18. 1) Xiñee qué niná Mardoqueo nuzuxibi xañee Hamán. (Laaca zanda gúʼyaluʼ ni cá ñee yaza.) 2) Ca dxi stinu riʼ, ximodo rusihuinni stale hombre ne gunaa ni napa fe zinándacaʼ ejemplu stiʼ Mardoqueo.

¹⁸ Ra gudiʼdiʼ dxi, ti hombre láʼ Hamán beeda gapa ti puestu nabé risaca lade ca binni ni runi xhiiñaʼ rey que. Asuero biʼniʼ laabe guiropa hombre jma risaca ra runi mandar, ne biquiiñeʼ rey que laabe para gúʼyabe gaca guiráʼ ni na, ne laaca biʼniʼ laabe hombre ni jma risaca lade cani rudii conseju laa. Ne biʼniʼ mandar rey que guzuxíbicabe xañeebe (Est. 3:1-4). Nécapeʼ ruzuubaʼ Mardoqueo stiidxaʼ rey que, nánnabe pa guzuxíbibe xañee Hamán zusihuínnibe qué runi respetarbe Dios. Ne nánnabe ti agaguita nga Hamán, nga rusihuinni zá Hamán de Agag, rey stiʼ guidxi Amaleq. Ne laabe nga biiti Samuel, ni riguixhená que (1 Sam. 15:33). Ca binni de Amaleq bíʼnicaʼ stale cosa malu, ne bisabanáʼ Jiobá laacaʼ purtiʼ beeda gácacaʼ xhenemígube ne xhenemigu xquídxibe (Deut. 25:19).c Ñee bizuxibi Mardoqueo xañee amalequita ni runi xhiiñaʼ rey que la? ¡Qué liica ñúnibe ni! Ca dxi stinu riʼ, stale hombre ne gunaa ni napa fe huaguucaʼ xquendanabánicaʼ ra naxoo para gúnicaʼ ni na ca diidxaʼ riʼ: «Jma naquiiñe uzuʼba du stiidxa Dios que stiidxa binni» (Hech. 5:29).