Ni zanda gacané lii guietenaláʼdxiluʼ ti textu

¿Ñee nuu ti textu de lu Biblia ni guizáʼ riuuláʼdxiluʼ la? Zándaca nápaluʼ stale ne cadi tobi si. Zándaca tobi de laacani riguixhedxini ladxidoʼloʼ ne riguuni gana lii, ne nápaluʼ stobi ni riuuláʼdxiluʼ purtiʼ racaneni lii guiníʼ íqueluʼ cosa galán ne zándaca nápaluʼ xcaadxi textu ni riuuláʼdxiluʼ iquiiñeluʼ lu predicación (Sal. 119:​11, 111). Peru zándaca nuu tiru gaca nagana para lii guietenaláʼdxiluʼ xi nani o qué randa ridxélaluʼ ni. Guidúʼyanu caadxi cosa ni zacané lii guietenaláʼdxiluʼ ca textu ni riuuláʼdxiluʼ.

• Biquiiñeʼ ca etiqueta ni napa JW Library^®. Pa cayuundaluʼ Biblia lu aplicación JW Library ne guyuuláʼdxiluʼ ti textu la? zanda cuʼluʼ ni ndaaniʼ ti etiqueta ne cuee laluʼ etiqueta ca «Textu ni riuuladxeʼ». Nga zacané lii guidxélaluʼ textu ca jma nagueenda.

• Bicaa textu ca ti lugar ra zanda gúʼyaluʼ ni. Nuu hermanu rucaa ti textu ni riuulaʼdxiʼ lu ti guiʼchiʼ ne ruquiidini ti lugar ra zanda guʼyaʼ ni casi lu ti espeju o lu puertaʼ stiʼ refri. Xcaadxi ribeecaʼ foto textu ca ne riguucaʼ ni lu teléfono sticaʼ casi fondo de pantalla o lu computadora.

• Bicaa textu ca lu ti guiʼchihuiiniʼ para guiziidiluʼ ni. Bicaa lu ti guiʼchiʼ ti textu ne deche guiʼchiʼ ca bicaa xiná textu ca. Despué, biiyadxí ti ladu si guiʼchiʼ ca ne biʼniʼ stipa guietenaláʼdxiluʼ xiná sti ladu ca.