¿Ñee zanda gacané Biblia naa pa maʼ guníʼ iqueʼ guuteʼ laca naa la?

Ni ricabi Biblia

Zanda gacané Biblia lii purtiʼ Stiidxaʼ Dios ni ne laabe riguixhedxibe ladxidóʼ ca ni cayacaná (2 Corintios 7:6). Neca cadi ti libru de medicina nga Biblia la? peru huayacané ni stale binni ni huaníʼ ique guuti laca laa. Nabé galán ca conseju ni zeeda lu Biblia ne zanda gacanécani lii.

• ¿Gunáʼ nga ca conseju ni riete lu Biblia ni zanda gacané laanu?

• ¿Ñee riníʼ Biblia de tuuxa binni ni gunabaʼ gatiʼ la?

• ¿Xi versículo zeeda lu Biblia zanda gacané lii cadi guiníʼ íqueluʼ guutiluʼ laca lii?

• ¿Xi zanda gúninu pa gabi ti xhamígunu laanu maʼ racalaʼdxiʼ gatiʼ?

• ¿Pa maʼ gucalaʼdxeʼ guuteʼ laca naa yaʼ?

¿Gunáʼ nga ca conseju ni riete lu Biblia ni zanda gacané laanu?

• ● Guníʼ ni cayuni sentirluʼ.

  Ni ná Biblia: «Ni dxandíʼ xhamígunu la? guiráʼ ora nadxii laanu, ne zácabe bíchinu ora nápanu xiixa guendananá» (Proverbios 17:17).

  Xi riníʼ ni: Pa nuunu xizaa ne nisi laani maʼ ca íquenu la? caquiiñenu tu gacané laanu.

  Pa qué guiniʼluʼ xi cayuni sentirluʼ la? nabé zacanaluʼ. Peru pa guiniʼluʼ xi cayuni sentirluʼ maʼ qué ziuuluʼ xizaa ne zuuyaluʼ zanda gaca chaahuiʼ ca guendanagana stiluʼ.

  

  Zanda gúniluʼ ndiʼ: Yannadxica guniʼné ti familia stiluʼ o ti xhamíguluʼ ni nápaluʼ confianza laa.a Laaca zanda gucaaluʼ xi cayuni sentirluʼ.

• ● Guyé ra nuu doctor.

  Ni ná Biblia: «Ca binni nazaaca cadi caquiiñeʼ checaʼ ra nuu doctor, peru ca ni huará caquiiñeʼ checaʼ» (Mateo 9:12).

  Xi riníʼ ni: Ora huaranu la? caquiiñeʼ chuunu ra nuu doctor.

  Pa riníʼ tuuxa guuti laca la? zándaca rúnini purtiʼ napa ti guendahuará mental o emocional. Ne cásica qué rituí lunu guininu nápanu xiixa guendahuará, laaca cadi naquiiñeʼ guituí lunu guininu nápanu ti guendahuará mental o emocional. Ne nuu tratamientu para ca tipu guendahuará riʼ.

  Zanda gúniluʼ ndiʼ: Biyubi gacané ti doctor lii, nagueendaca.

• ● Cadi guiaandaʼ lii risácaluʼ para Dios.

  Ni ná Biblia: «¿Cadi dxandíʼ ridoo gaayuʼ gorrión pur chupa moneda ni huaxiéʼ risaca la? Peru qué rusiaandaʼ Dios nin tobi de laacame. [...] Cadi guidxíbitu. Jma risácatu que stale gorrión» (Lucas 12:6, 7).

  Xi riníʼ ni: Nabé risácaluʼ para Dios.

  Zándaca guni sentirluʼ nuuluʼ stúbiluʼ, peru cadi zacá ni. Purtiʼ nanna Dios xi cazaacaluʼ. Ne pa riníʼ íqueluʼ maʼ qué gápaluʼ gana guibániluʼ la? cadi guiaandaʼ lii rizaalaʼdxiʼ Dios lii. Salmo 51:17 ná, qué rucaanáʼ Dios ca ni «cayuubaʼ ladxidóʼ». Rihuinni dxíchica nadxii Dios lii ne racalaʼdxiʼ guibániluʼ.

  Zanda gúniluʼ ndiʼ: Zadxélaluʼ lu Biblia caadxi razón ni rusihuinni nadxii Dios lii. Lu capítulo 24 stiʼ libru Acerquémonos a Jehová zadxélaluʼ caadxi de laacani.

