5, 6. Tu guca Eliasib ne tu guca Tobías, ne ximodo beeda gaca xhamígucabe.

⁵ Nagana nga para gácanu binni nayá nezalú Dios, purtiʼ nabáninu lade stale binni malu. Guiníʼ íquenu de Eliasib, ti hombre ni guca xaíque stiʼ cani ruzaaquiʼ guʼxhuʼ, ne Tobías, ti ammonita ni biʼniʼ xhiiñaʼ rey stiʼ Persia ndaaniʼ guidxi Judea. Ca xpinni Tobías ne laa, bicaalucaʼ Nehemías purtiʼ gucaláʼdxicaʼ nucueezacaʼ laabe de nucuibe ca lindaa stiʼ Jerusalén sti biaje (Neh. 2:10). Ne cadi naquiiñeʼ diʼ chuʼ ca ammonita ndaaniʼ yuʼduʼ (Deut. 23:3). Yanna, xiñee bidii xaíque stiʼ cani ruzaaquiʼ guʼxhuʼ que lugar gapa Tobías ti comedor ndaaniʼ yuʼduʼ que yaʼ (Neh. 13:4-9).

⁶ Nuu chonna razón: primé, ruluíʼ nabé maʼ xhamigu Tobías Eliasib. Guiropa, cásica Tobías ne ti xiiñiʼ ni láʼ Jehohanán, bichaganacaʼ gunaa judía, ne riníʼ stale judíu nabé nachaʼhuiʼ Tobías (Neh. 6:17-19). Guionna, napa Eliasib ti xhiaga láʼ Manasés, ne bichaganáʼ xhiágabe riʼ ti xiiñidxaapaʼ Sanbalat, gobernador stiʼ Samaria, ne nabé xhamigu hombre riʼ Tobías (Neh. 13:28). Yanna, pa Eliasib nga xaíque stiʼ cani ruzaaquiʼ guʼxhuʼ, xiñee bidiibe lugar gucaa Tobías laabe gúnibe ni racalaʼdxiʼ, pa qué runi adorar hombre riʼ Dios yaʼ. Zándaca biʼniʼ Eliasib ni purtiʼ nabé xhamigu Manasés Tobías. Peru bisihuinni Nehemías pabiáʼ riuulaʼdxiʼ guzuubaʼ stiidxaʼ Jiobá. Ximodo yaʼ. Ora guleebe guiráʼ ni napa Tobías ndaaniʼ comedor que ne bisáʼbibe cani.

8. Xi cadi naquiiñeʼ guiaandaʼ guiráʼ ca xpinni Jiobá ora maʼ cuyúbicaʼ tu gaca xhamígucaʼ.

⁸ Qué chuʼ dxi guiaandaʼ laanu ca diidxaʼ riʼ: «Pa idxaagu ni nadxaba la? zacá ni lii» (1 Cor. 15:33). Zándaca chuʼ ti binnilídxinu ni gacalaʼdxiʼ gucaa laanu gúninu xiixa ni qué riuulaʼdxiʼ Jiobá. Nabé sicarú ejemplu bidii Eliasib ca judíu dxi gucanebe Nehemías para gurí ca lindaa stiʼ Jerusalén sti biaje (Neh. 3:1). Peru cumu bidxaaga Eliasib Tobías ne xcaadxi binni la? chaahuiʼ chaahuiʼ bicaa ca binni que laabe gúnibe cosa malu, ngue runi maʼ qué ñuuyaʼ Jiobá laabe casi ti binni nayá. Nga runi, naquiiñeʼ gaca xhamígunu ca binni si ni gucaa laanu gúninu ca cosa ni riuulaʼdxiʼ Dios, casi guidúʼndanu Biblia, chuunu guiráʼ guendaridagulisaa ne gucheechenu diidxaʼ. Cadi dxandíʼ jma rusisácanu ne jma rannaxhiinu ca binnilídxinu ni riguu gana laanu gúninu ni na Dios la?