NI RINABADIIDXAʼ CA JOVEN
¿Ximodo zanda gacané Biblia naa? Guiropa ndaa: Xi zanda gúniluʼ para chuuláʼdxiluʼ gúʼndaluʼ Biblia
«Ruluíʼ aburridu nga gúʼndaluʼ Biblia. Peru pa guiziidiluʼ gúʼndaluʼ ni la? qué zaca aburrirluʼ», zacá guníʼ ti joven lá Will.
¿Ñuuláʼdxiluʼ ñánnaluʼ ximodo zanda chuuláʼdxiluʼ gúʼndaluʼ Biblia la? Zanda gacané artículo riʼ lii.
Bixuiʼlú nuuluʼ lu ca relatu ni riete lu Biblia
Ni zanda gúniluʼ para chuuláʼdxiluʼ gúʼndaluʼ Biblia:
Gulí ti relatu zeeda lu Biblia ni racaláʼdxiluʼ guni estudiarluʼ. Zanda gácani ti cosa ni ruzeeteʼ Biblia bizaaca, ti ndaa stiʼ ti Evangeliu o ti relatu ni zeeda lu sección ni láʼ Ruundacabe Biblia casi ñácani ti drama ni nuu lu jw.org.
Biindaʼ relatu ca. Zanda gúʼndaluʼ ni stúbiluʼ o zanda gúʼndaluʼ ni en voz alta né familia stiluʼ o né ca xhamíguluʼ. Zanda chuʼ ti narrador ne xcaadxi zanda gúnicaʼ voz stiʼ ca personaje ni riete lu relatu ca.
Zanda chinándaluʼ tobi de ca sugerencia riʼ:
Biʼniʼ caadxi dibuju ni gusiene xi peʼ nga bizaaca lu relatu ca. Laaca zanda gucaaluʼ caadxi diidxaʼ ni gusiene xi cazaaca racá.
Biʼniʼ ti gráfica. Guzéʼtenu ti ejemplu, ora gúʼndaluʼ historia stiʼ ti binni ni riete lu Biblia, zanda gúniluʼ ti gráfica ra gucaaluʼ ca cosa galán ni bíʼnibe, ca cualidad galán ni bisihuínnibe ne laaca zanda gucaaluʼ ca ndaayaʼ ni gucuaabe.
Biʼniʼ ti entrevista. Biʼniʼ entrevistar ca personaje principal ni riete lu relatu ca ne ca xcaadxi personaje ni biiyaʼ ni bizaaca ca.
Pa ti personaje ni riete lu relatu ca gucuaa ti decisión ni cadi jneza, bixuiʼlú xi nizaaca pa qué ñúnibe ni. Guzéʼtenu ti ejemplu, guníʼ ique ni bizaaca Pedro dxi biʼniʼ negar Jesús (Marcos 14:66-72). ¿Xi rábiluʼ ñanda ñuni Pedro ora cayuni presionárcabe laa yaʼ?
Zanda iquiiñeluʼ ti relatu zeeda lu Biblia para gucaaluʼ ti historia. Laaca zanda gucaaluʼ ni biziidiluʼ lu relatu ca (Romanos 15:4).
Bixuiʼlú nuuluʼ lu ca relatu ni riete lu Biblia
Biʼniʼ investigar
Pa guundaʼ chaahuiluʼ ti relatu zanda guidxélaluʼ perla ni gaʼchiʼ luni. Nuu biaje tobi o chupa diidxaʼ zeeda lu relatu ca racané ca ni tobi ganna ti cosa nabé risaca.
Guzéʼtenu ti ejemplu, guchaaganu Mateo 28:7 ne Marcos 16:7.
¿Xiñee bicaa Marcos zahuinni Jesús nezalú ca discípulo «ne Pedro»?
Ni caquiiñeʼ gánnaluʼ: Qué guinni Marcos ora guníʼ Jesús ca diidxaʼ riʼ, ruluíʼ Pedro gudxi laabe ni bizaaca raqué.
Perla zeeda lu Biblia: ¿Xiñee rábiluʼ gutadxí ladxidóʼ Pedro ora gunna racalaʼdxiʼ Jesús guuyaʼ laa? (Marcos 14:66-72). ¿Ximodo bisihuinni Jesús naca ti buen amigu para Pedro? ¿Xi zanda gúniluʼ pa racaláʼdxiluʼ gácaluʼ ti buen amigu cásica guca Jesús?
Pa guxuíʼluluʼ nuuluʼ lu ca relatu ni riete lu Biblia ne guni investigar chaahuiluʼ ni riete luni, ziuuláʼdxiluʼ gúʼndaluʼ Biblia.