Ca visión biʼyaʼ Juan

Dxi deguyoo apóstol Juan lu isla stiʼ Patmos, biluíʼ Jesús laabe 16 visión o cosa ni chiguizaaca despué. Lu ca visión riʼ, biiyaʼ Juan ximodo zasaca lá Jiobá, ximodo chigueeda Reinu stiʼ Dios ne ximodo zaca ni ná Jiobá guibáʼ ne ndaaniʼ Guidxilayú.

Lu ti visión biiyaʼ Juan trono stiʼ Dios. Guidubi buelta trono que zuba 24 ancianu. Nácucaʼ lari blancu ne nuu ti corona de oro íquecaʼ. De lu trono que casi ora caxidxi ne caree jma xpiaaniʼ rayu. Zuxibi ca 24 ancianu que xañee Jiobá ne cayuni adorarcaʼ laabe. Lu sti visión, biiyaʼ Juan ti gran muchedumbre o ti grupu de binni de guiráʼ xixé guidxi ne idioma ni cayuni adorarcaʼ Jiobá. Laaca biiyabe ti Dendxuhuiiniʼ, Dendxuhuiiniʼ ca nga Jesús ne laabe nga pastor ni cayapa ca binni riʼ ne rinebe laacaʼ ra ridá nisa ni rudii guendanabani. Lu sti visión, biiyabe cayuni mandarné Jesús 24 ancianu casi rey guibáʼ. De raqué, biiyaʼ Juan sti visión, biiyabe cadindené Jesús ti Dragón, o Binidxabaʼ, ne ca demonio stiʼ. Gulee Jesús laacabe de guibáʼ ne bisaba laacabe ndaaniʼ Guidxilayú riʼ.

Despué de ngue, biiyaʼ Juan ti visión sicarú stiʼ Dendxuhuiiniʼ que ne 144 mil binni lu dani Sion. Laaca biiyabe ti ángel ni canapapa lu guidubi Guidxilayú ni caníʼ: «Laguidxibi Dios ne lagusisaca laa».

Lu sti visión, biiyabe guerra ni láʼ Armagedón. Lu guerra riʼ biʼniʼ ganar Jesús ne ejércitu stiʼ guidxilayú malu stiʼ Binidxabaʼ. Lu últimu visión que, biiyaʼ Juan nuudxí guibáʼ ne Guidxilayú, ne guiráʼ binni nuu tobi si. Laaca biiyabe ximodo binitilú Binidxabaʼ ne descendencia stiʼ o ca xpinni. Cásica guibáʼ ne ndaaniʼ Guidxilayú guiráʼ xixé binni rusisaca lá Jiobá ne laasibe runi adorarcaʼ.