Xi rizíʼdinu de milagru ni biʼniʼ Jesús ra bisidale pan para guyaanaʼ stale binni

1. ¿Xiñee nabé risaca pan tiempu gucuá Biblia?

TIEMPU gucuá Biblia pan nga ni nabé gudó binni (Gén. 14:18; Luc. 4:4). Ne pur nga nuu biaje riquiiñeʼ Biblia ni para guiníʼ de guendaró (Mat. 6:11; Hech. 20:​7, nota de estudiu). Nga runi biquiiñeʼ Jesús pan para guni chupa de ca milagru ni nabé runibiaʼnu (Mat. 16:​9, 10). Guidúʼyanu tobi de ca milagru ni bíʼnibe ni riete lu libru stiʼ Juan capítulo 6 ne guidúʼyanu xi zanda guizíʼdinu de laani tiempu riʼ.

2. ¿Pora nga biquiiñeʼ stale binni ni gó?

² Ora biluxe ca discípulo de yeguni predicarcaʼ gudxiʼbané Jesús laacaʼ lu ti canuá ne gudíʼdicaʼ nisadóʼ ni nuu Galilea. Yenebe laacaʼ ti lugar ra gastiʼ tu guchiiñaʼ laacaʼ para guiziiláʼdxicaʼ, riaanani gaxha de guidxi Betsaida (Mar. 6:​7, 30-32; Luc. 9:10). Peru málasi bedandá stale binni para gúʼyacaʼ Jesús. ¿Xi bíʼnibe yaʼ? Qué nucaanabe laacaʼ, sínuque gúcabe nachaʼhuiʼ, guleebe tiempu para bisiidibe laacaʼ de Reinu stiʼ Dios ne bisiándabe ca binni huará. Cumu maʼ cayaca huadxí la? guyuu ca discípulo que xizaa pa zadxela ca binni que ni gocaʼ. Zándaca nuu de laacaʼ zinecaʼ ti ndaa guendaró peru jma stale de laacaʼ naquiiñeʼ checaʼ chisicaʼ ni gocaʼ (Mat. 14:15; Juan 6:​4, 5). Peru ¿xi zuni Jesús pur laacabe yaʼ?

BÍʼNIBE TI MILAGRU PARA BIDIIBE LAACAʼ PAN

3. ¿Xi biʼniʼ Jesús ora biʼyaʼ maʼ caquiiñeʼ gó ca binni que? (Biiyaʼ imagen ni zeeda lu portada).

³ Gudxi Jesús ca apóstol stiʼ: «Cadi caquiiñeʼ diʼ chécabe. Lagudii ni gócabe» (Mat. 14:16). Ruluíʼ guizáʼ nagana ndiʼ purtiʼ nuu biaʼ gaayuʼ mil hombre ne pa ugábanu gunaa ne xcuidi la? zándaca biaʼ quince mil binni nuu raqué (Mat. 14:21). Guníʼ Andrés: «Nuu ti hombrehuiiniʼ raríʼ napa gaayuʼ pan de cebada ne chupa bendahuiiniʼ. Peru ¿zugaanda xa ndiʼ para guiráʼ ca binni riʼ?» (Juan 6:9). Nabé ró binni pan de cebada ne baratu ni. Ne zándaca maʼ nabidxi ca bendahuiiniʼ que ne naxiicaʼ, neca zaqué qué zugaanda diʼ cani para gó guiráʼ binni que.

4. ¿Xi rusiidiʼ Juan 6:​11-13 laanu? (Biiyaʼ imagen ca).