• ● Biʼniʼ orar Dios.

  Ni ná Biblia: «Laga culaatu guiráʼ ni riguu xizaa laatu luguiabe, purtiʼ rizaaláʼdxibe laatu» (1 Pedro 5:7).

  Xi riníʼ ni: Racalaʼdxiʼ Dios gábiluʼ laa xi cayuni sentirluʼ ne xi naguu xizaa lii.

  Zanda gudii Dios stipa lii ne quixhedxí ladxidoʼloʼ para gudxiiluluʼ ca guendanagana ni nápaluʼ (Filipenses 4:6, 7, 13). Zacá nga racané Dios ca binni ni ridxiña laa (Salmo 55:22).

  

  Zanda gúniluʼ ndiʼ: Yannadxica biʼniʼ orar Dios. Biquiiñeʼ labe, Jehová, ne gudxi laabe xi cayuni sentirluʼ (Salmo 83:18). Gunabaʼ laabe gacanebe lii gudxiiluluʼ ca guendanagana ni nápaluʼ.

• ● Guníʼ ique ximodo ná Biblia chiguibáninu despué.

  Ni ná Biblia: «Naaze dxiichiʼ esperanza riʼ xpídanu, cásica rinaaze dxiichiʼ ti ancla barcu ne nánnanu zaca cumplir ni» (Hebreos 6:19).

  Xi riníʼ ni: Cásica runiibi ti tormenta ti barcu. Ngaca nga zanda guizaacaluʼ né ni runi sentirluʼ. Peru esperanza ni rudii Biblia zeeda gácani casi ti ancla ni naaze dxiichiʼ lii.

  Cadi ti bacaandaʼ si nga esperanza riʼ, sínuque dxandíʼ zuni cumplir Dios guiráʼ ni maʼ guníʼ ne zabee guiráʼ ca cosa malu ni runiná laanu (Apocalipsis 21:4).

  Zanda gúniluʼ ndiʼ: Pa racaláʼdxiluʼ gánnaluʼ jma de esperanza ni riete lu Biblia la? zanda gúʼndaluʼ artículo ni láʼ «La esperanza real de un mañana mejor».

• ● Biʼniʼ xiixa ni riuuláʼdxiluʼ.

  Ni ná Biblia: «Ora nayecheʼ nuu ladxidóʼ binni racaneni laa para guianda» (Proverbios 17:22).

  Xi riníʼ ni: Gúniluʼ cosa ni riuuláʼdxiluʼ la? zacaneni lii chuʼluʼ nazaaca en sentidu mental ne emocional.

  

  Zanda gúniluʼ ndiʼ: Biʼniʼ xiixa ni maca riuuláʼdxiluʼ. Zanda gucaadiágaluʼ música ni racané lii guni sentirluʼ galán, zanda gúʼndaluʼ xiixa ni cuʼ gana lii o gúniluʼ xiixa para gaca divertirluʼ. Laaca ziuuluʼ nayecheʼ pa gacaneluʼ xcaadxi neca ti cosahuiiniʼ si gúniluʼ pur laacabe (Hechos 20:35).

• ● Biyubi chuʼluʼ nazaaca.

  Ni ná Biblia: «Racané ejerciciu cuerpu stinu»(1 Timoteo 4:8).

  Xi riníʼ ni: Pa gúniluʼ ejerciciu, guiziiláʼdxiluʼ ne goloʼ guendaró ni gacané lii la? ziuuluʼ nazaaca.

  Zanda gúniluʼ ndiʼ: Biʼniʼ stipa saluʼ neca quince minutu.

• ● Cadi guiaanda lii cásica ruchaa xiixa lu xquendanabáninu, ngaca zanda guizaaca né ca sentimientu stinu.

  Ni ná Biblia: «Qué gánnatu xi chigaca de laatu guixíʼ»(Santiago 4:14).

  Xi riníʼ ni: Ra tidiʼ tiempu zanda gaca chaahuiʼ ca guendanagana ni nápanu.

  Dede ca guendanagana jma nadipaʼ ni nápanu zanda gacachaahuiʼ ca ni de ti dxi sti dxi. Nga runi, cadi guireeluʼ gana (2 Corintios 4:8). Zanda guchaa ca guendanagana ni jma naguu xizaa lii, peru ni qué zanda guchaa nga guuti ti binni laca laa.

