Guizíʼdinu guiníʼ íquenu modo riníʼ ique Jehová ne Jesús

1, 2. a) ¿Xi riníʼ gannaxhiinu Jehová? b) ¿Ximodo bisihuinni Jesús nadxii Jehová né guidubi xquendabiaaniʼ?

GUNÍʼ JESÚS gunáʼ nga mandamientu jma risaca zeeda lu Ley stiʼ Moisés, ora guníʼ: «Gunnaxhii Jehová Dios stiluʼ de guidubi ladxidoʼloʼ, guidubi xhiálmaluʼ, guidubi xquendabiaaniluʼ ne guiráʼ stipa stiluʼ» (Mar. 12:30). Nga runi caquiiñeʼ gannaxhiinu Jehová de guidubi ladxidoʼno ne guiráʼ ni nápanu. Ládecani nuu ca cosa ni riuuláʼdxinu, ni runi sentirnu ne stipa stinu. Ne laaca ximodo iquíʼñenu xquendabiaaninu, ni caninu raríʼ nga modo riníʼ íquenu. Guendarannaxhii ni nápanu Jehová nga rucaa laanu gúninu stipa guiníʼ íquenu cásica riníʼ íquebe. Dxandíʼ, qué zanda guiene chaahuinu ximodo riníʼ ique Jehová. Peru ti cosa ni zanda gacané laanu nga guni estudiarnu «ximodo riníʼ ique Cristu», purtiʼ laa bisihuinni ximodo riníʼ ique Bixhoze (1 Cor. 2:16 ne nota de estudiu «nosotros sí tenemos la mente de Cristo»).

² Gunnaxhii Jesús Jehová de guidubi xquendabiaaniʼ. Nánnabe xi racalaʼdxiʼ Dios gúnibe ne de guidubi ladxidoʼbe gudixhe íquebe gúnibe ni ná neca nánnabe zacanabe. Ne cumu racaláʼdxibe gusiéchebe Bixhózebe la? qué nudiibe lugar ñuu xiixa ni nucueeza laabe.

3. ¿Xi biziidiʼ apóstol Pedro de Jesús, ne xi gúdxibe ca xpinni Cristu gúnicaʼ? (1 Pedro 4:1).

³ Cumu guyuu Pedro ne xcaadxi apóstol gaxha de Jesús la? gunda biiyacabe ne biziidicabe ximodo riníʼ íquebe. Ora bicaa Pedro primé carta pur espíritu santu, guluube gana ca xpinni Cristu guiníʼ íquecaʼ cásica riníʼ ique Cristu (biindaʼ 1 Pedro 4:1). Ora bicaa Pedro diidxaʼ «Lachuu dispuestu», biquiiñebe diidxaʼ ni riquiiñecabe para gábicabe ca soldadu chuʼcaʼ listu né ca guiibaʼ sticaʼ para checaʼ lu guerra. Zacá bisiidibe ora rinándanu modo riníʼ ique Jesús nácani casi ti guiibaʼ nadipaʼ ni nápanu para gudxíʼlunu guiráʼ ca deseu malu stinu ne guidxilayú ni naaze Binidxabaʼ (2 Cor. 10:​3-5; Efes. 6:12).

4. ¿Xi zazíʼdinu lu artículo riʼ?

⁴ Lu artículo riʼ zadúʼyanu modo riníʼ ique Jesús ne ximodo zanda chinándanu ejemplu stibe. Zadúʼyanu ximodo zanda guizíʼdinu, primé, guiníʼ íquenu cásica riníʼ ique Jehová, guiropa, gácanu humilde ne guionna, gácanu binni nuu xpiaaniʼ.

GUIZÍʼDINU GUINÍʼ ÍQUENU CÁSICA RINÍʼ IQUE JEHOVÁ

5. Bizeeteʼ padxí qué nusihuinni Pedro riníʼ ique cásica riníʼ ique Jehová.

⁵ Ti biaje bisihuinni Pedro maʼ gadxé modo riníʼ ique de modo riníʼ ique Jehová. Gudxi Jesús ca apóstol stiʼ napa xidé cheʼ Jerusalén ne zanaazeʼ ca xaíque yuʼduʼ laa, zuninacaʼ ne zuuticaʼ laabe (Mat. 16:21). Nanna Pedro Jesús nga Mesías ni nexheʼ gueeda, ni chigulá xquidxi Dios, ngue runi zándaca guca nagana guiénebe zudii Jehová lugar guuticabe Jesús (Mat. 16:16). Yenebe Jesús ti ladu ne gúdxibe laa: «¡Biá lii, Señor! Qué ziuu dxi guizaacaluʼ nga» (Mat. 16:22). Cumu qué ñuuyaʼ Pedro ca cosa que modo ruuyaʼ Jehová cani la? bisihuínnibe qué riníʼ íquebe cásica riníʼ ique Jesús.

