Ra gudiʼdiʼ dxi, ti hombre láʼ Hamán beeda gapa ti puestu nabé risaca lade ca binni ni runi xhiiñaʼ rey que. Asuero biʼniʼ laabe ti hombre ni jma risaca ra runi mandar, purtiʼ biquiiñeʼ laabe lu guiráʼ ni chiguni ne laaca biʼniʼ laabe hombre ni jma risaca lade cani rudii conseju laa. Ne biʼniʼ mandar rey que guzuxíbicabe xañeebe (Ester 3:1-4). Nécapeʼ ruzuubaʼ Mardoqueo stiidxaʼ rey que, nánnabe pa guzuxíbibe xañee Hamán zusihuínnibe qué gápabe respetu Dios. Ne nánnabe ti agaguita nga Hamán, nga rusihuinni za Hamán de Agag, rey amalequita riʼ biiti Samuel ni riguixhená que laa (1 Samuel 15:33). Ca binni de Amaleq bíʼnicaʼ stale cosa malu, ne bisabanáʼ Jiobá laacaʼ purtiʼ beeda gácacaʼ xhenemígube ne xhenemigu xquídxibe (Deuteronomio 25:19).b Ñee bizuxibi Mardoqueo xañee amalequita ni runi xhiiñaʼ rey que la? ¡Qué ñuu dxi ñúnibe ni! Ni biʼniʼ hombre chaʼhuiʼ riʼ, rusietenaláʼdxini laanu ni huayuni stale de ca xpinni Jiobá dede dxiqué hasta ca dxi stinu. Ne neca riuu xquendanabánicaʼ ra naxoo, qué ridxíbicaʼ guiniʼcaʼ ca diidxaʼ riʼ: «Jma naquiiñe uzuʼba du stiidxa Dios que stiidxa binni» (Hechos 5:29).

Cásipeʼ biʼniʼ mandar Hamán gaca ni maʼ gudixhe ique que, gucuaa caadxi hombre maniʼ sticaʼ para checaʼ guiráʼ lugar ra runi mandar rey que ne guiniʼcaʼ naquiiñeʼ gati ca judíu. Ora gunna ca binni de Jerusalén xi chiguni rey que, nabé bininani laacaʼ. Ca binni riʼ cadi xadxí de bibiguétacaʼ de Babilonia ra guyuucaʼ casi esclavu, ne cayúnicaʼ stipa pur guni chaahuicaʼ guidxi que. ¡Nin lindaa stiʼ guidxi que caʼruʼ gucuícabe ca dxi que! Nga runi zándaca bicaa ique Mardoqueo laacabe, ne laaca bicaa ique ca xhamigu ne ca binnilidxi ni nabeza ndaaniʼ guidxi Susa. Para gusihuínnibe nuube triste, guchézabe xhábabe, gúcube sacu, bichabe dé ludé íquebe ne guzabe ndaaniʼ guidxi que cucaabe ridxi. Peru Hamán qué liica nuchiiñaʼ xquendabiaaniʼ laa ora gudixhe ique guuti ca judíu ne ca xhamígucaʼ ni nuu Susa, laga guxudxinebe rey que (Ester 3:12–4:1).