⁴ Cumu racalaʼdxiʼ Jesús gaca nachaʼhuiʼ né laacabe la? gunábabe ca binni que cuicaʼ pur grupu lu guixi gáʼ que (Mar. 6:​39, 40; biindaʼ Juan 6:​11-13). Lu Biblia riete bidii Jesús xquixe peʼ Bixhoze pur ca pan ne ca bendahuiiniʼ que. Ne biaʼsi nga ni bíʼnibe purtiʼ Dios nga bidii guendaró que. Ndiʼ racané laanu chinándanu ejemplu stiʼ Jesús ne guni orarnu ante guidoʼno pa nuunu stúbinu o pa nuunenu xcaadxi binni. Despué biʼniʼ mandar Jesús quíʼzicabe guendaró que, ne gudó ca binni que dede bidxá ndaanicaʼ ne biaana sobra guendaró que ne qué niná Jesús nusáʼbicabe ni. Ngue runi biʼniʼ mandarbe gutópacabe ni biaana sobra que zándaca para iquiiñeʼ ni sti ora. Ni biʼniʼ Jesús riʼ rusiidiʼ ni laanu iquíʼñenu ca cosa ni nápanu jneza. Zanda iquiiñeʼ ca ni napa xiiñiʼ ejemplu riʼ para gusiidicaʼ ca xiiñicaʼ guni orarcaʼ, gácacaʼ nachaʼhuiʼ ra guidxagalucaʼ xcaadxi ne gudiicaʼ de guidubi ladxidoʼcaʼ.

5. Ora biʼyaʼ ca binni que ca milagru ni biʼniʼ Jesús, ¿xi gucaláʼdxicaʼ ñúnicaʼ, peru xi biʼniʼ Jesús?

⁵ Nabé bidxagayaa binni pur modo bisiidiʼ Jesús ne ca milagru ni biʼniʼ. Nánnacabe biʼniʼ prometer Moisés zuseendaʼ Dios ti profeta nabé risaca. Ngue runi zándaca guníʼ íquecabe pa Jesús nga profeta que (Deut. 18:​15-18). Pa zacá ni la? zándaca biʼniʼ crécabe zaca Jesús ti hombre ni zuni mandar jneza ne zuyaanaʼ guidubi guidxi que. Rihuinni dxíchica xi pur gucalaʼdxiʼ ca binni que gucaacaʼ laabe gácabe Rey (Juan 6:​14, 15). Pa ñaca nudii Jesús lugar ñúnicabe laa Rey la? maʼ ñuu lu política stiʼ ca judíu, ni nuu lu náʼ ca romanu, peru qué ñúnibe ni. Relatu ca ná nagueendaca «gudxiʼbaʼ [Jesús] lu dani que». Neca gucaláʼdxicabe ñúnicabe laabe Rey peru qué ñuube lu política. ¡Guizáʼ galán ni rusiidiʼ ni laanu!

6. ¿Ximodo zanda chinándanu ejemplu stiʼ Jesús? (Biiyaʼ imagen ca).

⁶ Neca qué zucaacabe laanu gúninu xiixa milagru para gutálenu pan o para gusiándanu xiixa guendahuará. Ne laaca qué zucaacabe laanu gácanu rey o guni mandarnu ti guidxi. Peru ni zándaca gúnicabe nga gucaacabe laanu guni votarnu pur tuuxa ni laacabe riníʼ íquecabe zanda guni chaahuiʼ ca guendanagana ni nuu. Peru nabé galán ejemplu ni bisaana Jesús purtiʼ qué ninabe ñuube lu política ne despué bizeetebe: «Cadi naca Reinu stinneʼ parte de guidxilayú riʼ» (Juan 17:14; 18:36). Laanu ca xpinni Cristu galán nga guiníʼ íquenu modo guníʼ ique Jesús ne chinándanu ejemplu stiʼ. De guidubi ladxidoʼno runi apoyarnu Reinu stiʼ Dios, rusíʼdinu binni de laani ne runi orarnu gueeda Reinu stiʼ Dios (Mat. 6:10). Yanna, guidúʼyanu xiruʼ zanda guizíʼdinu de milagru ni biʼniʼ Jesús ra bitale ca pan que.

«SIGNIFICADU NAPA MILAGRU STIʼ CA PAN QUE»

7. ¿Xi sti milagru biʼniʼ Jesús, ne xi biʼniʼ ca apóstol que? (Juan 6:​16-20).

