«Gueeda Reinu stiluʼ»

Maca guníʼ Jiobá: «Maʼ qué zuunaʼ binni, maʼ qué ziuuruʼ yuubaʼ, guendahuará nin guendaguti. Zuchaaʼ nisa riete lutu ne maʼ qué zietenaláʼdxitu ca cosa malu».

Guluu Jiobá Adán ne Eva ndaaniʼ Jardín de Edén para nibánicaʼ nayecheʼ ne ñápacaʼ guendariuudxi. Naquiiñeʼ ñuni adorárcabe Bixhózecabe ni nuu guibáʼ, ñápacabe stale xiiñicabe ne nuchácabe Guidxilayú riʼ. Peru qué nuzuubaʼ Adán ne Eva stiidxaʼ Jiobá, neca zacá qué huachaa ni gudixhe ique Dios guni. Lu libru riʼ maʼ bizíʼdinu runi cumplir Jiobá guirá ca promesa stiʼ. Zedané Reinu stibe stale ndaayaʼ ndaaniʼ Guidxilayú riʼ, ne zacá zaca cumplir ni biʼniʼ prometerbe Abrahán.

Maʼ cadi candaa zanitilú Binidxabaʼ, ca demonio stiʼ ne guiráʼ binni malu. Guiráʼ xixé binni zuni adorarcaʼ Jiobá. Maʼ qué zaca huaranu ne maʼ qué zátinu, lugar de nga, guiráʼ dxi ziásanu né stale stipa ne ziuʼnu nayecheʼ. Zaca Guidxilayú riʼ ti paraísu. Zápanu stale guendaró nanixe ne yoo galán. Maʼ qué ziuuruʼ binni malu ni guniná laanu, guiráʼ xixé binni zaca nachaʼhui. Maʼ qué zadxibi ca maniʼ duxhuʼ ca laanu ne ninca laanu qué zadxíbinu laacame.

Guizáʼ sicarú zaca ora guzulú gusibani Jiobá cani maʼ guti. Zadxaagalunu ca binni bibani dxiqué casi Abel, Noé, Abrahán, Sara, Moisés, Rut, Ester ne David. Laacabe zacanécabe laanu gúninu Guidxilayú riʼ ti paraísu. Zápanu stale cosa galán ni gúninu.

Racalaʼdxiʼ Jiobá guibániluʼ ndaaniʼ Paraísu ca. Racá zazíʼdinu stale cosa galán de Dios ni qué huayuudxí guiníʼ íquenu. Nga runi, ¡guidxíñanu jma gaxha de Jiobá, ne qué chuʼ dxi gusaananu laabe!