8, 9. Xii ngue caquiiñeʼ guni stale de ca judíu que né ladxidoʼcaʼ.

⁸ Gudxi Dios ca judíu que naquiiñeʼ gaca circuncidar ladxidoʼcaʼ, ne para ganda gúnicabe ni caquiiñeʼ cueecabe guiráʼ cosa malu nuu ndaaniʼ ni. Xiñee yaʼ. Laabe bisiénebe: «Ti cadi gueeda xiana stinneʼ [...] pur guiráʼ guenda qué iquiiñeʼ ni cayúnitu». Paraa ngue ruzulú guiráʼ guenda qué iquiiñeʼ stícabe yaʼ. Ndaaniʼ ladxidóʼcabe (biindaʼ Marcos 7:20-23). Biquiiñeʼ Dios Jeremías para gusihuinni paraa ngue ruzulú guiráʼ guenda qué iquiiñeʼ stiʼ ca judíu que. Maʼ qué riná ladxidóʼcabe guzuubaʼ diidxaʼ ne qué riuulaʼdxiʼ Jiobá guiráʼ ni rúnicabe ne ni riníʼ íquecabe. Biblia na: «Peru guidxi riʼ maʼ napa ti ladxidóʼ ni qué riene ne qué ruzuubaʼ diidxaʼ; maʼ bireechúcabe ne canazácabe modo na íquecabe». «Qué nucaadiágacabe, ne qué nulábicabe ni gudxeʼ laacabe, sínuque gúcacabe binni qué riene ne bíʼnicabe guiráʼ ni na ladxidóʼcabe neca cadi jneza cani, ngue runi bidxiidéchecabe naa ne maʼ qué ninandarúcabe naa.» (Jeremías 5:23 ne 7:24.) Ngue runi gudxi Jiobá laacabe caquiiñeʼ gaca circuncidar ladxidóʼcabe o cueecabe guiráʼ cosa malu nuu ndaaniʼ ni (Jer. 4:4; 18:11, 12).

⁹ Zanda guininu casi ora caquiiñeʼ gaca operar ladxidóʼ ca judíu que, cásica biʼniʼ ca bixhoze gólacabe ni bibani tiempu stiʼ Moisés (Deut. 10:16; 30:6). Para gaca circuncidar ladxidóʼcabe naquiiñeʼ cueecabe ca cosa malu nuu ndaaniʼ ni: gusaana de gúnicabe cosa malu, guchaacabe modo riníʼ íquecabe ne chinándacabe ca ley stiʼ Dios (Hech. 7:51).

11, 12. 1) Xiñee naquiiñeʼ guʼyaʼ cada tobi de laanu xi nuu ndaaniʼ ladxidóʼ. 2) Xii nga ni qué zuni Dios.

¹¹ Jiobá rinabaʼ cada tobi de laanu gunibiaʼnu laa ti ganda chuuláʼdxibe modo runi adorarnu laabe. Jeremías guníʼ: «Lii, Jiobá, Dios stiʼ stale binni nanda guiibaʼ, cayuuyaʼ chaahuiluʼ ximodo nuu ca binni ni runi ni jneza; cayuuyaluʼ ca riñón stícabe ne ladxidóʼcabe» (Jer. 20:12). Yanna, pa ruuyaʼ Jiobá xi nuu ndaaniʼ ladxidóʼ ca binni ni runi ni jneza, cadi laaca naquiiñeʼ guʼyaʼ chaahuinu xi nuu ndaaniʼ ladxidoʼno la? Biblia na: «Jiobá cayuuyaʼ ximodo nuu binni nachaʼhuiʼ ne binni malu, ne Xhiálmabe dxandipeʼ nanalaʼdxiʼ tutiisi ni nadxii guendaridinde» (Salmo 11:5). Ora maʼ cayúʼyanu xi nuu ndaaniʼ ladxidoʼno, zándaca zudiʼnu cuenta cadi jneza xiixa ni cayúninu, ni cá íquenu gúninu, o ni runi sentirnu. O zándaca guidxélanu xiixa ni cuquidxi ladxidoʼno ni caquiiñeʼ cueenu. Zacá nga casi ora ñuni operarnu ladxidoʼno. Xi zanda guyúbinu ora maʼ cayúʼyanu xi nuu ndaaniʼ ladxidoʼno yaʼ. Ne ximodo zanda guchaʼnu pa caquiiñeʼ gúninu ni (Jer. 4:4).