Guyuu seguru maʼ biʼniʼ perdonar Jehová lii

1, 2. ¿Xi runi Jehová ora raca arrepentirnu, ne ximodo runi sentirnu ra gánnanu ni? (Laaca zanda gúʼyaluʼ imagen ca).

GUIZÁʼ biuubaʼ ladxidóʼ David pur ca cosa ni cadi jneza biʼniʼ (Sal. 40:12; 51:3; encabezamiento). Peru guca arrepentirbe de guidubi ladxidoʼbe ne biʼniʼ perdonar Jehová laabe (2 Sam. 12:13). Ne ora biénebe dxandíʼ maʼ biʼniʼ perdonar Jehová laabe guizáʼ nayecheʼ guyuube ne gutadxí ladxidoʼbe (Sal. 32:1).

² Laanu laaca zanda guni sentirnu cásica biʼniʼ sentir rey David. Ratadxí ladxidoʼno gánnanu runi perdonar Jehová laanu, dede né pa gúninu ti pecadu grave, peru pa gaca arrepentirnu de guidubi ladxidoʼno, gábinu ca ancianu ni bíninu ne gúninu stipa maʼ cadi gúninu ni sti biaje (Prov. 28:13; Hech. 26:20; 1 Juan 1:9). Ne guizáʼ ratadxí ladxidoʼno gánnanu, ora runi perdonar Jehová ti pecadu rusiaandabe ni casi ñaca qué ñuu dxi ñúninu ni (Ezeq. 33:16).

3, 4. a) ¿Ximodo biʼniʼ sentir Jennifer? b) ¿Xi zadúʼyanu lu artículo riʼ?

³ Zándaca ziuu biaje gaca nagana para laanu guni crenu maʼ biʼniʼ perdonar Jehová laanu. Nga peʼ nga ni bizaaca Jennifer. Dxi nahuiinibe bisiidiʼ bixhózebe ne jñaabe laabe de Jehová, peru dxi maʼ nácabe joven nagaʼchiʼ bizulú bíʼnibe cosa ni cadi jneza. Ra gudiʼdiʼ iza biguétabe ra nuu Jehová ne despué guyuunísabe. Laabe guniʼbe: «Nabé gucuá iqueʼ gapaʼ cosa risaca ne dede bineʼ cosa feu. Laaca nabé guxudxeʼ ne nabé feu modo ridxiicheʼ. Nannaʼ lu Biblia ná pur guti Jesús pur laanu zanda guni perdonar Jehová ca pecadu stinu, peru neca maʼ gucaʼ arrepentir ne maʼ gunabaʼ Jehová guni perdonar naa, racaruʼ nagana para naa guneʼ cré maʼ biʼniʼ perdonarbe naa».

⁴ ¿Ñee laaca raca nagana guni creluʼ de guidubi ladxidoʼloʼ maʼ biʼniʼ perdonar Jehová lii la? Cadi guiaandaʼ lii racalaʼdxiʼ Jehová chuʼnu seguru cásica guyuu David seguru, riabe laanu ne runi perdonarbe laanu. Lu artículo riʼ zadúʼyanu, xiñee nabé risaca chuʼnu seguru maʼ biʼniʼ perdonar Jehová laanu ne xi zanda gacané laanu para guni crenu ni.

XIÑEE NABÉ RISACA GUNI CRENU MAʼ BIʼNIʼ PERDONAR JEHOVÁ LAANU

5. ¿Xi racalaʼdxiʼ Binidxabaʼ guni crenu? Bizeeteʼ ti ejemplu.

