Nuu binni raca nagana para laa gannaxhii Dios, purtiʼ riníʼ ique guirutiʼ zanda ganna ximodo laabe, nuube zitu de binni ne nabé malu laabe. Biiyaʼ xi huaníʼ caadxi binni de laabe:

• «Neca gunabaʼ Dios gacané naa, bineʼ sentir nabé zitu nuube de naa. Qué ñuu dxi niníʼ iqueʼ pa naca Dios ti binni ni rannaxhii.» (Marco, Italia.)

• «Racalaʼdxeʼ guneʼ ni na Dios, Peru bineʼ sentir zitu nube de naa. Biiyaʼ laabe casi ti Dios nabé malu ni cuyubi si pora guni castigar binni. Qué ñuneʼ cré pa nadxiibe binni.» (Rosa, Guatemala.)

• «Dxi dxaapahuiiniruʼ naa bineʼ cré cayuuyaʼ si Dios para rucheʼnu para guni castigar laanu. Despué biiyaʼ laabe casi tuuxa ni nuu zitu de binni, casi runi tuuxa ni naca primé ministru ni runi mandar binni ne qué rizaalaʼdxiʼ laacabe.» (Raimunda, Canadá.)

Yanna lii xi riníʼ íqueluʼ yaʼ. Xi rucueeza lii para cadi gannaxhiiluʼ Dios yaʼ. Stale binni rinabadiidxaʼ zacá neca nápacaʼ religión sticaʼ. Ne lu ca iza 500 hasta 1500 despué de ca dxi stiʼ Jesús stale binni qué ñuni orarcaʼ Dios. Xiñee yaʼ. Purtiʼ bidxíbicabe laabe. Historiador ni láʼ Will Durant guníʼ sicaríʼ: «Ximodo ndiʼ guni orar binni ruchee Dios ni zuba lu ti trono ni nuu zitu ne maca para guchibi yaʼ».

Xi rucaa binni guʼyaʼ Dios zacá yaʼ. Xi rusiidiʼ Biblia de laabe yaʼ. Ñee cadi jma nagueenda ñannaxhiinu Dios pa ñaca ñunibiáʼ chaahuinu laabe la?

NI RUNI CRÉ BINNI

«Qué huayanda diʼ quíxhedu pa jneza guiníʼ binni napa Dios lá. Ne pa nápabe la? qué gánnadu tupeʼ labe.» (Ni zeeda lu libru ni láʼ Theological Studies stiʼ Profesor David Cunningham.)

NI RUSIIDIʼ BIBLIA

Dios peʼ guníʼ: «Naa nga Jiobá. Nga nga laʼyaʼ» (Isaías 42:8). Lu diidxaʼ hebreu lá Jiobá riníʼ ni: «Laabe nga ni runi ni Gueeda Gaca».

Jiobá racalaʼdxiʼ guininu lá. Biblia na: «Lagucaa ridxi labe. Lagabi ca guidxi ca cani huayúnibe. Laguiníʼ labe nga ni nuu jma luguiáʼ» (Isaías 12:4).

Jesús guníʼ lá Dios, ne ti biaje guniʼbe sicaríʼ ora biʼniʼ orarbe bixhózebe: «Maʼ bisiideʼ laacabe tu laluʼ», (Traducción del Nuevo Mundo). Xiñee guniʼbe zacá yaʼ. Laabe guniʼbe: «Ti gapa cabe naa ndaani ladxidóʼ cabe para ganaxhii saa cabe casi nadxii lu naa» (Juan 17:26).

XIÑEE NAQUIIÑEʼ GANNUʼ NDIʼ

Ti xaíque yuʼduʼ ni láʼ Walter Lowrie bicaa ca diidxaʼ riʼ: «Ti hombre ni qué ganna tu láʼ Dios la? qué runibiáʼ diʼ laabe [...] ne qué zanda diʼ gannaxhiiluʼ laabe pa gúʼyaluʼ laabe casi ti stipa si».

