Xi rizíʼdinu de «irá ni naquiiñe ganna binni ne irá ni dxandíʼ»

«Lii nannu xi na ley sti Moisés ni rusiidi irá ni naquiiñe ganna binni ne irá ni dxandíʼ.» (ROM. 2:20)

1. Xiñee nabé risaca guiénenu cani bisiidiʼ Pablu de Ley gucuaa Moisés.

CANI bicaa Pablu lu Biblia racanécani laanu guiénenu pabiáʼ risaca ca cosa ni zeeda lu Ley gucuaa Moisés. Ne ti ejemplu de laani nga carta bicaabe ra nuu ca xpinni Cristu hebreu. Racá ruzeetebe de Jesús ne guniʼbe sicaríʼ: «Zanda guiá [Jesús] laanu, [...] casi runi ti sacerdote gola ni runi xhiiña jneza», ne tobi si tiru «gunda gudixe be» ni bicheʼnu ne pur nga zanda guilanu pa gápanu fe laabe (Heb. 2:17; 9:11, 12). Laaca bisiene Pablu «zeda aca [tabernáculo] casi bandá si sti yuʼdu ni nuu ibáʼ» ne pur Cristu guca ti pactu jma galán que ni biʼniʼ Moisés (Heb. 7:22; 8:1-5). Nabé biquiiñeʼ ca xpinni Cristu ni bibani tiempu stiʼ Pablu guiráʼ ni bisiénebe de Ley gucuaa Moisés. Yanna riʼ, laaca riquiiñenu cani para guiénenu pabiáʼ risaca guiráʼ ni maʼ biʼniʼ Dios para gacané laanu.

2. Xiñee jma gunda biene ca xpinni Cristu ni biniisi lade ca judíu Ley stiʼ Dios.

² Lu carta bicaa Pablu ra nuu ca xpinni Cristu de Roma, bicaabe caadxi diidxaʼ para ca judíu ni biniisicaʼ lu Ley gucuaa Moisés. Cumu maca runibiáʼcabe ley stiʼ Dios la? ngue runi, maʼ nánnacabe «ni naquiiñe ganna binni ne irá ni dxandíʼ» de Jiobá ne xi pur jneza ca ley riguíxhebe. Ca xpinni Cristu ni gule lade ca judíu riénecaʼ ne runi respetarcaʼ guiráʼ ni rusiidiʼ ley que. Ngue runi, zanda gúnicabe casi biʼniʼ ca israelita ni bizuubaʼ diidxaʼ ni bibani ante de laacabe. Zanda gusiidicabe ne gusiénecabe binni de sti guidxi Ley ni bidii Jiobá Israel (biindaʼ Romanos 2:17-20).

NI GUCA CASI BANDÁʼ DE GUENDAGUTI STIʼ JESÚS

3. Ora guiénenu xi pur bidii ca judíu ofrenda Dios, xi zacaneni laanu gúninu.

³ Ca diidxaʼ bizeeteʼ Pablu ora guníʼ: «Ni naquiiñe ganna binni ne irá ni dxandíʼ» zeeda lu Ley gucuaa Moisés, laaca caquiiñenu cani yanna para guiénenu cani naguixhe ique Dios guni. Ni bisiidiʼ Jiobá binni ora bidiibe Ley gucuaa Moisés, laaca risácacani para laanu tiempu riʼ. Yanna guidúʼyanu xi zanda guizíʼdinu de ni biʼniʼ ca israelita ora ruuticaʼ maniʼ para gusigáʼdecaʼ Dios ne ora bidiicaʼ ofrenda laabe. Gucané ca ofrenda que ca judíu para gánnacaʼ tuu nga Cristu ne guiénecaʼ xi cabeza Jiobá gúnicaʼ. Ne laaca zadúʼyanu ximodo zanda gacané ca ley ni gucuaa ca israelita que laanu para guidúʼyanu ximodo cayuni adorarnu Dios, purtiʼ laaca maʼ gudixhe Jiobá xi naquiiñeʼ guni ca xpinni ca dxi riʼ (Mal. 3:6).