⁵ Pa runi crenu maʼ biʼniʼ perdonar Jehová laanu qué ziábanu lu trampa stiʼ Binidxabaʼ. Cadi guiaandaʼ laanu zuni Binidxabaʼ stale cosa para gucaa laanu gusaana de gúninu ni ná Jehová. Tobi de ca trampa ni riquiiñebe nga gucaabe laanu guiníʼ íquenu qué ziuu dxi guni perdonar Jehová laanu purtiʼ guizáʼ naroʼbaʼ pecadu ni bíninu. Guiníʼ íquenu ni bizaaca hombre de guidxi Corinto que, bíʼnibe ti pecadu grave ne pur ngue guleecabe laabe de ndaaniʼ congregación (1 Cor. 5:1, 5, 13). Despué guca arrepentirbe. Peru Binidxabaʼ racalaʼdxiʼ cadi guni perdonar ca hermanu que laabe ne cadi gudiicaʼ lugar guibiguétabe ndaaniʼ congregación. Ne pa nizaaca ni racalaʼdxiʼ Binidxabaʼ que la? nucaabe hombre que ñuni cré qué ziuu dxi guni perdonar Jehová laa. Ne pur ngue nireebe gana «purtiʼ nuube triste» ne nusaana de ñúnibe ni ná Jehová. Dede yanna qué huasaana Binidxabaʼ de iquiiñeʼ ca cosa ca para gucaa laanu guixélenu de Jehová. Peru laanu galán nga «maʼ nánnanu ximodo rúnibe dxiiñaʼ» (2 Cor. 2:5-11).

6. ¿Xi zacané laanu guibiguetaʼ chuʼnu nayecheʼ pa runi sentirunu nápanu donda?

⁶ Pa runi crenu maʼ biʼniʼ perdonar Jehová laanu ziuʼnu nayecheʼ. Riuʼnu triste ora rucheʼnu (Sal. 51:17). Ne galán guni sentirnu zacá purtiʼ racaneni conciencia stinu gucaa laanu guchaʼnu ne gúninu ni jneza (2 Cor. 7:10, 11). Peru pa despué de maʼ guca arrepentirnu guni sentirnu náparunu donda, zándaca ziuʼnu triste dede guiníʼ íquenu gusaana de gúninu ni ná Jehová. Nga runi, ora guni crenu maʼ biʼniʼ perdonar Jehová laanu zacaneni laanu cadi chuʼnu triste ne gusiáʼndanu ni bizaaca. Ne zacá zúninu ni ná Jehová modo riuulaʼdxiʼ: né ti conciencia nayá ne guendanayecheʼ (Col. 1:10, 11; 2 Tim. 1:3). Yanna, guidúʼyanu xi zacané cada tobi de laanu para chuʼ seguru maʼ biʼniʼ perdonar Jehová laa.

¿XI ZACANÉ LII CHUʼLUʼ SEGURU MAʼ BIʼNIʼ PERDONAR JEHOVÁ LII?

7, 8. ¿Ximodo guníʼ Jehová naca lu Éxodo 34:6, 7, ne ximodo racaneni laanu?

⁷ Guníʼ ique ni guníʼ Jehová de laa. Guietenaláʼdxinu ni gúdxibe Moisés lu dani Sinaí (biindaʼ Éxodo 34:6, 7).a Guizáʼ stale cualidad napa Jehová, peru gulibe gábibe Moisés nácabe «ti Dios ni napa misericordia ne riá». Yanna, ¿ñee rábiluʼ qué zanabe guni perdonarbe ti binni ni nadxii laabe ne ni guca arrepentir de guidubi ladxidóʼ pur ti pecadu ni biʼniʼ la? Pa qué ñuni perdonar Jehová binni ca nusihuinni naca ti Dios malu ne qué riá binni, peru nanna dxíchinu Jehová cadi zacá diʼ laa.

⁸ Ora guníʼ Jehová naca ti Dios ni napa misericordia, zanda guni crenu laabe, purtiʼ siempre riníʼ Jehová ni dxandíʼ (Sal. 31:5). Nga runi, pa raca nagana para lii guni creluʼ maʼ biʼniʼ perdonar Jehová lii, galán guiníʼ íqueluʼ pa naca Jehová ti Dios ni napa misericordia ne riá, ne runi perdonar guiráʼ ca ni raca arrepentir zanda chuʼluʼ seguru laaca maʼ biʼniʼ perdonarbe lii.