Ti hombre láʼ Victor ni guyé yuʼduʼ guiráʼ semana, peru qué ñánnabe gastiʼ de Dios. Laabe guniʼbe: «Ora biziideʼ Jiobá nga láʼ Dios la? bineʼ sentir casi ora yanna huaxa maʼ biluíʼcabe naa laabe. Oraqueruʼ nga binebiaʼyaʼ Dios ni nabé huayunadiaʼga de laa. Bineʼ cré dxandíʼ nuu Dios ne dede dxiqué guca xhamiguaʼ laabe».

Jiobá laaca ridxiña «cani riníʼ ique labe» ne maʼ bidii stiidxabe: «Ziaʼyaʼ laacabe cásica riá ti hombre xiiñiʼ ni cayuni ni na» (Malaquías 3:16, 17). Dios riguu ndaayaʼ cani riníʼ labe ora gucaa ridxi laabe. Biblia na: «Guiráʼ tu iquiiñeʼ lá Jiobá ora guinabaʼ gacanebe laa la? zalá» (Romanos 10:13, TNM).

NI RUNI CRÉ BINNI

«Ni riníʼ binni Trinidad nga naca Dios chonna binni, Dios Padre, Dios Hijo ne Dios Espíritu Santu.» (El Diccionario Akal crítico de teología.) Ne sti diccionariu bizeeteʼ sicaríʼ: «Ngaca runi cré ca católicu, ca ortodoxo, ca anglicano ne ca protestante» (Diccionario abreviado del cristianismo).

NI RUSIIDIʼ BIBLIA

Qué ñuu dxi niníʼ Jesús, Xiiñiʼ Dios, biaʼca laa Bixhoze o laca laa nga Bixhoze. Laabe guniʼbe: «Chaa ra nuu Bixhozeʼ, purti jma nandxóʼ Bixhoze que naa» (Juan 14:28). Ne laabe gúdxibe tobi de ca discípulo stibe: «Chi chiba ra nuu Bixhoze ne Bixhoze tu, ra nuu Dios stinne ne Dios stitu» (Juan 20:17).

Cadi ti binni diʼ nga espíritu santu. Ca primé xpinni Cristu «bidxá ladxidóʼ cabe de Espíritu Santu», ne laaca guníʼ Jiobá: «Zadxiña dxi ucheeche Espíritu stinne luguiá stale binni» (Hechos 2:1-4, 17). Cadi laca Dios diʼ nga espíritu santu, sínuque stipa stiʼ Dios ni.

XIÑEE NAQUIIÑEʼ GANNUʼ NDIʼ

Ca biblista católicu Karl Rahner ne Herbert Vorgrimler, nacaʼ Trinidad ca «qué ñanda diʼ ñanna binni ni pa qué nicaacabe ti visión stini, ne despué de visión ca guirutiʼ ñanda ñene chaahuiʼ ni». Peru, ñee zanda gannaxhiinu tuuxa ni qué zanda gunibiaʼnu ne qué zanda guiénenu laa la? Qué zanda diʼ. Nga runi, qué randa rannaxhii binni Dios ora rusiidicabe de Trinidad.

Marco, hombre ni bizéʼtenu lu tema ni gudídinu ca, ora biziidibe de Trinidad qué ñanda ñunibiaʼbe Dios. Laabe guniʼbe sicaríʼ: «Guníʼ iqueʼ cucaachiʼ Dios tu laa, ngue runi jma nagana para ganna binni tu laabe ne qué zanda guidxiña laabe». Peru «Dios qué ruchenda diʼ binni» (1 Corintios 14:33, Biblia de Jerusalén). Laabe qué rucaachibe tu laabe, sínuque racaláʼdxibe gunibiaʼnu laabe. Jesús guníʼ: «Laadu rusisaca du ni runibiáʼ du» (Juan 4:22).