⁷ Despué de biyaanaʼ Jesús ca binni que, gúdxibe ca apóstol stibe guibiguétacaʼ Capernaúm lu canuá ne óraque zebe lu dani para cadi gúnicabe laabe Rey (biindaʼ Juan 6:​16-20). Ora zeʼ ca discípulo que lu canuá, málasi biasa ti tormenta naroʼbaʼ ne cadxelasaa ca ola que ni ne cundubi ti bi guizáʼ reciu. Óraque guzá Jesús lu nisa, zeʼ ra nuucabe ne gúdxibe Pedro laaca saʼ lu nisa que (Mat. 14:​22-31). Ora gudxiʼbaʼ Jesús lu canuá, biaanadxí bi que, guizáʼ cadxagayaa ca discípulo que ne guniʼcaʼ: «Dxandíʼ, lii nga Xiiñiʼ Dios» (Mat. 14:33).a Neca zacá cadi cayénecabe xi riníʼ milagru riʼ ne ni bíʼnibe ra bitalebe guendaró que, peru Marcos bizeeteʼ cadxagayaa ca discípulo que purtiʼ «caʼruʼ guiénecabe significadu napa milagru stiʼ ca pan que, dede cadi cugaanda xquendabiaanicabe guiene ni guca que» (Mar. 6:​50-52). Ni dxandíʼ la? qué ñene chaahuicabe pabiáʼ poder bidii Jehová Jesús para guni milagru. Peru despué zuzeeteruʼ Jesús de milagru ra bitale ca pan que ne zacá zusiidibe laanu sti cosa nabé risaca.

8, 9. ¿Xiñee yeyubi ca binni que Jesús? (Juan 6:​26, 27).

⁸ Ni jma racalaʼdxiʼ ca binni ni biyaanaʼ Jesús que nga guidxá ndaanicaʼ ne gápacaʼ ni caquiiñecaʼ. Ngue runi, sti dxi que ora bíʼyacaʼ maʼ qué guinni Jesús ne ca discípulo stiʼ gudxíʼbacaʼ canuá ni zeeda de Tiberíades ne zecaʼ Capernaúm ziyúbicaʼ Jesús (Juan 6:​22-24). Peru ¿ñee bíʼnicabe ni purtiʼ racaláʼdxicabe guiziidicabe jma de Reinu stiʼ Dios la? Rihuinni dxíchica cadi zacá ni, ni racalaʼdxisícabe nga gápacabe ni gócabe. ¿Ximodo nánnanu ni yaʼ?

⁹ Guidúʼyanu xi bizaaca ora bidxela ca binni que Jesús gaxha de Capernaúm. Gudxi Jesús laacabe ni racalaʼdxisícabe nga gápacabe ni caquiiñecabe ne laaca gúdxibe laacaʼ «gudoto ca pan que dede bidxá ndaanitu» né «guendaró ni raca feu». Ne guluube gana laacaʼ gúnicaʼ dxiiñaʼ para gápacaʼ «guendaró ni qué raca feu ne rudii guendanabani ni qué zaluxe» (biindaʼ Juan 6:​26, 27). Ne laaca gudxi Jesús laacabe Bixhoze nga zudii laacabe guendaró que. Ngue runi guizáʼ bidxagayaacabe ora gúnnacabe zanda gudii guendaró que laacabe guendanabani ni qué zaluxe. Peru ¿xi guendaró que ne ximodo zanda gápacabe ni yaʼ?

10. ¿Xii nga «xhiiñaʼ Dios» ni caquiiñeʼ guni ca binni que para gápacaʼ guendanabani ni qué zaluxe?

¹⁰ Ruluíʼ si guníʼ ique ca judíu que caquiiñeʼ gúnicaʼ xiixa dxiiñaʼ para guicaacaʼ guendaró que, zándaca caníʼ íquecabe ca dxiiñaʼ ni riete lu Ley stiʼ Moisés. Peru gudxi Jesús laacabe: «Ndiʼ nga xhiiñaʼ Dios: lagusihuinni nápatu fe naa, purtiʼ laa biseendaʼ naa» (Juan 6:​28, 29). Para guicaacabe «guendanabani ni qué zaluxe» caquiiñeʼ gápacabe fe binni ni biseendaʼ Dios. Ne Jesús peʼ maʼ guníʼ de laani (Juan 3:​16-18, 36). Ne zaníʼrube xi caquiiñeʼ gúnicaʼ para guicaacaʼ guendanabani ni qué zaluxe (Juan 17:3).

