Nany/stock.adobe.com
¿Xi rusiidiʼ Biblia zazaaca né hambre ni nuu lu guidxilayú?
«Maʼ qué ziuu hambre». Nga nga ni cá ique ca gobiernu ca gúnicaʼ para guni chaahuicaʼ tobi de ca guendanagana ni jma naroʼbaʼ nuu lu guidxilayú: racaláʼdxicabe gapa guiráʼ binni ni go.a Peru ¿ñee ziuu dxi maʼ qué ziuu hambre la? ¿Xi caníʼ Biblia de laani?
Maca cá lu Biblia zaxiéʼ guendaró
Maca cá lu Biblia tiempu nabáninu riʼ, «ca últimu dxi», zaxiéʼ guendaró (2 Timoteo 3:1). Neca maca guníʼ Dios zazaacani peru cadi laadibe nga nápabe donda pur laani (Santiago 1:13). Biiyaʼ xi ná chupa profecía ni cá lu Biblia.
«Ziuu hambre [...] ti lugar ne sti lugar» (Mateo 24:7). Lu profecía riʼ ná ziuu hambre stale lugar. Ti informe ni bidii ca binni ni ruuyaʼ gapa binni ni go ná: «Jma maʼ cadale binni ni qué gapa ni go, zeʼ dxi jma maʼ stale binni qué rizaa ni go ne maʼ qué rocaʼ ni gacané laaca chuʼcaʼ nazaaca».b Ndaaniʼ stale guidxi maʼ qué rizaa ni go binni ne pur nga stale de laacabe rati.
«Óraque biiyaʼ ti caballu yaaseʼ. Ne naaze ni dxiʼbaʼ laame que ti balanza» (Apocalipsis 6:5). Lu profecía riʼ, caballu ne ni dxiʼbaʼ laame ca riníʼcani hambre ni ziuu lu ca últimu dxi.c Ni dxiʼbaʼ laame ca naaze ti balanza para cuʼbiaʼ ne quiʼziʼ caadxi guendaró ni nuu. Ne laga dxíʼbabe caballu que biree ti ridxi ni ná guizáʼ caru ziuu guendaró ne caguixhénani binni cadi gusaʼbiʼ guendaró (Apocalipsis 6:6). Ndiʼ culuíʼ ni peʼ cazaaca ca dxi nabáninu riʼ, millón de binni raca nagana para laacaʼ gápacaʼ ni gocaʼ o sicaʼ guendaró ni gacané laaca chuʼcaʼ nazaaca.
Maʼ qué ziuu hambre
Cani nanna de planeta stinu riʼ nacaʼ rudii ni stale guendaró jma de biaʼ caquiiñeʼ binni. Yanna, ¿Xiñee stale binni qué gapa ni go yaʼ? Ne casi ná Biblia, ¿xi zuni Jehová,d Dios ni bizáʼ laanu, para gaca chaahuiʼ guendanagana riʼ yaʼ?
Guendanagana: Qué ganda cuee ca gobiernu ca guendapobre ne guiráʼ cosa ni cadi jneza raca ni runi guiaadxaʼ ni go binni.
Ni zuni chaahuini: Zedandá dxi zaree ca gobiernu ni nuu lu guidxilayú riʼ ne ziuu ti gobiernu ni qué ruchee: Reinu stiʼ Dios ne Jesucristu nga Rey stini (Daniel 2:44; Mateo 6:10). Ca dxi riʼ, stale binni pobre raca nagana para laacaʼ sicaʼ guendaró. Peru maʼ cadi zacá diʼ zaca ni ora maʼ guni mandar Reinu stiʼ Dios. Ndiʼ nga ni ná Biblia zuni Jesús: «Zulabe binni pobre ni canabaʼ tu gacané laa, ne zaqueca ca humilde ni qué gapa tu gacané laa. [...] Ziuu stale biidxiʼ lu guidxilayú, lu ca dani ca jma stale ziuu» (Salmo 72:12, 16).
