Zándaca stale de laanu qué ziuu dxi guizaacanu casi bizaaca ca hombre que, ne nin chuʼnu ra nagana para gátinu. Neca qué guizaacanu zacá la? guiranu caquiiñenu tu gulá laanu, purtiʼ raca huaranu, rióxhonu, rátinu ne qué zanda diʼ guixélenu de ca guendanagana riʼ pur stipa si stinu. Job guníʼ de laani ne ca diidxaʼ riʼ: «Hombre ni rale de gunaa, huaxiéʼ dxi ribani ne rixhacalaʼdxiʼ guiráʼ guendanagana ni rapa. Cásica ti guieʼ riale ne ruchuugucabe laa, ne rinitini casi ti bandáʼ» (Job 14:1, 2). Despué de chonna mil gaayuʼ gayuaa iza, dxandiruʼ ca diidxaʼ riʼ, purtiʼ guirutiʼ de laanu zanda gusaana de gati. Ne guiráʼ binni rati neca gadxé gadxé ra nabézanu o neca gápanu laanu, guiranu caquiiñenu tu cuee laanu de ca guendanagana rápanu, de guióxhonu ne de guendaguti.

Zándaca riníʼ íqueluʼ casi guníʼ ique Job de guendanabani o zándaca coʼ, peru ni dxandíʼ nga lii laaca zedandá dxi zanítiluʼ casi ti bandáʼ ne zusaanaluʼ ca xhamíguluʼ, binnilídxiluʼ, lídxiluʼ ne guiráʼ xixé ni gúpaluʼ dxi bibániluʼ. Rey Salomón bicaa ca diidxaʼ riʼ: «Purtiʼ cani nabani nánnacaʼ záticaʼ; peru cani maʼ guti la? laacabe qué liica gánnacabe gastiʼ, maʼ qué riáxacabe, purtiʼ maʼ biaandacabe» (Eclesiastés 9:5).