9. Casi riete lu Salmo 32:5, ¿ximodo runi perdonar Jehová laanu?

⁹ Guníʼ ique ni rusiidiʼ Jehová laanu lu Stiidxaʼ de modo runi perdonar. Guzéʼtenu ti ejemplu, gudxi David Jehová: «Lii biʼniʼ perdonarluʼ ra bicheeʼ ne ca pecadu stinneʼ» (biindaʼ Salmo 32:5). Diidxaʼ hebreu ni biʼniʼ traducírcabe lu versículo riʼ casi «perdonarluʼ» laaca riniʼni «guindisaluʼ» o «chineluʼ». Ngue runi ora biʼniʼ perdonar Jehová David, casi ñaca gundísabe ti cosa nanaa lu xiʼqueʼ ne zinebe ni. Ne guyuu David nayecheʼ ne gutadxí ladxidóʼ (Sal. 32:2-4). Laaca zanda guni sentirnu ni biʼniʼ sentir David pa gaca arrepentirnu de guidubi ladxidoʼno. Cadi caquiiñeʼ guárunu ca pecadu stinu, purtiʼ maʼ gundisa Jehová cani de lu xíʼquenu ne maʼ zinebe cani zitu.

10, 11. ¿Xi rusiidiʼ Salmo 86:5 laanu de Jehová?

¹⁰ (Biindaʼ Salmo 86:5). Guníʼ David nuu Jehová «listu para guni perdonar». Ndiʼ riníʼ ora rucheʼnu cadi nagueenda ridxiichi Jehová ne racaláʼdxibe guni perdonarbe guiráʼ binni ni gaca arrepentir. ¿Xiñee yaʼ? Laaca lu versículo ca ná: «Qué lica rusaana de gannaxhiiluʼ ca ni rucaa ridxi lii». Lu artículo gudiʼdiʼ ca bizíʼdinu, cayabi Jehová laanu qué zusaana de gannaxhii ca ni rusihuinni nadxii laa ne ca ni qué rixeleʼ de laa. Ne rucaa guendarannaxhii ca laabe guni perdonarbe de guidubi ladxidoʼbe ca binni ni gaca arrepentir (Is. 55:7). Pa raca nagana para lii guni creluʼ maʼ biʼniʼ perdonar Jehová lii, galán guiníʼ íqueluʼ: «Pa nannaʼ nuu Jehová listu para guni perdonar guiráʼ ca binni ni gaca arrepentir ne ca ni guinabaʼ guiabe laa. Laaca zanda chuaaʼ seguru maʼ biʼniʼ perdonar Jehová naa».

¹¹ Laaca rusiidiʼ Biblia, runibiáʼ chaahuiʼ Jehová laanu ne riénebe nácanu binni ruchee, ne ra gánnanu ni la? guizáʼ riguixhedxini ladxidoʼno (Sal. 139:1, 2). Guidúʼyanu sti salmo ni bicaa David, ni zacané laanu gánnanu zacá ni ne chuʼnu seguru racalaʼdxiʼ Jehová guni perdonar laanu.

XI RIETENALAʼDXIʼ JEHOVÁ DE LAANU

12, 13. Casi ná Salmo 103:14, ¿xi rietenalaʼdxiʼ Jehová ne xi rucaani laabe gúnibe?

¹² (Biindaʼ Salmo 103:14). Bizeeteʼ David ti razón xiñee nuu Jehová dispuestu guni perdonar ca binni ni gaca arrepentir, guniʼbe rietenalaʼdxiʼ Jehová «de yu laanu». Ndiʼ riníʼ, nanna Jehová nácanu binni ruchee ne rucheʼnu stale biaje. Yanna, guidúʼyanu xiruʼ guníʼ David lu versículo riʼ.

