Ximodo gacanenu ca ni cudiʼnu estudiu quixhe íquecaʼ gúnicaʼ ni ná Jehová

1, 2. a) ¿Xiñee nuu biaje raca nagana para ca binni ni cudiʼnu estudiu gácacaʼ testigu stiʼ Jehová? b) ¿Xi zazíʼdinu lu artículo riʼ?

DXI caníʼ íqueluʼ pa zácaluʼ testigu stiʼ Jehová, ¿ñee guyuu xiixa ni bichibi lii la? Zándaca bidxíbiluʼ gucaalú ca ni runineluʼ dxiiñaʼ lii, ca xhamíguluʼ o familia stiluʼ. O zándaca guníʼ íqueluʼ guizáʼ nagana guiráʼ ni canabaʼ Dios lii gúniluʼ. Pa zacá bizaacaluʼ zanda chuʼluʼ lugar stiʼ ca binni ni cudiiluʼ estudiu ni cayaca nagana para laacaʼ gácacaʼ testigu stiʼ Jehová.

² Gunna dxichi Jesús zanda gucueeza ca cosa casi ca ni bizéʼtenu ca laanu gúninu ni ná Jehová (Mat. 13:​20-22). Peru ca binni ni qué niná ga ninanda laabe qué niníʼ íquebe qué zanda gácacaʼ xpínnibe. Pa chinándanu ejemplu stiʼ Jesús zanda gacanenu ca binni ni cudiʼnu estudiu, primé, gudii cuenta xii nga ca ni cucueeza laa para guni ni ná Jehová, guiropa, gannaxhiibe Jehová jma, guionna, gudiibe cuenta xi caquiiñeʼ gúnibe para quixhe íquebe gúnibe ni ná Jehová primé lu xquendanabánibe ne guidapa, gudxiilube ca guendanagana ni nápabe. ¿Ximodo zanda chinándanu ejemplu stiʼ Jesús ne iquíʼñenu libru ¡Zanda guibáninu nayecheʼ! Para gacanenu ca binni ni cudiʼnu estudiu gácacaʼ testigu stiʼ Jehová?

GUCANÉ CA BINNI NI CUDIILUʼ ESTUDIU GUDIICAʼ CUENTA XII NGA NI CUCUEEZA LAACAʼ PARA GÚNICAʼ NI NÁ JEHOVÁ

3. ¿Xi guendanagana zándaca bicueeza Nicodemo de ñaca discípulo stiʼ Jesús?

³ Guca Nicodemo ti xaíque nabé risaca stiʼ ca judíu peru bidxagalú hombre riʼ ti guendanagana ni bicueeza laa de gaca discípulo stiʼ Jesús. Xhoopaʼ beeu si de bizulú Jesús cayuni predicar bidii Nicodemo cuenta laabe nga Mesías ni maca cá gueeda que (Juan 3:​1, 2). Peru neca zacá, qué ninabe ñuuyaʼ binni caníʼnebe Jesús purtiʼ bidxíbibe ca judíu (Juan 7:13; 12:42). Zándaca guníʼ íquebe xi guiráʼ zunítibe pa gácabe discípulo stiʼ Jesús.a

4. ¿Ximodo gucané Jesús Nicodemo guiene xi racalaʼdxiʼ Jehová guni?

⁴ Binibiáʼ chaahuiʼ Nicodemo Ley stiʼ Moisés, peru caquiiñebe tu gacané laabe guiénebe xi racalaʼdxiʼ Jehová gúnibe. ¿Ximodo gucané Jesús laabe yaʼ? Gulee tiempu para laabe. Dede guná guiniʼné laabe huaxhinni. Laaca bisiene chaahuiʼ Jesús laabe xi caquiiñeʼ gúnibe para gácabe discípulo stiʼ: gaca arrepentirbe de ca pecadu stibe, chúʼnisabe ne gusihuínnibe nápabe fe Xiiñiʼ Dios (Juan 3:​5, 14-21).

5. ¿Ximodo zanda gacaneluʼ ti binni ni cudiiluʼ estudiu gudii cuenta xii nga ca ni cucueeza laa para guni ni ná Jehová?