  Zanda gúniluʼ ndiʼ: Zanda gúʼndaluʼ caadxi relatu ni riete lu Biblia stiʼ caadxi binni ni nabé guyuu triste ne gunábacaʼ gáticaʼ. Biiyaʼ ximodo bichaa xquendanabánicabe ra gudiʼdiʼ tiempu, nuu biaje dede modo cadi cabézacabe ni. Guidúʼyanu caadxi ejemplu.

¿Ñee riníʼ Biblia de tuuxa binni ni gunabaʼ gatiʼ la?

Riníʼ. Lu Biblia riete de caadxi binni ni gunábacaʼ gáticaʼ. Qué nidxiichiné Dios laacabe, sínuque gucané laacabe. Ne laaca zanda gacanebe lii.

Elías

• ● ¿Tu guca Elías yaʼ? Neca guca Elías ti profeta nabé nadxibalú, guyuu biaje bireebe gana. Santiago 5:17 ná «guca Elías ti hombre de sentimientu cásica laanu».

• ● ¿Xiñee gunabaʼ Elías gatiʼ yaʼ? Purtiʼ biʼniʼ sentirbe stúbibe, bidxíbibe ne guníʼ íquebe qué risácabe. Nga runi, guniʼbe: «Biiti naa yanna Jehová» (1 Reyes 19:4).

• ● ¿Xi gucané laabe yaʼ? Bixhele Elías ladxidóʼ nezalú Dios ne gudxi laa xi runi sentir. ¿Ximodo gucané Jehová laabe yaʼ? bisihuinni Jehová dxandíʼ peʼ rizaalaʼdxiʼ laabe ne bidii lugar gúʼyabe pabiáʼ poder napa. Laaca gudxi laabe nácabe ti binni nabé risaca ne gulí ti binni ni zanda gacané ne gapa laabe.

• ▸ Zanda gúʼndaluʼ jma de Elías: 1 Reyes 19:2-18.

Job

• ● ¿Tu guca Job yaʼ? Gúcabe ti hombre ricu, gúpabe ti familia naroʼbaʼ ne biʼniʼ adorarbe Dios ni dxandíʼ.

• ● ¿Xiñee gunabaʼ Job gatiʼ yaʼ? De ti dxi sti dxi bichaa xquendanabani Job. Binítibe guiráʼ ni nápabe, guuti ca xiiñibe ne gúpabe ti guendahuará nabé malu. Ne cadi ngasi, laaca bigaanicabe donda íquebe pur ca ni cazaacabe que. Cumu maʼ bixhacalaʼdxiʼ Job modo nabani que la? dede gúdxibe Dios maʼ qué racaláʼdxibe guibánibe (Job 7:16).

• ● ¿Xi gucané laabe yaʼ? Biʼniʼ orar Job Jehová ne laaca guniʼné xcaadxi binni (Job 10:1-3). Elihú, ti xhamígube, biene ne guluu gana laabe ne cadi ngasi laaca gucané laabe gudxiilube ca guendanagana ni cadíʼdibe que. Peru ni jma galán nga bidii Job lugar gacané Dios laa.

• ▸ Zanda gúʼndaluʼ jma de Job: Job 1:1-3, 13-22; 2:7; 3:1-13; 36:1-7; 38:1-3; 42:1, 2, 10-13.

Moisés

• ● ¿Tu guca Moisés yaʼ? Gúcabe ti xaíque ndaaniʼ guidxi Israel ne gúcabe ti profeta ni qué nusaana Dios.

• ● ¿Xiñee gunabaʼ Moisés gatiʼ yaʼ? Gucuaa Moisés stale dxiiñaʼ, nabé biʼniʼ criticarcaʼ laabe ne guyuu biaje guizáʼ bidxágabe. Nga runi gunábabe Jehová guuti laabe (Números 11:11, 15).

• ● ¿Xi gucané laabe yaʼ? Cumu gudxi Moisés Dios ximodo cayuni sentir la? gucané Dios laabe guisisi ca dxiiñaʼ stibe ti gúnibe ni né stale guendanayecheʼ.

• ▸ Zanda gúʼndaluʼ jma de Moisés: Números 11:4-6, 10-17.