¹³ Bicaa David nanna dxichi Jehová «ximodo guyanu». Bizaʼbe Adán «de yu», neca bizaʼbe laa perfectu peru caquiiñeʼ gó, gasi ne guicaa bi (Gén. 2:7). Peru dxi bichee Adán ne Eva que la? laaca «de yu laanu» xi si la? yanna maʼ nácanu binni ruchee, ne nuu cosa ni cadi jneza ni ruquiinde laanu gúninu, ralenenu donda ne caquiiñeʼ gúninu stipa para cadi gúninu ni cadi jneza. Ne David guníʼ cadi nanna dxichi si Jehová nácanu binni ruchee, sínuque «rietenaláʼdxibe» ni. Diidxaʼ hebreu ni biquiiñeʼ lu Salmo 103:14 raca traducir ni casi «rietenaláʼdxibe» diidxaʼ riʼ qué riníʼsini nanna Jehová ni, sínuque rucaani laabe gúnibe xiixa para gacanebe laanu. Nga runi, cayabi versículo riʼ laanu riene Jehová ziuu biaje zucheʼnu, peru pa gaca arrepentirnu de guidubi ladxidoʼno ziabe laanu ne zuni perdonarbe laanu (Sal. 78:38, 39).

14. a) ¿Xiruʼ zanda gacané laanu chuʼnu seguru maʼ biʼniʼ perdonar Jehová laanu? b) ¿Ximodo rusihuinni ni bizaaca David dxandíʼ runi perdonar Jehová? (Laaca zanda gúʼyaluʼ cuadru ni láʼ «Runi perdonar Jehová ne rusiaandaʼ ca pecadu stinu»).

¹⁴ ¿Xiruʼ zanda gacané laanu chuʼnu seguru maʼ biʼniʼ perdonar Jehová laanu? (Biindaʼ Salmo 103:12). Guníʼ David ora runi perdonar Jehová laanu, zitu riguíxhebe ca pecadu stinu de laanu, «biaʼca zitu nuu de ra rindani gubidxa ne de ra riaazini». Ndiʼ riníʼ, guizáʼ zitu rinebe ca pecadu stinu cásica zitu nuu ra rindani gubidxa ne de ra riaazini. ¿Xi rusiidiʼ ndiʼ laanu yaʼ? Ti hombre ni nanna de Biblia bisiene: «Pa guizáʼ zitu riné Dios ca pecadu stinu, zanda chuʼnu seguru qué lica zietenaláʼdxibe cani, rusiaandabe ni casi ñaca qué lica nizaacacani» (El tesoro de David, de Charles Spurgeon, volumen 2, traducción de Samuel Vila). Nuu biaje ora chuʼxiinu ti xhoʼhuiiniʼ nagueendaca rusietenaláʼdxini laanu xiixa. Peru ora Jehová runi perdonar ca pecadu stinu qué lica rietenaláʼdxibe cani, nin ti xhoʼhuiiniʼ qué zucaa laabe guietenaláʼdxibe ni bíninu ne qué zuchabe ni lunu (Ezeq. 18:21, 22; Hech. 3:19).

15. ¿Xi zanda gúninu pa runi sentirnu náparunu donda pur ca pecadu ni bíninu dxiqué?

¹⁵ Pa runi sentirluʼ nápaluʼ donda pur ca pecadu ni bíʼniluʼ dxiqué, guníʼ ique ni ná Salmo 103 zacaneni lii guni creluʼ maʼ biʼniʼ perdonar Jehová lii. Ne galán guiníʼ íqueluʼ: «Pa rietenalaʼdxiʼ Jehová nacaʼ binni ruchee ne nuube listu para guni perdonarbe naa purtiʼ maʼ gucaʼ arrepentir, ¿ñee cadi laaca naquiiñeʼ guietenaladxeʼ ni la? Pa maʼ bisiaandaʼ Jehová ca pecadu ni bineʼ dxiqué ne qué ruchabe ni luaʼ, ¿ñee cadi laaca naquiiñeʼ gusiaandaʼ cani la?». Maʼ qué lica rietenalaʼdxiʼ Jehová ca pecadu ni bíʼniluʼ ni maʼ biʼniʼ perdonarbe lii, yanna, ¿xiñee lii cadi cusiaandaluʼ cani yaʼ? (Sal. 130:3). Ora guni creluʼ dxandíʼ maʼ biʼniʼ perdonar Jehová lii, zacaneni lii maʼ cadi guni sentirluʼ nápaluʼ donda pur ca pecadu ni bíʼniluʼ ne zúniluʼ ni ná Jehová né stale guendanayecheʼ.

