¡Zanda gúniluʼ ni jneza!: Guiranu caquiiñeʼ guiníʼ íquenu ni

Xi rúniluʼ ora racaláʼdxiluʼ chindaluʼ ti lugar ni qué runibiaʼluʼ.

1. 1. Stúbiluʼ ruyúbiluʼ xi neza guicaaluʼ.

2. 2. Rinándaluʼ xcaadxi binni ni riníʼ íqueluʼ runibiáʼ neza ca.

3. 3. Riquiiñeluʼ xiixa ni nánnaluʼ qué zaguite lii, casi ti GPS o ti mapa o rinabadiidxaluʼ ti xhamíguluʼ ni runibiáʼ neza ca.

Pa gúniluʼ primé ne guiropa ca la? zindaluʼ paxaraa, peru cadi ra racaláʼdxiluʼ. Yanna, pa gúniluʼ últimu ni bizéʼtenu ca la? gunna dxichi zindaluʼ ra racaláʼdxiluʼ.

Guendanabani stiʼ binni zeeda gácani casi ora ziuunu ti lugar ne guiranu racaláʼdxinu guidxélanu neza ni chiné laanu ra racaláʼdxinu chindanu, ne laani nga guibáninu nayecheʼ. Nabé risaca guicaanu decisión jneza pa racaláʼdxinu chindanu ra maʼ gudixhe íquenu ne caquíʼñenu xiixa ni gabi laanu ximodo gúninu ni.

Dxandíʼ, stale de ca decisión ricaanu guiráʼ dxi, qué ruchaacani guendanabani stinu, peru nuu caadxi de laacani zanda guchaacani guendanabani stinu. Laacani nga ca decisión ni ricaanu pur ni rábinu jneza o ni cadi jneza. Ne purtiʼ zanda guchaa ca decisión ca guendanabani stinu ne guendanabani stiʼ familia stinu, ne zanda gácani xiixa galán para laacabe o xiixa ni guniná laacabe. Ne lu ca ni chiguzéʼtenu raríʼ nga ricaa binni decisión risaca:

• ca relación sexual ne guendaxheelaʼ

• gaca binni honradu, bueltu ne dxiiñaʼ

• modo guiniisi xiiñiʼ binni

• modo gaca llevarnu binni

¿Ximodo zanda ganna dxíchiluʼ jneza ca decisión ni guicaaluʼ lu ca tema ni bizéʼtenu ca yaʼ? ¿Ximodo zanda gánnaluʼ pa zanda gacané ca decisión ca lii né familia stiluʼ guibánitu nayecheʼ yaʼ?

Ne laaca caquiiñeʼ guiníʼ íquenu ndiʼ: «¿Xi zanda gacané naa guicaaʼ ti decisión jneza?».

Zacané revista riʼ lii gánnaluʼ xiñee Biblia nga libru ni jma galán para gacané lii gánnaluʼ xii nga ni jneza, ne ora maʼ biziidiluʼ xii nga ni jneza la? zuuyaluʼ ximodo zanda gacaneni lii lu guendanabani stiluʼ.