¿Tu gapaʼ ca binni ni nabeza ra cayaca guerra yaʼ? | ¿Xi caní’ Biblia de laani?

Ndi’ nga ni cuzeeteʼ Naciones Unidas:

• Dede 7 hasta 23 de octubre de 2023, pur guerra ni cayaca ndaaniʼ guidxi Gaza ne Israel ma’ guti jma de xhoopaʼ mil tapa gayuaa binni ne maʼ gucaná quince mil chupa gayuaa, stale de laacabe cadi nuucabe lu guerra ca. Ne stale tu ma’ bisaana lidxi.

• Pur guerra ni cayaca Rusia ne Ucrania, 24 de septiembre de 2023 que, ma’ guti stale binni ni nabeza ndaaniʼ ca guidxi ca, biaʼsi gaʼ mil gadxe gayuaa tobi, ne bisaanani diecisiete mil gadxe gayuaa cuarenta y ocho heridu ndaani’ guidxi Ucrania.

¿Rudii Biblia xiixa esperanza para ca binni ni cayacaná pur ca guerra ca la?

Ni racané gápanu esperanza

Maca cá lu Biblia zunduuxe’ Dios guirá’ guerra ni nuu lu guidubi Guidxilayú (Salmo 46:9). Ne zaquiiñeʼ Reinu stiʼ ni nuu guibá para cuee guirá’ ca gobiernu ni nuu lu Guidxilayú (Daniel 2:44). Zacané Reinu sti’ Dios gatadxí ladxidóʼ binni guidxilayú.

Biiya’ xi chiguni Jesucristu, Rey sti’ Reinu sti’ Dios:

• «Zulabe binni pobre ni cucaa ridxi para gacanécabe laa, ngueca ni cuquiichinácabe laa ne tutiica ni qué gapaʼ tu gacané laa. Ziabe binni ni cuquiichinácabe laa ne binni pobre. Ne zulabe xpida ca binni pobre. Zulabe laacaʼ de ca ni cuquiichináʼ laacaʼ ne de ca binni ni ridinde, nabé zasaca rini sticaʼ nezalube» (Salmo 72:12-14).

Zaquiiñe’ Dios Reinu sti’ para gunduuxe’ guirá’ guendananá ne yuubaʼ ni reedané ca guerra ca.

• «Zuchaabe nisa riete lucaʼ, maʼ qué ziuuruʼ guendaguti, maʼ guirutiʼ qué ziuu triste, maʼ guirutiʼ qué zuunaʼ ne maʼ qué ziuuruʼ yuubaʼ. Maʼ gudiʼdiʼ guiráʼ ni guyuu dxiqué» (Apocalipsis 21:4).

Maʼ cadi candaa zabee Reinu sti’ Dios guiráʼ cosa feu ni nuu lu Guidxilayú riʼ. ¿Ximodo nánnanu ni ya’? Purti’ maca bizeete’ Biblia ziuu «guerra ne noticia de guerra» ni cadúʼyanu cazaaca ca dxi nabáninu riʼ (Mateo 24:6). Ca ni maʼ bizéʼtenu ca ne xcaadxi cosa ni cazaaca cusihuinni ca ni ma’ nabáninu lu ca «últimu dxi» sti’ ca gobiernu nuu lu guidxilayú (2 Timoteo 3:1).