16. ¿Xiñee cadi galán guicá íquenu puru si ra bicheʼnu? (Laaca zanda gúʼyaluʼ imagen ca).

¹⁶ Guzéʼtenu ti ejemplu, ora zigusa tuuxa ti carru ruuyabe lu retrovisor stibe para gúʼyabe tu nanda atrá de laabe ne chuʼbe listu pa guizaaca xiixa, peru pa nisi lu retrovisor ca guyadxibe la? zándaca zazaacabe xiixa. Nga runi, caquiiñeʼ guyadxibe delante. Zacagá nga ora guiníʼ íquenu ca pecadu ni bíninu dxiqué, gúninu ni peru para guizíʼdinu de laacani ne quixhe íquenu cadi gúninu cani sti biaje. Peru pa puru si laani nga guiníʼ íquenu la? zucaani laanu guni sentirnu nápanu donda ne maʼ qué zúninu ni ná Dios né stale gana. Nga runi, cadi gusaana de guyadxiluʼ delante, lu neza ra zeluʼ: neza ni ziné lii lu guidxilayú cubi, ra maʼ qué zazaaca cosa malu ne maʼ guirutiʼ tu zietenalaʼdxiʼ guiráʼ cosa guyuu dxiqué (Is. 65:17; Prov. 4:25).

BIʼNIʼ CRÉ NADXII JEHOVÁ LII NE MAʼ BIʼNIʼ PERDONARBE CA PECADU STILUʼ

17. ¿Xiñee naquiiñeʼ gucaʼnu ladxidoʼno guni cré nadxii Jehová laanu ne maʼ biʼniʼ perdonar laanu?

¹⁷ Guiranu caquiiñeʼ gucaʼnu ladxidoʼno guni cré nadxii Jehová laanu ne nuube listu para guni perdonarbe laanu (1 Juan 3:19, nota). ¿Xiñee yaʼ? Purtiʼ qué zusaana Binidxabaʼ de guyubi gucaa laanu guiníʼ íquenu cadi nadxii Jehová laanu ne qué ziuudxí guni perdonarbe laanu. Ni racalaʼdxiʼ Binidxabaʼ nga gusaana de gúninu ni ná Jehová. Ne cumu nánnabe maʼ huaxiéʼ tiempu nápabe la? jma nadipaʼ modo zucaalube laanu (Apoc. 12:12). ¡Cadi gudiʼnu lugar guxhélebe laanu de Jehová!

18. ¿Xi zanda gúniluʼ para guni creluʼ nadxii Jehová lii ne maʼ biʼniʼ perdonar lii?

¹⁸ Lu artículo ni gudiʼdiʼ que bidúʼyanu xi zanda gacané lii para guni creluʼ nadxii Jehová lii. Ne lu artículo riʼ maʼ bidúʼyanu xi naquiiñeʼ gúniluʼ para guni creluʼ maʼ biʼniʼ perdonar Jehová lii. Guníʼ ique ximodo maʼ guníʼ Jehová naca ne ni rusiidiʼ Biblia de modo runi perdonarbe. Bietenalaʼdxiʼ nanna Jehová nácaluʼ binni ruchee ne riabe lii. Ne cadi guiaandaʼ lii runi perdonar Dios de guidubi ladxidóʼ. Pa gúniluʼ guiráʼ ni maʼ bizéʼtenu riʼ zanda guiniʼluʼ cásica guníʼ David: «¡Xquixe peʼ lii, Jehová, purtiʼ “lii biʼniʼ perdonarluʼ ra bicheeʼ ne ca pecadu stinneʼ”!» (Sal. 32:5).