6. ¿Ximodo bisihuinni Jesús riníʼ ique cásica riníʼ ique Jehová?

⁶ Riníʼ ique Jesús cásica riníʼ ique Bixhoze ni nuu guibáʼ. Gúdxibe Pedro: «¡Guyuu neza decheʼ, Binidxabaʼ! Cuchiiñaluʼ lu neza stinneʼ, purtiʼ cadi caníʼ íqueluʼ casi riníʼ ique Dios, sínuque casi riníʼ ique binni» (Mat. 16:23). Nanna Jesús para guni ni racalaʼdxiʼ Jehová caquiiñeʼ gacaná ne gatiʼ. Ngue runi, bicaanabe conseju ni bidii Pedro, neca guníʼ ique Pedro jneza ngue ni cayabi laabe purtiʼ racalaʼdxiʼ gacané laabe. Zaqué biene apóstol Pedro caquiiñeʼ guiníʼ ique cásica riníʼ ique Jehová. ¡Ndiʼ nga ti cosa risaca ni caquiiñeʼ guizíʼdinu!

7. ¿Ximodo bisihuinni Pedro cayuni stipa guiníʼ ique cásica riníʼ ique Jehová? (Laaca zanda gúʼyaluʼ imagen ca.

⁷ Gudiʼdiʼ si ti tiempu bisihuinni Pedro cayuni stipa guiníʼ ique cásica riníʼ ique Jehová. Gudixhe ique Jehová maʼ zanda guni adorar binni de xcaadxi guidxi laa ne gúdxibe Pedro cheʼ chiguni predicar Cornelio, hombre ni zeeda gaca tobi de ca primé xpinni Cristu ni cadi naca judíu. Dxandíʼ, qué riná ca judíu guidxaagacaʼ binni de xcaadxi guidxi, ngue runi zándaca gaca nagana para Pedro guni ni canabaʼ Dios laa que. Peru ora biene chaahuibe xii nga ni racalaʼdxiʼ Jehová la? bichaabe modo ruuyabe ca cosa que. Ora gunabaʼ Cornelio Pedro cheʼ chiganna laa, «nagueendaca» guyé Pedro ra nuube (Hech. 10:​28, 29). Biʼniʼ predicar laabe ne familia stibe ne guirácabe guyuunísacabe (Hech. 10:​21-23, 34, 35, 44-48).

8. ¿Ximodo rusihuínninu riníʼ íquenu cásica riníʼ ique Jehová? (1 Pedro 3:8).

⁸ Gudiʼdiʼ si iza bidii Pedro conseju riʼ ca xpinni Cristu: «Lachuu tobi si lu ni riníʼ íquetu» (biindaʼ 1 Pedro 3:8). Laanu, ca testigu stiʼ Jehová, para ganda chuʼnu tobi si lu ni riníʼ íquenu caquiiñeʼ guiníʼ íquenu modo riníʼ ique Jehová casi riete ni lu Biblia. Guzéʼtenu ti ejemplu, guluu Jesús gana ca discípulo stiʼ gúnicaʼ ni ná Reinu stiʼ Dios (Mat. 6:33). Ne ni bizéʼtenu riʼ, guiníʼ íquenu gudixhe ique ti hermanu gaca precursor o guni jma lu xhiiñaʼ Jehová. ¿Ñee zábinu laabe cásica gudxi Pedro Jesús la? Coʼ, ¿njaʼ? Ni zúninu nga zaguʼnu gana laabe pur decisión gucuaabe ne zacanenu laabe.

GÁCANU HUMILDE

9, 10. ¿Ximodo bisihuinni Jesús naca humilde?

⁹ Gueelaʼ ante gatiʼ Jesús bisiidibe Pedro ne xcaadxi apóstol stibe pabiáʼ risaca gácacaʼ humilde. Gudxi Jesús Pedro ne Juan guni prepararcaʼ guiráʼ ni caquiiñeʼ para gonebe ca discípulo stibe últimu biaje ante guuticabe laabe. Zándaca guluucabe listu ti bandeja ne tualla para iquiiñecabe ora quíʼbicabe ñee ca invitadu stícabe. ¿Peru tu chiguni dxiiñaʼ riʼ yaʼ?