11. ¿Ximodo bisihuinni ca judíu jma cá íquecaʼ guicaacaʼ pan para gocaʼ? (Salmo 78:​24, 25).

¹¹ Ora gudxi Jesús ca judíu que de dxiiñaʼ nacubi stiʼ Dios, qué ñuni crecaʼ. Ngue runi gunabadiidxacaʼ laabe: «¿Xi milagru chigúniluʼ para guidúʼyadu ne guni credu lii?» (Juan 6:30). Despué bizeetecaʼ gucuaa ca bixhozebiidacaʼ maná tiempu bibani Moisés ni zeeda gaca casi pan (Neh. 9:15; biindaʼ Salmo 78:​24, 25). Rihuinni dxíchica cá íquecabe guicaacabe pan para gócabe. Ngue runi qué ninábacabe Jesús nusiene laacabe xii nga pan ni dxandíʼ zeeda de guibáʼ, ni zeeda gaca casi maná ni biaba de guibáʼ ni rudii guendanabani (Juan 6:32). Jma gucuá íquecabe ca cosa ni caquiiñecabe que ca cosa ni cusiidiʼ Jesús laacabe para ganda guicaacabe guendanabani ni qué zaluxe. ¿Xi zanda guizíʼdinu de relatu riʼ yaʼ?

NI JMA RISACA PARA LAANU

12. ¿Ximodo bisihuinni Jesús xii nga ni jma risaca?

¹² Lu Juan capítulo 6 riete ti cosa nabé risaca gúninu, laani nga: guyúbinu chuʼnu gaxha de Dios. Maca bizeeteʼ Jesús de laani ora bicaanabe tobi de ca tentación ni gudixhe Binidxabaʼ nezalube (Mat. 4:​3, 4). Ne lu Sermón del Monte que guniʼbe risaca gánnanu caquíʼñenu de Dios (Mat. 5:3). Nga runi galán guiníʼ íquenu ndiʼ: «¿Ñee rusihuinneʼ pur modo nabaneʼ jma risaca para naa chuaaʼ gaxha de Dios que gapaʼ ca cosa ni caquiiñeʼ siaʼ la?».

13. a) ¿Xiñee cadi malu guiéchenu ora guidoʼno? b) ¿Xi conseju bidii Pablo naquiiñeʼ chinándanu? (1 Corintios 10:​6, 7, 11).

¹³ Dxandíʼ, cadi malu nga guinábanu Dios ca cosa ni caquíʼñenu ne guiechenenu cani (Luc. 11:3). Ruzeeteʼ Biblia ora runi binni dxiiñaʼ nadipaʼ para gapa ni gó ne ni gueʼ rusiécheni laa ne zeedacani de Dios ni dxandíʼ (Ecl. 2:24; 8:15; Sant. 1:17). Peru caquiiñeʼ gápanu cuidadu para cadi gaca ca cosa material ca ni jma risaca lu xquendanabáninu. Nga nga ni bisietenalaʼdxiʼ apóstol Pablo ca xpinni Cristu ni bibani tiempu ra mayaca guinitilú guidxi Jerusalén ne templu stiʼ. Bicaabe ra nuucaʼ ne gúdxibe laacaʼ ca cosa cadi jneza biʼniʼ guidxi Israel, casi ni guca gaxha de dani Sinaí. Ne gúdxibe laacaʼ cadi guni desearcaʼ «cosa malu» cásica biʼniʼ ca israelita (biindaʼ 1 Corintios 10:​6, 7, 11). Ne cumu ni jma gucuá íquecabe nga gócabe la? qué nusisácacabe ca milagru ni biʼniʼ Jehová para gudii ni gócabe. Ngue runi beeda gácani ti «cosa malu» para laacabe (Núm. 11:​4-6, 31-34). Ne ngueca nga ni bíʼnicabe ora gudócabe, güéʼcabe ne guyuucabe nayecheʼ ora biʼniʼ adorárcabe yuzehuiiniʼ de oro que (Éx. 32:​4-6). Bizeeteʼ Pablo de laani para quixhená ca xpinni Cristu ni nabani tiempu mayaca guinitilú Jerusalén ne templu stiʼ, ni zazaaca lu iza 70 despué de ca dxi stiʼ Jesús. Laanu laaca nabáninu ra mayaca guinitilú guidxilayú malu riʼ nga runi nabé risaca chinándanu conseju ni bidii Pablo.

