«BIXHOZE DU, NI NUU GUIBÁʼ»

4. 1) Xi rusietenalaʼdxiʼ diidxaʼ «Bixhoze du» laanu yaʼ. 2) Xiñee zanda guiníʼ cani chiguibani lu Guidxilayú Jiobá nga bixhózecaʼ.

⁴ Bizulú Jesús oración stiʼ sicaríʼ: «Bixhoze du». Ndiʼ rusietenalaʼdxiʼ laanu Jiobá nga bixhoze guiráʼ ca bíʼchinu ne bizáʼnanu ni nuu lu Guidxilayú (1 Pedro 2:17). Maʼ gulí Jiobá chupa chonna xpinni Cristu para guibánicaʼ guibáʼ. Maʼ gucuaabe laacaʼ casi xiiñibe. Nga runi laabe nga bixhózecaʼ (Romanos 8:15-17). Peru, xi zanda guininu de cani chiguibani lu Guidxilayú riʼ yaʼ. Xiñee zanda guininu laaca bixhózecabe Jiobá yaʼ. Purtiʼ Jiobá rudii laacabe guendanabani ne guiráʼ ni riquiiñecabe. Ne despué, ora maʼ gácacabe binni sin donda ne tídicabe últimu prueba, laaca zácacabe xiiñiʼ Dios (Romanos 8:21; Apocalipsis 20:7, 8).

«GUISACA LALUʼ»

7. 1) Xi ndaayaʼ nápanu laanu casi testigu stiʼ Jiobá. 2) Ximodo rusihuínninu rusisácanu ndaayaʼ riʼ.

⁷ Laanu ca testigu stiʼ Jiobá nápanu ndaayaʼ de gánnanu lá Dios ne chinenu ni (Hechos 15:14; Isaías 43:10). Lu oración de padrenuestro, bisiidiʼ Jesús guinábanu «guisácape’» lá Jiobá. Ndiʼ riníʼ racaláʼdxinu gaca labe nayá. Ximodo rusihuínninu risaca para laanu gánnanu lá Jiobá ne chinenu ni yaʼ. Ra guinábanu laabe gacanebe laanu para cadi guininu o gúninu xiixa ni guni biidiʼ xlabe. Cadi gácanu casi chupa chonna xpinni Cristu de primé siglu purtiʼ bisiidicaʼ ti cosa ne bíʼnicaʼ sti cosa. Apóstol Pablu bicaa, pur laacabe guníʼ binni mal de Dios (Romanos 2:21-24).

8, 9. Ximodo gucané Jiobá ti hermana ni biʼniʼ stipa pur gusisaca labe o xlabe.

⁸ Laanu ca xpinni Cristu rúninu stipa pur gusisácanu lá Jiobá. Guzéʼtenu ni bizaaca ti hermana de Noruega ni biaana viuda né ti hombrehuiiniʼ stiʼ de chupa iza. Laabe guniʼbe: «Nabé nagana guca ca dxi que para naa. Guiráʼ dxi ne cada ratu runeʼ orar Dios para gudii stipa naa ne gacané naa gucueezaʼ cani runeʼ sentir. Qué ñacalaʼdxeʼ ñuni burla Binidxabaʼ Jiobá pur xiixa cosa ni cadi jneza ñuneʼ. Ne laaca qué ñacalaʼdxeʼ nucheeniáʼ Dios. Ni gucalaʼdxeʼ nga gusisacaʼ xlabe ne guʼyaʼ xiiñeʼ bixhoze ndaaniʼ Paraísu» (Proverbios 27:11).

⁹ Rihuinni dxíchica runi hermana riʼ stipa pur gusisaca lá Jiobá. Yanna, ximodo gucané Jiobá laabe yaʼ. Cumu guluu ca hermanu gana laabe la? gunda bicueezabe cani runi sentirbe ne quixhe íquebe gúnibe ni jneza. Gaayuʼ iza despué bichaganabe ti binnigola de congregación. Yanna maʼ napa xiiñibe 20 iza ne maʼ naca ti Testigu ni maʼ guyuunisa. Hermana riʼ na: «Rudieeʼ xquíxepeʼ xheelaʼ purtiʼ gucané naa bisiniiseʼ xiiñeʼ».

10. Ximodo zusisaca Jiobá lá.

¹⁰ Zusisaca Jiobá xlá ora gunduuxeʼ guiráʼ cani nanalaʼdxiʼ laa ne cani rucaalú laabe casi xaíque stiʼ. Biblia na: «Ne dxandipeʼ zuneʼ juzgar laabe, ne guendahuará ni qué rianda ne rini; ne ti nisaguié ni hundaahua ne granizu, zusabaʼ guí ne azufre luguiabe ne luguiáʼ ca xpínnibe ne luguiáʼ guiráʼ ca guidxi ni chuʼné laabe. Dxandipeʼ zusihuinneʼ guendanandxóʼ stinneʼ ne zusisacaʼ naa ne zunibiáʼ stale guidxi naa; ne napa xidé gánnacabe naa nga Jiobá» (Ezequiel 38:22, 23). De racá, guiráʼ binni zeeda gácacaʼ binni sin donda. Ne guiráʼ cani guibani guibáʼ ne lu Guidxilayú zuni adorarcaʼ Jiobá ne zusisácabe labe o xlabe. Zaca Jiobá «xaíque sti irá ni», o, zuni mandarbe guiráʼ ni nuu guibáʼ ne Guidxilayú (1 Corintios 15:28).