⁵ Zándaca ti binni ni cudiʼnu estudiu maʼ nanna xi rusiidiʼ Biblia peru caquiiñebe gacanenu laabe gudiibe cuenta xi cucueeza laabe para gúnibe ni ná Jehová. Zándaca pur dxiiñaʼ stibe qué gápabe tiempu o qué naʼ familia stibe gácabe Testigu. ¿Ximodo zanda chinándaluʼ ejemplu stiʼ Jesús yaʼ? Gulee tiempu para gacaneluʼ binni ni cudiiluʼ estudiu ca. Zanda guni invitarluʼ laabe chetu ra parque o chizatu paxaraa para guiniʼtu diidxaʼ purtiʼ óraca zándaca qué zaca nagana para laabe guiniʼbe xi ca guendanagana cucueeza laabe. Ne óraca maʼ zanda gacaneluʼ laabe gudiibe cuenta xi caquiiñeʼ gúnibe ne bisietenalaʼdxiʼ laabe naquiiñeʼ gúnibe ni para gusihuínnibe nadxiibe Jehová ne cadi para gusiéchebe lii.

6. ¿Ximodo zanda gacaneluʼ ti binni ni cudiiluʼ estudiu cadi guidxibi guni ni caziidiʼ? (1 Corintios 16:13).

⁶ Para cadi guidxibi ti binni ni cudiʼnu estudiu guni ni caziidiʼ la? caquiiñeʼ chuʼbe seguru zacané Jehová laabe gúnibe ni jneza (biindaʼ 1 Corintios 16:13). ¿Ximodo zanda gacaneluʼ laabe yaʼ? Guníʼ ique ti maestru ni nanna gusiidiʼ. Cadi rusiidisibe tuuxa ximodo guni xiixa, sínuque laaca racanebe laa guni sentir zanda guni ni. Gudixhe ique gácaluʼ casi maestru ca. Cadi si guicá íqueluʼ gusiidiluʼ binni ni cudiiluʼ estudiu ca xi racalaʼdxiʼ Jehová gúnibe. Gucané laabe chuʼbe seguru nuuca Jehová para gacané laabe guchaabe ra caquiiñeʼ gúnibe ni. ¿Xiruʼ zanda gúniluʼ para gacaneluʼ laabe yaʼ?

GUCANÉ BINNI NI CUDIILUʼ ESTUDIU GANNAXHII JEHOVÁ JMA

7. ¿Ximodo gucané Jesús ca binni ni cucaadiaga laa gannaxhiicaʼ Jehová jma?

⁷ Nanna dxichi Jesús pa gannaxhii ca discípulo stibe Dios la? qué zaca nagana para laacaʼ gúnicaʼ ni caziidicaʼ. Ngue runi gatigá rusiidibe laacaʼ cosa ni zacané laacaʼ gannaxhiicaʼ jma Bixhózecaʼ ni nuu guibáʼ. Guzéʼtenu ti ejemplu, bichaaga Jesús Jehová casi ti hombre ni rudii cosa galán ca xiiñiʼ (Mat. 7:​9-11). Zándaca nuu de ca binni ni cucaadiaga Jesús que huaxiéʼ gunnaxhii bixhózecaʼ laacaʼ. Guníʼ ique ximodo biʼniʼ sentírcabe ora guniʼné Jesús laacabe de xa hombre ni bisihuinni riá xiiñiʼ ne bidxagalú laabe né guendanayecheʼ ora biguétabe ra lídxibe purtiʼ maʼ guca arrepentirbe de ca cosa malu ni bíʼnibe. Zaqué gucané Jesús laacabe guiénecabe pabiáʼ nadxii Jehová binni (Luc. 15:​20-24).

8. ¿Ximodo zanda gacaneluʼ binni ni cudiiluʼ estudiu gannaxhii Jehová jma?

⁸ Lii laaca zanda gacaneluʼ binni ni cudiiluʼ estudiu gannaxhii Jehová jma, pa ora gudiiluʼ laabe estudiu guzeeteluʼ ca cualidad ni napa Dios. Cada biaje gudiiluʼ laabe estudiu gucané laabe gudiibe cuenta ximodo rusihuinni Jehová nadxii laanu lu ni caziidibe ca. Ne ora gusiidiluʼ laabe bidii Jehová Xiiñiʼ para gueeda gati pur laanu, gucané laabe guiénebe laani nga ti regalu stiʼ Dios ni bidii laabe (Rom. 5:8; 1 Juan 4:10). Pa guiene ti binni ni cudiʼnu estudiu pabiáʼ nadxii Jehová laa, zándaca zannaxhiibe Jehová jma ne qué zusaana de gannaxhiibe laa (Gál. 2:20).