Guendanagana: Nabé runiná ca guerra ca ne rixiéʼ bueltu ne pur laacani maʼ qué randa ricaa binni guendaró biaʼ caquiiñeʼ.
Ni zuni chaahuini: Runduuxeʼ Jehová «guerra lu guidubi guidxilayú. Rigúzabe arcu ne ruxuuxebe lanza; rucaaguibe carru stiʼ ca soldadu lu guí» (Salmo 46:9). Zunitilú Dios ca guiibaʼ ni riquiiñeʼ binni lu guerra ne ca binni ni ruyubi chuʼ guerra. Pur ni chiguni Dios, guiráʼ binni zapa ni go. Biblia ná: «Zadale ca ni nachaʼhuiʼ, ne ziuu stale paz» (Salmo 72:7).
Guendanagana: Cumu nabé maʼ bichaa clima ne nabé raca desastre natural la? riniti stale cosecha ne rati stale maniʼ.
Ni zuni chaahuini: Zucueeza Dios stipa stiʼ naturaleza ne zapa ca layú ca stipa para gudiicaʼ guendaró. Biblia ná: Riguixhedxí Jehová «bi yooxhoʼ, ratadxí ca ola stiʼ nisadóʼ». [...] Rúnibe desiertu lugar ra dáʼ nisa ra nuu stale nite ne rúnibe guidá nisa lu layú nabidxi. Rúnibe cueza ca binni ni candaana lugar ca [...]. Rudxiibacabe lu layú ne ruzuhuaacabe lubáʼ uva ni rudii stale cosecha» (Salmo 107:29, 35-37).
Guendanagana: Ca binni malu ni ruyubi puru si para laa ruzaʼcaʼ guendaró ni guniná binni ne qué rudiicaʼ lugar chindá guendaró ra nuu ca binni ni caquiiñeʼ ni.
Ni zuni chaahuini: Zunduuxeʼ Reinu stiʼ Dios guiráʼ binni ni qué runi ni jneza (Salmo 37:10, 11; Isaías 61:8). Biblia ná runi Jehová «justicia ca binni ni maʼ gucaná ne rudiibe pan ca ni candaana» (Salmo 146:7).
Guendanagana: Guiráʼ iza, riniti o rusáʼbicabe biaʼ ti 30% de guendaró.
Ni zuni chaahuini: Jneza modo zaguiiziʼ Reinu stiʼ Dios guendaró para binni. Dxi guyuu Jesús lu guidxilayú biiyabe cadi gusáʼbicabe guendaró. Casi ti biaje la? bíʼnibe ti milagru ra biyaanabe jma de gaayuʼ mil binni. Despué gúdxibe ca discípulo stibe: «Lagutopa ca pedazu ni biʼniʼ sobra ti cadi gusáʼbinu gastiʼ» (Juan 6:5-13).
Guiráʼ binni zabani galán ne zapa stale ni go ora cuee Reinu stiʼ Dios guiráʼ ca guendanagana ni rucaa chuʼ hambre (Isaías 25:6). ¿Padxí gácani yaʼ? Para gánnaluʼ ni, biindaʼ artículo ni láʼ «¿Padxí guni mandar Reinu stiʼ Dios binni guidxilayú?».
a Agenda 2030 sobre el Desarrollo Sostenible, guca aprobar ni lu iza 2015 pur guiráʼ guidxi ni nuu lu Naciones Unidas.
b Informe ni biʼniʼ Organización de las Naciones Unidas para la Alimentación y la Agricultura, Fondo Internacional de Desarrollo Agrícola, Fondo de las Naciones Unidas para la Infancia, Programa Mundial de Alimentos de las Naciones Unidas ne Organización Mundial de la Salud.
c Para gánnaluʼ jma de guidapa jinete ni riete lu Apocalipsis, biiyaʼ artículo ni láʼ «¿Qué representan los jinetes del Apocalipsis?».
d Jehová nga láʼ Dios (Salmo 83:18). Biiyaʼ artículo ni láʼ «¿Tuu nga Jehová?».