predicarnu ne zanda chuʼnu seguru zacanebe laanu.
14. ¿Xi zacané lii gudxiiluluʼ ca guendanagana ni nápaluʼ? (Salmo 37:3, 5).
14 Guinábanu Jehová gacané laanu para gudxíʼlunu ca guendanagana ca. Stale de laanu cadxaagalú guendanagana, nuu tu laa huará, canazanándacabe laa o guti tuuxa familia stiʼ. Ne jmaruʼ si nagana nabáninu pur ca pandemia ne ca guerra ca. Nga runi, bixheleʼ ladxidoʼloʼ nezalú Jehová ne gudxi laabe guiráʼ ni cayuni sentirluʼ cásica rúniluʼ ni né ti xhamíguluʼ. Zanda chuʼluʼ seguru zacané Jehová lii (biindaʼ Salmo 37:3, 5).
15. ¿Ximodo racané oración laanu gudxíʼlunu ca guendanagana ni nápanu? Bizeeteʼ ti ejemplu.
15 Ora nápanu guendanagana cadi naquiiñeʼ gusaananu de guni orarnu, purtiʼ zacané ni laanu guni huantarnu (Rom. 12:12). Nanna Jehová guiráʼ ni rizaaca ca xpinni «ne rucaadiágabe ora guinábacaʼ gacanebe laacaʼ» (Sal. 145:18, 19). Guzéʼtenu ni bizaaca ti precursora de 29 iza láʼ Kristie, málasi bizulú guca huarabe dede gúpabe depresión. Ne laaca bihuinni napa jñaabe ti guendahuará malu. Kristie guníʼ: «Guiráʼ dxi rinabaʼ Jehová gacané naa gudxieeluáʼ ca guendanagana riʼ. Bineʼ stipa guneʼ ca cosa ni ruchiiñaʼ naa gaxha de Jehová, qué ñaadxaʼ ca reunión ca ne gupaʼ estudiu personal». Laaca guniʼbe: «Gucané ca oración ca naa ora peʼ jma caquiiñeʼ ni, biiyaʼ nuu Jehová gaxha de naa ne ngue gudixhedxí ni ladxiduáʼ. Ne neca qué niree ca guendanagana que, bicabi Jehová ca oración stinneʼ ra bidiibe naa guendariuudxi». Rusietenalaʼdxiʼ ni bizaacaʼ hermana riʼ laanu «nanna Jehová gulá ca binni ni runi adorar laa de guendanagana» (2 Ped. 2:9).
Para ganda gucáʼnanu ca tentación ca, 1) caquiiñeʼ guinábanu Jehová gacané laanu, 2) gúninu guiráʼ ni nuu lu nanu ne 3) chuʼnu jma gaxha de Jehová. (Biiyaʼ párrafo 16 ne 17).
16. ¿Xiñee caquíʼñenu gacané Jehová laanu para gucáʼnanu ca tentación ca?
16 Guinábanu Jehová gacané laanu gucáʼnanu ca tentación ca. Cumu nácanu binni ruchee la? caquiiñeʼ gucáʼnanu ca tentación ni rucaa laanu gúninu cosa malu. Ne runi Binidxabaʼ guiráʼ ni nuu lu náʼ para gaca ni jma nagana para laanu. ¿Ximodo rúnibe ni yaʼ? Riquiiñebe ca entretenimientu malu nuu yanna para guni biidiʼ ca ni xquendabiaaninu. Nga riguu cosa dxabaʼ ndaaniʼ íquenu ne maʼ qué riuʼnu nayá nezalú Jehová dede zándaca gucaa ni laanu guni cometernu xiixa pecadu (Mar. 7:21-23; Sant. 1:14, 15).
17. ¿Xiruʼ caquiiñeʼ gúninu para gucáʼnanu ca tentación ca? (Biiyaʼ imagen ca).
17 Caquiiñeʼ gacané Jehová laanu purtiʼ qué zanda gudxíʼlunu ca tentación ca stúbisinu. Lu oración ni bisiidiʼ Jesús que guníʼ: «Cadi gudiiluʼ lugar guiábadu lu tentación, sínuque bilá laadu de lu náʼ Binidxabaʼ» (Mat. 6:13). Racalaʼdxiʼ Jehová gacané laanu peru caquiiñeʼ guinábanu ni laabe. Ne cadi nga si, laaca caquiiñeʼ gucáʼnanu ca cosa ni cadi jneza ni riníʼ ique binni guidxilayú (Sal. 97:10). Nga runi, gúninu stipa guni estudiarnu Biblia, chuunu guiráʼ ca reunión ca ne cadi gusaana de guni predicarnu. Jehová peʼ cayabi laanu qué zudii lugar gueeda xiixa prueba luguianu ni qué zanda guni huantarnu (1 Cor. 10:12, 13).
18. ¿Xi caquiiñeʼ gúninu?
18 Ca dxi jma nagana riʼ, caquiiñeʼ guni orarnu Jehová para cadi guixélenu de laa. Racaláʼdxibe guxhélenu ladxidoʼno nezalube (Sal. 62:8) Nga runi, guiráʼ dxi caquiiñeʼ cueeluʼ tiempu para guni orarluʼ laabe. Bisisaca ne bidii xquixe peʼ laabe pur guiráʼ ni rúnibe, laaca gunabaʼ laabe gudiibe lii valor para guni predicarluʼ ne gacanebe lii gudxiiluluʼ ca guendanagana ni nápaluʼ ne gucaanaluʼ ca tentación ca. Cadi gudiiluʼ lugar chuʼ ni gucueeza lii para guni orarluʼ Jehová. Yanna, ¿ximodo ricabi Jehová ca oración stinu yaʼ? Lu stiʼ artículo ca zadúʼyanu ni.
CANCIÓN 42 Oración stiʼ xpinni Dios
a Racaláʼdxinu guni orarnu Jehová de guidubi ladxidoʼno casi ñaca nucaʼnu ti carta ra nuu ti xhamígunu ni nadxiinu stale. Peru nuu biaje zándaca gaca ni nagana para laanu purtiʼ qué gápanu tiempu o qué gánnanu xi gábinu laabe. Zacané artículo riʼ gánnanu ximodo zanda gudxíʼlunu guiropaʼ guendanagana riʼ.