Ñee bíʼnipeʼ ca testigu stiʼ Jehová Biblia sticaʼ la?
Ca testigu stiʼ Jehová huaquiiñecaʼ gadxé gadxé traducción para gúʼndacaʼ Biblia. Peru nuu ti traducción ni jma riuuláʼdxicabe iquiiñecabe ne nuuni lu stale diidxaʼ. Laani nga Traducción del Nuevo Mundo de las Santas Escrituras. Xiñee riuuláʼdxicabe iquiiñecabe ni yaʼ. Purtiʼ luni zeeda lá Dios, biaʼsi cani cá luni ne qué riquiiñeʼ ni diidxaʼ nagana.
Zeeda lá Dios luni. Cadi guiráʼ diʼ cani runi traducir Biblia rusisácacaʼ lá Dios, ni guníʼ xi guicá luni. Casi lu ti traducción, zeeda ti lista ra cá lá jma de setenta binni ni gucané para guca ni, peru nin ti biaje qué ruzeeteni lá Jehová, ni guniʼpeʼ xi guicá lu Biblia.
Peru lu Traducción del Nuevo Mundo zeeda lá Dios guiráʼ ra bicaacabe ni dede primé biaje gucuá Biblia ne cadi lica cayeeteʼ lá ca binni ni biʼniʼ traducir ni.
Biaʼ si cani cá luni. Cadi guiráʼ traducción rutiixhi cani zeeda lu Biblia jneza. Guidúʼyanu ejemplu stiʼ ti traducción. Lu Mateo 7:13 bitiixhicabe ca diidxaʼ riʼ sicaríʼ: «Laguiuu neza ni napa puertaʼ nabéʼ, purtiʼ neza ni xilaga puertaʼ stiʼ la? zeni infiernu». Peru cadi zeeda diidxaʼ «infiernu» lu ca primé guiʼchiʼ gucuá Biblia, sínuque zeeda diidxaʼ «guinitilú». Zándaca guníʼ ique cani biʼniʼ traducción que racaná binni ndaaniʼ ti infiernu. Peru cadi cuzeeteʼ diʼ Biblia nga. Nga runi, lu Traducción del Nuevo Mundo cá «guinitilú» cásica cá ni lu ca primé guiʼchiʼ.
Qué riquiiñeʼ ni diidxaʼ nagana. Ti traducción naquiiñeʼ gaca ni biaʼsi, peru laaca naquiiñeʼ guiene binni ni. Guzéʼtenu ti ejemplu. Stale versión qué runi traducircaʼ Mateo 5:3 jneza ne riniʼcaʼ sicaríʼ: «Dichoso cani naca pobre de espíritu». Peru huaxiéʼ si tu riene ni ná ca diidxaʼ ca. Ngue runi, Traducción del Nuevo Mundo rutiixhi ca diidxaʼ ca sicaríʼ: «Nayecheʼ cani nanna naquiiñeʼ chuʼ gaxha de Dios».
Casi maʼ bidúʼyanu ca, Traducción del Nuevo Mundo rusisaca lá Dios, biaʼsi cani cá luni, qué riquiiñeʼ ni diidxaʼ nagana. Peru nuu sti cosa ni naquiiñeʼ gánnanu de laani: qué riguixe binni para guicaa ni. Nga runi, millón de binni zanda guʼndaʼ ni lu diidxaʼ gulené, neca qué gápacaʼ bueltu para sicaʼ ti Biblia.