14. Xi bicabi Moisés despué de binadiaga ca diidxaʼ guníʼ Jiobá.

¹⁴ Relatu ca caniʼruʼ sicaríʼ: «Bizulú bicuudxi Moisés lú Jiobá, Dios stiʼ ne guníʼ: “Xiñee guidxiichineluʼ xquídxiluʼ pue Jiobá, guidxi guleeluʼ de lu layú stiʼ Egipto ne stale poder ne naluʼ ni nadipaʼ. Xiñee ndiʼ guiníʼ ca egipciu: «Cá ique Dios cosa malu dxi gulee laacabe, para guuti laacabe lade ca dani ca ne para gunduuxeʼ laacabe de lu guidxilayú». Bisaana de guidxiichiluʼ ne bichaa ni cá íqueluʼ gúniluʼ xquídxiluʼ. Bietenalaʼdxiʼ de Abrahán, de Isaac ne de Israel ca xpínniluʼ, cani bidii stiidxaluʼ pur laca lii, ora guʼdxuʼ laacaʼ: «Zutaleʼ cani za de lii casi ca beleguí nuu guibáʼ, ne guidubi layú ni maʼ guniéʼ guicaatu riʼ zudieeʼ ni cani za de lii, ne dxandipeʼ zaca stícabe ni ne qué ziuu dxi chuʼ tu gaxha ni laacabe”». Ne bizulú bichaa Jiobá ni cá ique guni xquidxi» (Éxo. 32:11-14).a

¹⁶ Ni bicabi Moisés que bisihuínnini nápabe fe Jiobá ne runi crebe zuni ni jneza. Cadi bíʼnidibe ni bizéʼtenu ca para gúʼyabe xi zanda guicaabe, sínuque bisihuínnini racaláʼdxibe ganna binni naca Jiobá ti Dios ni runi ni jneza. Zacá bisihuínnibe riene chaahuibe «xi riníʼ ique» Jiobá, o modo ruuyaʼ ni cayaca que (1 Cor. 2:16). Xi biʼniʼ Jiobá óraque yaʼ. Cumu caʼruʼ quíxhebe gaca ni guniʼbe que la? relatu stiʼ Biblia na «bizulú bichaa Jiobá ni cá ique» guni que. Lu hebreu zanda guininu riníʼ ca diidxaʼ ca maʼ qué ñeedané diʼ Jiobá guendananá ni cá ique guedané luguiáʼ guidxi que.