Zuba Jesucristu, Rey sti’ Reinu sti’ Dios, lu trono sti’

¿Xii nga Reinu stiʼ Dios?

Ni caní’ Biblia de laani

Reinu stiʼ Dios nga ti gobiernu ni gudixhe Jehová Dios. Cumu guibáʼ nga nuuni la? nga runi lu Biblia riete laani nga «Reinu ni nuu guibáʼ» (Marcos 1:14, 15; Mateo 4:17). Neca runi ca gobiernu ca stipa gacaneca’ binni, peru qué zanda guchaaganu ni né guirá’ ni chiguni Reinu sti’ Dios.

Ca ni chiguni mandar. Ma’ gulí Dios Jesucristu para gaca Rey lu Reinu sti’ Dios ne ma’ gucuaabe guirá’ xixé autoridad guibá’ ne lu Guidxilayú ne nin ti gobiernu ni nuu lu Guidxilayú ri’ qué gapa autoridad bia’ napa Jesús (Mateo 28:18). Riquiiñe’ Jesús poder ni napa para guni ni jneza. Ne ma’ bisihuínnibe rizaalá’dxibe binni ne zanda gacanebe laaca’ (Mateo 4:23; Marcos 1:40, 41; 6:31-34; Lucas 7:11-17). Ma’ bidii Dios lugar Jesús cui’ caadxi binni de guirá’ nación para checa’ guibá’ ne guni mandarneca’ Jesús lu guidubi Guidxilayú ri’ (Apocalipsis 5:9, 10).
Pabiá’ zandaani. Ma’ gadxé Reinu sti’ Dios de ca gobiernu nuu lu Guidxilayú ri’, purti’ laaca’ ma’ nexhe pabiá’ tiempu guni mandarca’, peru Reinu sti’ Dios «qué ziuu dxi guinitilú» (Daniel 2:44).
Ca binni ni chiguni mandar gobiernu ca. Guirá’ binni ni guni ni ná Dios zanda guni mandar gobiernu ri’ laaca’, gasti’ naca xi guidxi laaca’ (Hechos 10:34, 35).
Ley. Ca ley (o ca mandamientu) sti’ Dios qué rábisini ca xpínnibe gusaana de gúnica’ ni cadi jneza, sínuque laaca racaneni laaca’ guibánica’ jma nayá. Biblia ná: «“Gunnaxhii Jehová Dios stiluʼ de guidubi ladxidoʼloʼ, de guidubi xhiálmaluʼ ne de guidubi xquendabiaaniluʼ”. Ndiʼ nga primé mandamientu ne ni jma risaca. Ne guiropa ni zeeda gaca casi laani que, ná: “Gunnaxhii prójimo stiluʼ cásica nadxiiluʼ lii”» (Mateo 22:37-39). Guendarannaxhii ni nápacabe Dios ne binni, zucaani laacabe gácacabe nacha’hui’ né guirá’.
Modo rusiidini. Cadi rabi si Reinu sti’ Dios ca xpinni ximodo naquiiñe’ guibánica’, sínuque rusiidi’ ni laaca’ ximodo gúnica’ ni (Isaías 48:17, 18).
Xi chigunini. Cadi naca Reinu sti’ Dios casi ca gobiernu ni nuu yanna, purti’ laaca’ ricaaca’ bueltu sti’ ca xpínnica’ para gácaca’ ricu. Peru Reinu sti’ Dios zacaneni gaca ni ma’ gudixhe ique Dios lu Guidxilayú ri’. Ne tobi de laacani nga gudiini guendanabani ni qué zaluxe ca binni ni nadxii Dios ora ma’ gaca Guidxilayú ri’ ti paraísu (Isaías 35:1, 5, 6; Mateo 6:10; Apocalipsis 21:1-4).