¿Xi rusiidiʼ Biblia de ora rudii binni de ni napa?
Ni ricabi Biblia
Rusiidiʼ Biblia laanu gudiʼnu de ni nápanu de guidubi ladxidoʼno. Pa gúninu ni la? zacanenu binni ca ne laaca zabeendunu ni galán (Proverbios 11:25; Lucas 6:38). Jesús guníʼ: «Jma nayecheʼ riuu binni ora rudii que ora ricaa» (Hechos 20:35).
¿Pora zanda gudiʼnu de ni nápanu?
Ora rudiʼnu de ni nápanu ribeendunu ni galán. Biblia ná: «Cada tobi gudii biaʼ maʼ biʼniʼ decidir, cadi gudii ni de mala gana ne cadi gudii ni pur cayuni obligárcabe laa, purtiʼ nadxii Dios ca binni ni rudii né guendanayecheʼ» (2 Corintios 9:7).
Racalaʼdxiʼ Dios gudii ca ni runi adorar laa de guidubi ladxidoʼcaʼ (Santiago 1:27). Pa gacanenu ca ni caquiiñeʼ ni la? cayacanenu Dios, ne laa zaguíxebe ni laanu (Proverbios 19:17). Ne Biblia ná zaguu Dios ndaayaʼ laanu (Lucas 14:12-14).
¿Pora qué zanda gudiʼnu de ni nápanu?
Ora ruyúbinu puru si para laanu. Guzéʼtenu caadxi ejemplu:
Para si gusisácacabe laanu (Mateo 6:2).
Para si gudiicabe laanu xiixa (Lucas 14:12-14).
Para si guilanu (Salmo 49:6, 7).
Ora racanenu tuuxa para guni xiixa ni qué riuulaʼdxiʼ Dios. Guzéʼtenu caadxi ejemplu, cadi jneza gudiʼnu bueltu tuuxa binni para quiteʼ apuesta, xhudxi o gaca drogar (1 Corintios 6:9, 10; 2 Corintios 7:1). Laaca cadi jneza gudiʼnu bueltu tuuxa binni ni qué naʼ guni dxiiñaʼ neca zanda guni ni (2 Tesalonicenses 3:10).
Ora zanda gucueeza ni laanu de guni cumplirnu né ca responsabilidad ni maʼ bidii Dios laanu. Biblia ná caquiiñeʼ gudii ti xaíque stiʼ ti familia ni caquiiñeʼ familia stiʼ (1 Timoteo 5:8). Neca risaca gudiʼnu de ni nápanu xcaadxi la? cadi guianda laanu ni jma risaca nga gudiʼnu ni caquiiñeʼ familia stinu. Laaca guníʼ Jesús cadi jneza runi ca binni ni qué rapa bixhoze ne jñaa ni maʼ huaniisi purtiʼ riníʼ íquecaʼ guiráʼ ni nápacaʼ «ti regalu para Dios ni» (Marcos 7:9-13).