¹⁰ Ti esclavu nga runi dxiiñaʼ riʼ. Peru biaje riʼ la? Jesús nga biʼniʼ ni. Gudiibibe ñee ca discípulo stibe. ¡Guizáʼ bidxagayaa ca apóstol que ora bíʼyacaʼ guxha Jesús xhaba, bixhii ti tualla ndaaniʼ, gudaa nisa ndaaniʼ ti bandeja ne bizulú gudiibiʼ ñee ca discípulo stiʼ! (Juan 13:​4, 5). ¿Ñee riníʼ íqueluʼ pabiáʼ tiempu bindaa Jesús biʼniʼ ndiʼ la? Gudiibibe ñee ca 12 apóstol stibe dede né Judas, ni chiguni traicionar laabe que. ¡Pabiáʼ humilde guca Jesús! Despué, né stale paciencia bisiénebe laacaʼ: «¿Ñee biénetu ni bineʼ laatu riʼ la? Laatu rábitu naa Maestru ne Señor, ne jneza riniʼtu, purtiʼ nacaʼ ni. Nga runi, pa naa, neca nacaʼ Señor ne Maestru gudiibeʼ ñeetu, laatu laaca naquiiñeʼ quíʼbisaatu ñeetu» (Juan 13:​12-14).

11. ¿Ximodo bisihuinni Pedro maʼ biziidiʼ gaca humilde? (1 Pedro 5:5; laaca zanda gúʼyaluʼ imagen ca).

¹¹ Biziidiʼ Pedro gaca humilde casi Jesús. Despué de zeʼ Jesús guibáʼ biʼniʼ Pedro ti milagru, bisiándabe ti hombre ni nachiitaʼ ñee dede dxi gule (Hech. 1:​8, 9; 3:​2, 6-8). Stale binni bidxagayaa ora bíʼyacaʼ milagru ni biʼniʼ Pedro riʼ ne bidxíñacaʼ ra nuube (Hech. 3:11). ¿Xi guni Pedro yaʼ? Cadi guiaandaʼ laanu para ca binni xquidxi Pedro nabé risaca nga gusisaca binni laacaʼ. ¿Ñee zuyubi Pedro gusisaca binni laa la? Coʼ, sínuque gúcabe humilde ne bisisácabe Jehová ne Jesús. Sicaríʼ guniʼbe de Jesús: «Pur mediu de lá Jesús ne pur fe ni nápadu lu labe nga maʼ nuu stipa ñee hombre ni cayuuyatu ne ni runibiaʼtu riʼ» (Hech. 3:​12-16). Gudiʼdiʼ tiempu, bicaa Pedro ra nuu ca xpinni Cristu para gúʼyacaʼ pabiáʼ risaca gácacaʼ humilde. Zándaca rusietenalaʼdxiʼ ca diidxaʼ ni biquiiñebe riʼ laanu dxi bindiibi Jesús ti tualla ndaaniʼ ne gudiibiʼ ñee ca apóstol stiʼ (biindaʼ 1 Pedro 5:5 ne guiropa nota).

12. Cásica Pedro, ¿ximodo zanda gácanu humilde?

¹² Cásica Pedro zanda guizíʼdinu gácanu humilde. Cadi guiaandaʼ laanu rihuinni dxandíʼ humilde tuuxa pur ca cosa ni riníʼ ique ne cadi pur ca ni riníʼ. Nga peʼ nga riníʼ ca diidxaʼ «lagaca humilde» ni riete lu 1 Pedro 5:5. Racanenu xcaadxi binni purtiʼ nadxiinu Jehová ne nadxiinu binni ne cadi para gusisácacabe laanu. Pa gúninu ni ná Jehová ne guendanayecheʼ, pa gacanenu ca hermanu stinu ne cadi cuézanu guʼyaʼ xcaadxi ni cayúninu zusihuínninu nácanu humilde (Mat. 6:​1-4).

GÁCANU BINNI NUU XPIAANIʼ

13. ¿Xi riníʼ gácanu binni nuu xpiaaniʼ?