Sicaríʼ guníʼ Marco: «Ora biziideʼ cadi naca diʼ Dios ti Trinidad la? gunda guca xhamiguaʼ laabe». Pa guidúʼyanu Jiobá casi ñaca nidúʼyanu ti binni ne cadi casi tuuxa ni nagana para guiene binni tu laa la? jma nagueenda zannaxhiinu laabe. Biblia na: «Ni cadi nadxii stobi la? qué huayuu dxi gunibiáʼ Dios, purti de Dios nga reeda enda ranaxhii» (1 Juan 4:8).

NI RUNI CRÉ BINNI

«Cani naquiiñeʼ gatiʼ pur bichee, casi gáticaʼ rié alma sticaʼ infiernu ra raca castigárcabe lu “guí ni qué lica rizuíʼ”.» (Catecismo de la Iglesia Católica.) Caadxi xaíque yuʼduʼ nacaʼ cani nuu ndaaniʼ infiernu ca nuucaʼ zitu de Dios.

XI RUSIIDIʼ BIBLIA

«Alma ni guchee... zati.» (Ezequiel 18:4.) Cani maʼ guti «qué lica gánnacabe gastiʼ» (Eclesiastés 9:5). Yanna, pa rati xhialma binni ne maʼ qué ganna gastiʼ ora maʼ guti, ximodo gacanácabe lu «guí ni qué lica rizuíʼ» o chúʼcabe zitu de Dios yaʼ.

Lu Biblia, diidxaʼ hebreu Seol ne diidxaʼ griegu Hades, stale biaje rutiixhicabe cani casi «infiernu». Guiropaʼ diidxaʼ ca riníʼcani casi ñaca ni baʼ ra nuu guiráʼ gueʼtuʼ ca. Casi dxi gupa Job ti guendahuará nabé feu la? biʼniʼ orarbe Dios: «Pa ninaluʼ la? neca ndaaniʼ baʼ nucaachiluʼ naa» (Job 14:13, Nueva Versión Internacional). O «ndaaniʼ infiernu», casi zeeda ni lu La Sagrada Biblia, ni bicaa Guillermo Jünemann. Job qué ninabaʼ diʼ ñuu ti lugar ra ñacaná ne ra ñuu zitu de Dios, ni canábabe nga chuʼbe ndaaniʼ baʼ para guiziiláʼdxibe.

XIÑEE NAQUIIÑEʼ GANNUʼ NDIʼ

Rixeleʼ binni de Dios ora guʼyaʼ laabe casi tuuxa nabé malu. Sicaríʼ guníʼ Rocío, ti gunaa de Méjicu: «Dede dxi nahuiineʼ bisiidicabe naa nuu ti infiernu. Guizáʼ bidxibeʼ Dios ne qué ñanda ñuneʼ cré pa nacháʼhuibe. Guníʼ iqueʼ guiráʼ hora cadxiichibe ne nabé malu laabe».

Bichaa modo riníʼ ique Rocío ora gunna ni rusiidiʼ Biblia de Dios ne modo nuu ca gueʼtuʼ ca. Laabe guniʼbe sicaríʼ: «Bineʼ sentir casi ora nindísacabe xiixa ni naʼni naa. Ne biiyaʼ racalaʼdxiʼ Dios chuʼnu galán, ne nadxiibe laanu ne laaca zanda gannaxhieeʼ laabe. Ruuyaʼ laabe casi binni ni rizaalaʼdxiʼ ca xiiñiʼ ne racalaʼdxiʼ gudii laacabe ni jma galán» (Isaías 41:13).

Stale binni napa religión stiʼ purtiʼ ridxibi cheʼ infiernu, peru Dios qué racalaʼdxiʼ diʼ gúninu ni na purtiʼ si cadxíbinu. Ne Jesús guníʼ: «Gunaxhii [Jiobá] Dios stiuʼ» (Marcos 12:29, 30). Ora guiénenu qué runi Dios ni cadi jneza la? racané nga laanu guni crenu zúnibe ni jneza ora guni juzgarbe binni. Zanda guininu casi guníʼ Elihú, ti xhamigu Job: «Zitu zuhuaa de ndaaniʼ ique Dios ni dxandíʼ ca guni ni malu, ne zitu zuhuaa de ni jma napa poder ca guni ni cadi jneza» (Job 34:10).

