Ti gunaa nuu xpiaaniʼ

1-3. 1) Xiñee chiguuticabe ca hombre ni nuu ralidxi Nabal. 2) Xi chiguizíʼdinu de Abigail.

MÁLASI ti dxi yendá ti hombrehuiiniʼ ra nuu Abigail. Ne rihuínnica guizáʼ cadxibi, purtiʼ nuu si de guizaaca ti desgracia. Hombrehuiiniʼ riʼ cayabi laabe zeeda tapa gayuaa soldadu para guuti guiráʼ xixé hombre ni nuu ralidxi Nabal, xheelaʼ Abigail. Peru xiñee chiguuticabe ca binni riʼ yaʼ.

² Pur donda stiʼ Nabal. Hombre riʼ biʼniʼ ti guendahuati, cásica maca biaa guni. Peru biaje riʼ huaxa qué zadiʼdiʼ ni bíʼnibe ca zacasi, purtiʼ bíʼnibe ni xaíque stiʼ ti grupu de soldadu ni guizáʼ nánnacaʼ tíndecaʼ. Ngue runi, guyé tobi de cani runi xhiiñaʼ Nabal, zándaca tobi de cani rapa dendxuʼ stibe, ra nuu Abigail, ne guyebe ra nuu gunaa riʼ purtiʼ guníʼ íquebe zándaca guni xiixa para cadi gatiʼ ca binni que. Peru xi zanda guni ti gunaa si para gucueeza guiráʼ ca soldadu que yaʼ.

Gudindenebe laacaʼ

8. Xi biʼniʼ Nabal, ne xiñee nabé naxoo ni bíʼnibe ca.

⁸ Peru yanna jma nagana modo nuucabe. Xiñee yaʼ. Maʼ bichiichi Nabal David, hombre chaʼhuiʼ ni gulí Samuel para gaca rey lugar stiʼ Saúl que (1 Sam. 16:1, 2, 11-13). Ora biʼyaʼ David ne 600 hombre stiʼ pabiáʼ naroʼbaʼ xiana stiʼ rey Saúl ne nuu guuti laacabe la? bixooñecabe ne yeguiaanacabe lu desiertu.

¹² ¡Guizáʼ bidxiichi! Hombrehuiiniʼ guyé ra nuu Abigail que na gudindené Nabal ca hombre biseendaʼ David que. Cumu nabe naca David ti esclavu ni canaguxooñelú la? qué ninádibe nudiibe laacaʼ pan, nisa ne beela. Dede biʼniʼ búrlabe laa ne guniʼbe naca casi tuuxa ni qué risaca. Zándaca nanalaʼdxiʼ Nabal laabe cásica guca nanalaʼdxiʼ Saúl laabe. Nin tobi de ca hombre riʼ qué gánnacaʼ ximodo ruuyaʼ Jiobá laabe. Jiobá nadxii David, ne lugar de ñuuyaʼ laabe casi ti esclavu ni qué ruzuubaʼ diidxaʼ la? nanna laabe ngue chigácabe rey stiʼ Israel (1 Sam. 25:10, 11, 14).

14. 1) Xi biʼniʼ Abigail para gaca chaahuiʼ ni biʼniʼ Nabal que. 2) Xi rizíʼdinu de modo guca Abigail ne modo guca xpiaʼ Nabal. (Laaca zanda gúʼyaluʼ ni cá ñee yaza.)

¹⁴ Casi bidúʼyanu ra bizulú capítulo riʼ, bicaadiaga Abigail hombrehuiiniʼ que, ne nga nga ni qué ñuni xheelabe. Zacá bisihuínnibe mápeca bizulú cayúnibe xiixa para gaca chaahuiʼ guendahuati biʼniʼ Nabal. Cumu nanna hombrehuiiniʼ riʼ que randa riniʼnécabe Nabal la? qué liica ñabi laabe xi guendanagana zeeda luguiácabe, purtiʼ laapeʼ guníʼ naca Nabal ti binni «ni qué liica iquiiñeʼ» ne tuuxa ni «qué randa riniʼnécabe» (1 Sam. 25:17).c Cumu riníʼ ique Nabal nabé risaca, ngue runi qué rucaadiaga guirutiʼ. Ca dxi stinu riʼ, laaca nuu stale binni zacá xpiaʼ. Peru Abigail cadi zaqué diʼ laa, ngue runi ra nuube nga guyé mozo que.