9. ¿Xi gucané Michael guchaa xquendanabani?

⁹ Guidúʼyanu ni bizaaca Michael, de guidxi Indonesia. Dede dxi nahuiinibe biziidibe de Jehová peru qué ñuunísabe. Dxi nápabe 18 iza, guyebe sti guidxi para gúnibe dxiiñaʼ de traileru. Despué biguétabe ndaaniʼ guidxi Indonesia, bichaganabe ne gúpacabe ti dxaapahuiiniʼ. Peru qué ñuube gaxha de familia stibe purtiʼ rúnirube dxiiñaʼ ndaaniʼ sti guidxi. Ra gudiʼdiʼ iza gucuaa xheelabe ne xiiñibe estudiu ne bizulú bichaacaʼ xquendanabánicaʼ. Despué, guti jñaa Michael, ngue runi gudixhe ique guibiguetaʼ ra lidxi para gapa bixhoze ne guná guiziidiʼ de lu Biblia. Ora biindanécabe laabe lección 27 stiʼ libru ¡Zanda guibániluʼ nayecheʼ!, guizáʼ yendá ndaaniʼ ladxidoʼbe ni biziidibe lu sección «Guizíʼdirunu jma». Bizulú biinabe ora guníʼ íquebe pabiáʼ gucaná Jehová ra biʼyaʼ cayacaná Xiiñiʼ. Ne ora bidiibe cuenta pabiáʼ nadxii Jehová ne Jesús laabe, biʼniʼ sentirbe naquiiñeʼ gúnibe xiixa para gudiibe xquixe peʼ laacaʼ. Ngue runi bizulú bichaabe xquendanabánibe ne gudixhe íquebe chúʼnisabe.

GUCANÉ BINNI NI CUDIILUʼ ESTUDIU GUDII CUENTA XI CAQUIIÑEʼ GUNI PARA GUNI NI NÁ JEHOVÁ PRIMÉ LU XQUENDANABANI

10. ¿Ximodo gucané Jesús ca primé discípulo stiʼ quixhe íquecaʼ gúnicaʼ ni ná Jehová primé lu xquendanabánicaʼ? (Lucas 5:​5-11; laaca zanda gúʼyaluʼ imagen ca).

¹⁰ Ca primé discípulo stiʼ Jesús bidiicaʼ cuenta laabe nga Mesías ni nexheʼ gueeda que, peru caquiiñeʼ guiénecabe guni predicárcabe nga dxiiñaʼ ni jma caquiiñeʼ gúnicabe. Maʼ ziné Pedro ne Andrés tiempu de nácacaʼ discípulo stiʼ Jesús ora gúdxibe laacaʼ gusaanacaʼ xhiiñacaʼ ne chinándacaʼ laabe (Mat. 4:​18, 19). Cumu pescador Pedro, Andrés, Santiago ne Juan la? juntu bíʼnicabe dxiiñaʼ ne gúpacabe ti negocio de benda ne guizáʼ galán rieni laacabe (Mar. 1:​16-20). Ora bisaana Pedro ne Andrés «chin sticaʼ» para chinándacaʼ Jesús, zándaca biiyacabe cadi guiaadxaʼ ni iquiiñeʼ familia stícabe laga zinándacabe Jesús. ¿Xi gucané laacabe gúnicabe xhiiñaʼ Jehová primé lu xquendanabánicabe yaʼ? Lu relatu stiʼ Lucas riete biʼniʼ Jesús ti milagru ni gucané laacabe gápacabe confianza zudii Jehová guiráʼ ni caquiiñecabe pa quixhe íquecabe gúnicabe ni ná primé lu xquendanabánicabe (biindaʼ Lucas 5:​5-11).

11. ¿Xi zanda gábinu binni ni cudiʼnu estudiu para gacanenu laa iguidxi fe stiʼ?