Ti dxi guníʼ Jesús de Bixhoze, Jiobá, ora nuu Jerusalén, ne bisihuínnibe cadi dxandíʼ ni runi ca xaíque yuʼduʼ ni guyuu dxiqué (Juan 8:12-30). Ni guniʼbe que ruluiʼni laanu naquiiñeʼ guiduʼyaʼ chaahuinu pa jneza cani runi cré binni de Dios. Laabe guniʼbe sicaríʼ: «Pa qué iree chu tu de lu stiidxa la? zaca xpinne piaʼ laatu. Ne zanna tu ni dxandíʼ, ne zaladi tu ra cá tu yaga purti ma nanna tu ni» (Juan 8:31, 32).

Ora guníʼ Jesús «pa qué iree chu tu de lu stiidxa», cusiidibe laanu guiduʼyaʼ chaahuinu pa dxandíʼ ni rusiidiʼ ca religión ca. Ora gábicabe lii xiixa de Dios, guníʼ ique: «Ñee zacá nga bisiidiʼ Jesús ne xcaadxi diidxaʼ ni zeeda lu Biblia la?». Biʼniʼ casi biʼniʼ ca binni ni bicaadiaga apóstol Pablu: biiyaʼ chaahuiʼ xii nga rusiidiʼ Biblia ti gúʼyaluʼ pa dxandíʼ ni gábicabe lii (Hechos 17:11).

Ngapeʼ nga ni biʼniʼ Marco, Rosa ne Raimunda, ca binni ni bizéʼtenu que: biiyacabe pa dxandíʼ nga cani runi crécabe ora bisiidiʼ ca testigu stiʼ Jiobá laacabe. Xi biziidicabe yaʼ.

Marco: «Testigu ni bisiidiʼ naa que biquiiñebe Biblia para bicábibe cani gunabadiidxaʼ laabe ne cani gunabadiidxaʼ xheelaʼ laabe. Chaahuidugá gunnaxhiidu Jiobá ne jma galán nabánidu».

Rosa: «Naa rabeʼ ni na ique binni nga ni zeeda lu Biblia ne luni racaláʼdxicabe gusiénecabe ximodo nga Dios. Peru chaahuidugá gucané Biblia naa guieneʼ stale cosa ni racalaʼdxeʼ gannaʼ. Yanna maʼ nannaʼ dxandíʼ nuu Jiobá, ne runeʼ cré zacanebe naa».

Raimunda: «Gunabaʼ Dios gacané naa gunebiaʼyaʼ laa. Qué nindaa de ngue naa ne xheelaʼ bidúʼndadu Biblia. ¡Dxiqueruʼ nga binibiáʼ chaahuidu ximódopeʼ nga Jiobá! Nabé nayecheʼ guyuʼdu ora gúnnadu pabiáʼ nachaʼhuiʼ Dios».

Biblia cadi rusihuinni si cadi dxandíʼ guiráʼ ni riníʼ binni de Dios, sínuque rusihuínnini guiráʼ guenda sicarú ni nápabe. Ne laaca racaneni laanu «para ganda guiene nu irá ni ma bidii Dios laanu» (1 Corintios 2:12). Galán gúʼyaluʼ xipeʼ rusiidiʼ Biblia de Dios, xi naguixhe íquebe gúnibe lu Guidxilayú ne xi naguixhe íquebe gúnibe para laanu. Zanda guinábaluʼ lu sitiu www.jw.org/zai chiguundanécabe lii o zanda guinábaluʼ ti testigu stiʼ Jiobá gusiidiʼ lii de Biblia. Pa guʼnuʼ nga la? zudiiluʼ cuenta zanda gannaxhiiluʼ Dios.