NI RINABADIIDXAʼ CA JOVEN
¿Ximodo zanda gacané Biblia naa? Primé ndaa: Biyubi ca tesoro zeeda lu Biblia
«Huayuneʼ stipa guundaʼ Biblia, peru ruuyaʼ ni ti libru guizáʼ ziuulaʼ» (Briana, ti baʼdudxaapaʼ de 15 iza).
Pa zacá rizaacaluʼ zacané artículo riʼ lii.
¿Xiñee risaca guidúʼndanu Biblia?
¿Ñee raca aburrirluʼ gúʼndaluʼ Biblia la? Pa zacá rizaacaluʼ, riénedu lii. Zándaca ruxuíʼluluʼ naca Biblia ti libru ni napa jma de ti mil página, ni cá puru letra nahuiiniʼ luni ne qué gápani nin ti dibuju. ¡Gadxé peʼ ni de ni ridiʼdiʼ lu televisión ne lu ca videu ca!
Guníʼ ique ndiʼ: Pa nidxélaluʼ ti cofre yooxhoʼ ra nuu ti tesoro, ¿cadi dxandíʼ nagueendaca nuyúbiluʼ nuxhéleluʼ ni la?
Zeeda gaca Biblia casi ti cofre ra nuu tesoro. Luni zadxélaluʼ stale perla ni zacané lii gápaluʼ sabiduría para:
Guicaaluʼ decisión jneza.
Gaca llevarluʼ bixhózeluʼ ne jñaaluʼ.
Guidxélaluʼ xhamíguluʼ ni dxandíʼ gacané lii.
Guni controlarluʼ estrés.
Neca maʼ xadxí gucuá Biblia, ¿ñee zanda gacaneni laanu la? Zanda. ¿Xiñee yaʼ? Purtiʼ «Dios nga guníʼ xi guicá luni» (2 Timoteo 3:16). Ndiʼ riníʼ guiráʼ ca conseju ni ridxélanu lu Biblia zeeda ca ni de Dios ni jma risaca nuu lu universu.
Naca Biblia casi ti cofre ra nuu ti tesoro ni napa stale perla nabé risaca ni zacané laanu gápanu sabiduría.
Modo zanda gúʼndaluʼ Biblia
Primé: Zanda gúʼndaluʼ ni de ra ruzulú ni hasta ra riluxe ni. Ndiʼ zacané lii gánnaluʼ xi mensaje zeeda lu Biblia. Guidúʼyanu chupa modo zanda gúniluʼ ni:
Napa Biblia 66 libru ne zanda gúʼndaluʼ ni tobi pur tobi, de Génesis hasta Apocalipsis.
Zanda gúʼndaluʼ Biblia pur orden cronológico o modo bizaaca ca cosa ca.
Ni zanda gúniluʼ: Lu ndaa 4-A stiʼ folletu ni láʼ Ni zacané lii guiéneluʼ Stiidxaʼ Dios zeeda ti lista ni cusiene pur orden cronológico ca cosa nabé risaca ni bizaaca dxi bibani Jesús lu Guidxilayú riʼ.
Guiropa: Zanda guyúbiluʼ ti relatu ni gacané lii gudxíʼluluʼ ti guendanagana cadíʼdiluʼ. Guzéʼtenu caadxi ejemplu:
¿Ñuuláʼdxiluʼ ñápaluʼ xhamíguluʼ ni zanda gápaluʼ confianza laa la? Pa zacá ni, biindaʼ relatu stiʼ David ne Jonatán (1 Samuel, capítulo 18 hasta 20). De racá, biʼniʼ ejerciciu ni láʼ «Como encontrar amigos de verdad», luni zaziidiluʼ ximodo zanda gúniluʼ ni zeeda lu relatu ca.
¿Ñuuláʼdxiluʼ ñápaluʼ stipa para nudxiiluluʼ ca guendanagana guidxaagaluluʼ la? Zanda gúʼndaluʼ historia stiʼ José ne gúʼyaluʼ ximodo bidxiilube ti guendanagana gúpabe (Génesis, capítulo 39). De racá, biʼniʼ ejerciciu ni láʼ «Como resistir las tentaciones» ne «Acusado falsamente», lúcani zaziidiluʼ ni zanda gúniluʼ ora guidxaagaluluʼ xiixa guendanagana zacá.
¿Ñuuláʼdxiluʼ ñánnaluʼ xi zabeenduluʼ pa guni orarluʼ Dios la? Biindaʼ ni bizaaca Nehemías (Nehemías, capítulo 2). De racá, biʼniʼ ejerciciu ni láʼ «Jehová contestó su oración», luni zaziidiluʼ caadxi cosa nabé risaca ni zanda gúniluʼ.
Ni zanda gúniluʼ: Ora maʼ chiguundaluʼ Biblia, biyubi ti lugar ra gastiʼ ruidu ti zacá ganda gaca concentrarluʼ.
Guionna: Zanda guyúbiluʼ ti relatu o ti salmo, biindaʼ ni ne de racá guníʼ ique ximodo zanda gacané ni lii. Despué de gúʼndaluʼ ni zanda guiníʼ íqueluʼ ca pregunta riʼ:
¿Xiñee bidii Jehová lugar guicá ca diidxaʼ riʼ lu Biblia?
¿Xi rusiidiʼ ni naa de modo naca Jehová ne modo runi ca cosa ca?
¿Ximodo zanda gacané ni biindaʼ riʼ naa lu xquendanabaneʼ?
Ni zanda gúniluʼ: Gupa ti meta. Biʼniʼ descargar «Programa ni láʼ Modo guiuundaʼ Biblia» ni nuu lu sitiu de Internet stidu ne bicaa padxí nápaluʼ gana guzululuʼ gúʼndaluʼ Biblia.