¹¹ Laanu qué rúninu milagru cásica biʼniʼ Jesús, peru zanda gábinu binni ni cudiʼnu estudiu racané Jehová guiráʼ xixé binni ni riguixhe ique guni ni nabe primé lu xquendanabani. Guzéʼtenu ti ejemplu, ¿ñee rietenaláʼdxiluʼ ximodo gucané Jehová lii ora gudixhe íqueluʼ cheluʼ reunión la? Zándaca gupa xidé guníʼneluʼ patrón stiluʼ ne gúdxiluʼ laa maʼ qué zanda guiaanaluʼ jma huadxí para gúniluʼ dxiiñaʼ purtiʼ zucueezani lii para cheluʼ reunión. Bisiene binni ni cudiiluʼ estudiu ca ora gudixhe íqueluʼ gúniluʼ ni ná Jehová biiyaʼ dxíchiluʼ cayacané Jehová lii ne ngue gucané lii iguidxi fe stiluʼ.

12. a) ¿Xiñee galán nga guni invitarnu gadxé gadxé hermanu ora gudiʼnu estudiu? b) ¿Xiruʼ zanda gúniluʼ para gacaneluʼ binni ni cudiiluʼ estudiu quixhe ique guni ni ná Jehová primé lu xquendanabani? Bizeeteʼ ti ejemplu.

¹² Sti cosa ni zacané laabe nga gánnabe xi biʼniʼ xcaadxi hermanu para gudixhe íquecaʼ gúnicaʼ ni ná Jehová primé lu xquendanabánicaʼ. ¿Xiñee qué guni invitarluʼ xcaadxi hermanu chinecaʼ lii para gudiiluʼ laabe estudiu yaʼ? Gunabaʼ ca hermanu riʼ gusiénecaʼ ximodo biʼniʼ biaacaʼ Jehová ne xi bíʼnicaʼ para quixhe íquecaʼ gúnicaʼ ni ná Jehová primé lu xquendanabánicaʼ. Laaca galán gúʼyaneluʼ laabe ca videu ni zeeda lu sección «Guizíʼdirunu jma» o lu sección «Biiyaʼ xiruʼ zanda guiziidiluʼ» stiʼ libru ¡Zanda guibániluʼ nayecheʼ! Guzéʼtenu ti ejemplu, ora gúʼndaneluʼ laabe lección 37 ne gúʼyatu videu ni láʼ Zudii Jiobá guiráʼ ni caquiiñenu, gucané laabe gúʼyabe zacané Jehová laabe pa quixhe íquebe gúnibe ni ná primé lu xquendanabánibe.

GUCANÉ BINNI NI CUDIILUʼ ESTUDIU GUDXIILÚ CA GUENDANAGANA NI NAPA

13. ¿Ximodo gucané Jesús ca discípulo stiʼ ora chuʼ tu gucueeza laacaʼ de guni predicarcaʼ?

¹³ Gatigá gudxi Jesús ca discípulo stiʼ ziuu tu zucaaluʼ laacaʼ dede zándaca laaca zucaaluʼ familia sticaʼ laacaʼ (Mat. 5:11; 10:​22, 36). Ra mayaca gátibe, gúdxibe laacaʼ laaca zándaca ziuu xquendanabánicaʼ lu peligru (Mat. 24:9; Juan 15:20; 16:2). Ne para cadi gusaana de guni predicarcaʼ, bidiibe laacaʼ conseju gácacaʼ binni nuu xpiaaniʼ ne gatanacaʼ, ne cadi gucaalucaʼ binni ni cucaalú laacaʼ.

14. ¿Ximodo zanda gacanenu binni ni cudiʼnu estudiu chuʼ listu ora chuʼ tu gucaaluʼ laa? (2 Timoteo 3:12).

¹⁴ Cásica Jesús, laanu laaca zanda gacanenu binni ni cudiʼnu estudiu chuʼ listu para ora chuʼ tu gucaalú laa pur ca ni caziidi, gánnabe xi zanda gúnibe o xi zanda gábibe ca ni runinebe dxiiñaʼ, ca xhamígube o familia stibe (biindaʼ 2 Timoteo 3:12). Zándaca nuu de ca ni runinebe dxiiñaʼ guni búrlacaʼ laabe purtiʼ cayúnibe stipa guibánibe casi rusiidiʼ Biblia o zándaca xcaadxi binni o familia peʼ stibe guiniʼcaʼ cadi jneza ni caziidibe. Galán quixhe íqueluʼ nagueendacaʼ gábiluʼ laabe ziuu binni ni zucaalú laabe purtiʼ caziidibe de lu Biblia. Pa gúniluʼ ni, zacaneluʼ laabe chuʼbe listu ne zánnabe xi gúnibe ne xi guiniʼbe ora guidxagalube ni.