14. ¿Xi ruzeeteʼ Biblia de guendaró ni ziuu lu guidxilayú cubi ca?

¹⁴ Ora bisiidiʼ Jesús laanu guinábanu Dios «dané laadu pan para yannadxí», laaca caniʼbe de tiempu ra gaca ni ná Dios «ndaaniʼ guidxilayú, cásica raca ni guibáʼ» (Mat. 6:​9-11). ¿Ximodo riníʼ íqueluʼ zaca tiempu ca yaʼ? Biblia cayabi laanu tiempu gaca ni racalaʼdxiʼ Dios lu Guidxilayú riʼ ziuu stale guendaró galán. Lu Isaías 25:​6-8 cayuni prometer Jehová ora guni mandar Reinu stiʼ ziuu stale guendaró lu guidxilayú riʼ. Ne lu Salmo 72:16 ná «ziuu stale biidxiʼ lu guidxilayú; lu ca dani ca jma stale ziuu». Yanna lii yaʼ, ¿ñee huaníʼ íqueluʼ maʼ caquiiñeluʼ biidxiʼ ca para gúniluʼ pan ni jma riuuláʼdxiluʼ goloʼ o caquiiñeluʼ ni para gúniluʼ xiixa guendaró ni qué huayúniluʼ la? ¿Ñee huaníʼ íqueluʼ cayoloʼ ca uva ni bidii lubáʼ uva ni bizuhuaaluʼ la? (Is. 65:​21, 22). Ne cadi lii si nga cacaaluʼ guiráʼ ca ndaayaʼ ca, sínuque guiráʼ ca ni nuu racá.

15. ¿Xi caquiiñeʼ guiziidiʼ ca ni guiasa de lade gueʼtuʼ? (Juan 6:35).

¹⁵ (Biindaʼ Juan 6:35). Yanna, ¿xi zazaaca ca binni ni gudó pan ne benda ni bitale Jesús ra biʼniʼ milagru que yaʼ? Ora guiasa binni de lade gueʼtuʼ zándaca zunibiaʼnu chupa chonna de laacaʼ. Zándaca ziásacabe de lade gueʼtuʼ neca dxiqué qué nusihuínnicabe fe (Juan 5:​28, 29). Nga runi caquiiñeʼ guiziidicabe xi riníʼ ca diidxaʼ guníʼ Jesús «naa nga pan de guendanabani. Tu gueeda ra nuaaʼ qué ziuu dxi guindaana». Caquiiñeʼ gápacabe fe sacrificiu ni biʼniʼ Jesús para gulá binni. Ni caninu nga caquiiñeʼ gápacabe fe bidiibe xquendanabánibe pur laacaʼ. Nga runi zata chaahuiʼ dxiiñaʼ ni runi guiráʼ ca xpinni Dios para ganda guiziidiʼ ca ni guiasa de lade gueʼtuʼ ne ca ni gale ndaaniʼ guidxilayú cubi. ¡Guizáʼ nayecheʼ ziuʼnu ra gacanenu gaca dxiiñaʼ riʼ! Zadxá tipa ladxidoʼno jma que nidoʼno pan. Ne ni jma zasaca para laanu nga chuʼnu gaxha de Jehová.

16. ¿Xi zazíʼdinu lu stiʼ artículo ca?

¹⁶ Lu artículo riʼ maʼ bidúʼyanu ti ndaa de relatu ni riete lu Juan capítulo 6. Peru nuuruʼ stale cosa ni bisiidiʼ Jesús de «guendanabani ni qué zaluxe». Dxiqué la? nabé guyuulaʼdxiʼ ca judíu gunadiaga de tema riʼ, ne ngaca nga caquiiñeʼ gúninu yanna. Lu sti artículo ca zazíʼdirunu ni riete lu Juan capítulo 6.