Chinándanu ejemplu stiʼ ca profeta: Habacuc
1. Xiñee zanda guni sentirnu casi biʼniʼ sentir profeta Habacuc.
1 Ora gúʼyaluʼ guiráʼ cosa malu cayaca lu Guidxilayú riʼ, zándaca guni sentirluʼ casi biʼniʼ sentir Habacuc, laa gunabadiidxaʼ Jiobá xiñee rudii lugar gaca cosa malu (Hab. 1:3; 2 Tim. 3:1, 13). Ora guiníʼ íquenu mensaje yené Habacuc ne modo biʼniʼ huantar, zanda gacané ni laanu guni huantarnu laga cabézanu dxi cuidxi Jiobá cuenta binni (2 Ped. 3:7).
2. Xi gúninu ti cadi gusaana de gúninu xhiiñaʼ Jiobá cásica biʼniʼ Habacuc.
2 Cadi gusaana de gúninu xhiiñaʼ Dios. Lugar de nicá ique Habacuc guendanagana stiʼ, laga gutaná ne qué nusaana de ñuni xhiiñaʼ Jiobá (Hab. 2:1). Bidii stiidxaʼ Jiobá laabe zaca guiráʼ ni maʼ guníʼ ora maʼ caquiiñeʼ gaca cani ne laaca gudxi laabe qué zati cani qué gusaana laa (Hab. 2:2-4). Xi riníʼ ca diidxaʼ riʼ para ca xpinni Cristu nabani lu ca últimu dxi riʼ yaʼ. Ni jma risaca nga chúʼcabe seguru zeeda fin ne cadi padxí guedandá ni. Racané fe laanu para gatananu ne gucheechenu diidxaʼ biaʼ gándatiʼ (Heb. 10:38, 39).
3. Xiñee cadi naquiiñeʼ gusaana de gúninu xhiiñaʼ Jiobá nayecheʼ.
3 Gúninu xhiiñaʼ Jiobá nayecheʼ. Dxi gucaalú Gog stiʼ guidxi Magog xquidxi Jiobá nga guihuinni pa naguidxi nuu fe stinu (Ezeq. 38:2, 10-12). Nabé nagana ribani binni ora gaca ti guerra dede né para cani runi ganar. Purtiʼ runíticaʼ guiráʼ ni nápacaʼ, rirá guendaró ne maʼ qué ribánicaʼ casi bibánicaʼ ante. Xi gúninu ora guidxaagalunu guendanagana riʼ yaʼ. Qué nibeza diʼ Habacuc ñaca chaahuiʼ ca guendanagana stiʼ, nga runi gudixhe íquebe gúnibe xhiiñaʼ Jiobá ne chuʼbe nayecheʼ (Hab. 3:16-19). Laaca zacané «guendanayecheʼ stiʼ Jiobá» laanu guni huantarnu ca guendanagana gápanu (Neh. 8:10; Heb. 12:2).
4. Xi zanda gúninu yanna ne laaca zúninu ni despué.
4 Zusiidiruʼ Jiobá cani guilá dxi cuidxi cuenta binni (Hab. 2:14). Ca binni ni guiasa de lade gueʼtuʼ zaziidirucaʼ de Jiobá. Nga runi, quixhe íquenu de ca yanna guinínenu tutiica binni de laabe ne de cani maʼ bíʼnibe (Sal. 34:1; 71:17).