15. ¿Ximodo zanda gacaneluʼ binni ni cudiiluʼ estudiu pa gucaalú familia stiʼ laa?

¹⁵ Pa cucaalú familia stiʼ binni ni cudiiluʼ estudiu laa, galán gacaneluʼ laabe guiníʼ íquebe xiñee cucaalúcabe laabe. ¿Ñee riníʼ ique ca familia stibe cadi jneza ni cusíʼdinu laabe la? ¿O riníʼ íquecaʼ cosa ni cadi jneza de ca testigu stiʼ Jehová? Ngaca nga ni bizaaca Jesús dede guyuu familia stibe guníʼ cayaca íquebe (Mar. 3:21; Juan 7:5). Nabé risaca nga gusiidiluʼ binni ni cudiiluʼ estudiu ca gapa paciencia ne ganna ximodo guiniʼné xcaadxi dede né familia stiʼ.

16. ¿Xi zanda gúninu para gacanenu binni ni cudiʼnu estudiu ganna ximodo gusiene ni runi cré?

¹⁶ ¿Xi zanda guni ti binni ni cacaa estudiu pa málasi gacalaʼdxiʼ ti familia stiʼ ganna jma de ni caziidiʼ? Galán cadi gusienedibe laa guiráʼ ni maʼ biziidibe purtiʼ zanda cueebe ganna laa ne maʼ qué zaná ganna jma. Gucané binni ni cudiiluʼ estudiu ganna ximodo guiniʼné familia stiʼ ne cadi guindaa peʼ. Zacá zanaruʼ familia stibe guiníʼnebe laa de ni caziidibe (Col. 4:6). Laaca zanda guluiʼbe ca familia stibe sitiu ni nápanu lu internet jw.org. Zacá ora gacaláʼdxicaʼ gánnacaʼ jma de ca testigu stiʼ Jehová, zanda chuʼcaʼ luni ne guyúbicaʼ información.

17. ¿Xi zanda iquiiñeluʼ para gacaneluʼ binni ni cudiiluʼ estudiu ganda guicabi ca ni rinabadiidxaʼ binni de ca testigu stiʼ Jehová? (Laaca zanda gúʼyaluʼ imagen ca).

¹⁷ Zanda iquiiñeluʼ sección ni láʼ «Cani nabé rinabadiidxaʼ binni de ca testigu stiʼ Jehová» ni nuu lu jw.org para gacaneluʼ binni ni cudiiluʼ estudiu ti ganda guicabi né chupa chonna si diidxaʼ ca ni zándaca guinabadiidxaʼ familia stiʼ laa o ca ni runiné dxiiñaʼ (2 Tim. 2:​24, 25). Cadi guiaandaʼ lii ra ziluxe cada lección stiʼ libru ¡Zanda guibániluʼ nayecheʼ!, zeeda ti cuadru ni láʼ «Nuu tu ná». Óraca zanda guni ensayarneluʼ binni ni cudiiluʼ estudiu ca para ganda gusiene ni caziidiʼ. Zanda gudiiluʼ laabe chupa chonna conseju ni zacané laabe para ganda guicábibe jma jneza. Ra cueeluʼ tiempu para guni ensayarneluʼ laabe, zacaneni laabe cadi guidxíbibe guiniʼbe xiñee runi crebe ni caziidibe.

18. ¿Ximodo zanda gacaneluʼ binni ni cudiiluʼ estudiu quixhe ique guni predicarné congregación? (Mateo 10:27).

¹⁸ Gunabaʼ Jesús ca discípulo stiʼ guni predicarcaʼ ca noticia galán guiráʼ xixé binni (biindaʼ Mateo 10:27). Ora ti binni ni cudiʼnu estudiu guzulú guiníʼ de ni runi cré, jma nagueenda riziidiʼ gapa confianza Jehová purtiʼ ruuyabe ximodo racané Jehová laabe. ¿Ximodo zanda cuʼluʼ gana binni ni cudiiluʼ estudiu guzulú guni predicarné congregación yaʼ? Galán ora guiete chichuu ti campaña de predicación guiníʼneluʼ laabe xi naquiiñeʼ gúnibe para gácabe publicador. Bisiene laabe cadi nagana diʼ nga guzulube guni predicarbe ora nuu ti campaña. Sti cosa ni zacané laabe nga guicá labe para ganda gutiidibe xiixa asignación lu reunión ni raca ndaaniʼ semana. Zacá zaziidibe guiniʼbe ni runi crebe sin guidxíbibe.