¹³ ¿Xi riníʼ gácanu binni nuu xpiaaniʼ? (1 Ped. 4:7). Riniʼni guicaanu decisión ni gusihuinni riníʼ íquenu casi riníʼ ique Jehová. Ne para ti binni ni nuu xpiaaniʼ ni jma risaca nga gaca xhamigu Jehová. Pa nácanu ti binni nuu xpiaaniʼ la? qué zaníʼ íquenu laanu nga nánnanu guiráʼ cosa ne qué zaníʼ íquenu jma nuu xpiaaninu que stobi. Ne laaca qué zusaana de guni orarnu Jehová para guinábanu laa gacané laanu ne gabi laanu xi gúninu.a

14. ¿Padxí nga bisihuinni Pedro qué gapa confianza Jehová?

¹⁴ Gueelaʼ ante gatiʼ Jesús gúdxibe ca discípulo stibe: «Gueelaʼ riʼ, guiratu zucheetu pur naa». Né stale confianza guníʼ Pedro: «Neca guchee guirácabe pur lii, ¡naa qué ziuu dxi gucheeʼ!». Ne gueelaʼ que bidii Jesús conseju riʼ chupa chonna de ca discípulo stiʼ: «Lagataná ne cadi gusaana de guni orartu» (Mat. 26:​31, 33, 41). Pa ninanda Pedro conseju riʼ la? zándaca qué nidxíbibe niniʼbe nácabe discípulo stiʼ Jesús. Peru cumu qué ninándabe ni la? biʼniʼ negarbe Jesús… ¡ne guizáʼ biuubaʼ ladxidoʼbe pur ni bíʼnibe ca! (Mat. 26:​69-75).

15. ¿Xi gucané Jesús gusihuinni naca binni nuu xpiaaniʼ gueelaʼ ante gatiʼ?

¹⁵ Qué nusaana Jesús de ñapa confianza Jehová. Neca nácabe perfectu stale biaje biʼniʼ orarbe ante gátibe ne ngue gucané laabe gácabe nadxibalú para gúnibe ni racalaʼdxiʼ Bixhózebe (Mat. 26:​39, 42, 44; Juan 18:​4, 5). Zándaca qué ñuu dxi nusiaandaʼ Pedro stale biaje biʼniʼ orar Jesús gueelaʼ ante gati que.

16. ¿Ximodo bisihuinni Pedro nuu xpiaaniʼ? (1 Pedro 4:7).

¹⁶ Ra gudiʼdiʼ tiempu biziidiʼ Pedro gapa confianza Jehová ra guni orar. Biasa si Jesús de lade gueʼtuʼ, gúdxibe Pedro ne xcaadxi apóstol zudiibe laacaʼ espíritu santu para ganda guni predicarcaʼ. Peru ante guizaaca ndiʼ, naquiiñeʼ guiaanacaʼ ndaaniʼ guidxi Jerusalén (Luc. 24:49; Hech. 1:​4, 5). ¿Xi biʼniʼ Pedro laga cabeza yaʼ? Lu Biblia riete laabe ne xcaadxi xpinni Cristu «cadi cayanadxí de guni orárcabe» (Hech. 1:​13, 14). Despué, lu primé carta bicaabe, guluube gana ca xpinni Cristu gácacaʼ binni nuu xpiaaniʼ ne cadi gusaana de gápacaʼ confianza Jehová ra guni orarcaʼ (biindaʼ 1 Pedro 4:7). Biziidiʼ Pedro gapa confianza Jehová ne biʼniʼ dirigir congregación (Gál. 2:9).

17. ¿Xi caquiiñeʼ gúninu ora chigúninu xiixa ni qué raca nagana para laanu? (Laaca zanda gúʼyaluʼ imagen ca).

¹⁷ Para gácanu binni nuu xpiaaniʼ caquiiñeʼ guni orarnu Jehová stale biaje. Nánnanu naquiiñeʼ guinábanu Jehová gacané laanu dede para gúninu ca cosa ni qué raca nagana para laanu gúninu. Ne jmaruʼ si naquiiñeʼ guinábanu gacanebe laanu ora chiguicaanu xiixa decisión risaca purtiʼ laabe nánnabe gunáʼ nga ni jma galán para laanu.

18. Cásica Pedro, ¿xi zanda gúninu?

¹⁸ Guizáʼ rudiʼnu xquixe peʼ Jehová purtiʼ bizáʼ laanu para ganda gusihuínninu ca cualidad stiʼ (Gén. 1:26). Nánnanu qué zanda gusihuínninu ca cualidad stibe casi peʼ modo rusihuínnibe ni (Is. 55:9). Peru cásica Pedro, zanda guizíʼdinu guiníʼ íquenu cásica riníʼ ique Jehová, gácanu humilde ne gácanu binni nuu xpiaaniʼ.