BIYUBI GUʼYAʼ BINNI NI CUDIILUʼ ESTUDIU RUNI CRELUʼ RACALAʼDXIʼ GUNI NI NÁ JEHOVÁ

19. ¿Ximodo bisihuinni Jesús napa confianza ca discípulo stiʼ ne ximodo zanda chinándanu ejemplu stiʼ?

¹⁹ Ante gatiʼ Jesús ne cheʼ guibáʼ la? gúdxibe ca discípulo stibe zabiguetaʼ ziuucabe juntu stiʼ biaje. Peru ora gúdxibe ni laacaʼ qué ñénecaʼ pa guibáʼ nga chebe. Neca zaqué qué niníʼ ique Jesús xiñee cadi cayénecabe, sínuque guníʼ ique nácacabe binni ni racalaʼdxiʼ guni ni ná Jehová (Juan 14:​1-5, 8). Nanna dxichi Jesús caquiiñecabe tiempu para guiénecabe caadxi cosa, casi tobi de laani nga ziécabe guibáʼ (Juan 16:12). Laanu laaca zanda chinándanu ejemplu stiʼ Jesús ra gusihuínninu nápanu confianza binni ni cudiʼnu estudiu ca ne runi crenu racalaʼdxiʼ guni ni ná Jehová.

20. ¿Ximodo bisihuinni ti hermana de guidxi Malaui napa confianza binni ni cudii estudiu?

²⁰ Risaca nga gápanu confianza binni ni cudiʼnu estudiu ra guni crenu racaláʼdxibe gúnibe ni ná Jehová. Ti hermana de guidxi Malaui láʼ Leticiab bizulú bidiibe estudiu Rosa, ti baʼdudxaapaʼ católica. Ora yendácabe lu lección 14 stiʼ libru ¡Zanda guibániluʼ nayecheʼ! Gunabadiidxaʼ Leticia Rosa pa jneza nga iquiiñe binni bidóʼ para guni adorar Dios. Bidxiichi Rosa ne gudxi laabe: «¡Nga la? maʼ cada tobi guʼyaʼ pa zuni ni!». Óraque zácaxa Leticia maʼ qué zaná Rosa guicaa estudiu, peru gúpabe paciencia laa ne qué nusaana de nudiibe estudiu laa purtiʼ guníʼ íquebe despué ziene cadi jneza nga iquiiñeʼ binni bidóʼ para guni adorar Dios. Chupa chonna beeu despué biʼniʼ Leticia laabe pregunta ni zeeda lu lección 34 ni ná: «Biaʼ tiempu zineluʼ de cayuundaluʼ Biblia ne cayunibiaʼluʼ Jehová, ¿ximodo huayacaneni lii?». Para ná Leticia: «Ora bineʼ Rosa pregunta riʼ la? guniʼbe caadxi cosa galán ne tobi de laani nga qué runi ca testigu stiʼ Jehová xiixa ni ná Biblia cadi jneza». Qué nindaa bisaana Rosa de iquiiñe bidóʼ ne guyuunisa.

21. ¿Xi zanda gúninu para gacanenu binni ni cudiʼnu estudiu quixhe ique guni ni ná Jehová?

²¹ Neca nánnanu Dios «nga rusiniisi ni» dxandíʼ ndaaniʼ ladxidóʼ binni ni cudiʼnu estudiu la? laanu laaca zanda gacanenu laabe gúnibe ni ná Jehová (1 Cor. 3:7). Rusíʼdinu laabe gánnabe xi racalaʼdxiʼ Jehová gúnibe; laaca racanenu laabe gannaxhiibe Dios de guidubi ladxidoʼbe. Ne zanda gacanenu laabe gusihuínnibe ni ra quixhe íquebe guibánibe modo riuuladxiʼ Dios ne gápabe confianza laa, jmaruʼ si ora tídibe ra nagana. Pa guʼyaʼ binni ni cudiʼnu estudiu ca nápanu confianza laa la? zacanenu laabe chuʼbe seguru laaca zanda gácabe ti xpinni Jehová.