Sanu casi binni nuu xpiaaniʼ
1 Ora biʼniʼ invitar Jesús tapa hombre rinaazeʼ benda chinándacaʼ laabe, xi bíʼnicabe yaʼ. Stiidxaʼ Dios na «oraqueca [...] zinanda cabe Jesús» (Mat. 4:18-22). Dxi beeda gaca Saulo de Tarso xpinni Cristu ne bianda lú, qué niníʼ ique pa zacaa o pa coʼ dxiiñaʼ ni bidii Jesús laa; sínuque «qué nindaa de ngue bizulú be byuíʼ be stiidxa Jesús ndaani ca yuʼduʼ» que (Hech. 9:20). Nánnanu qué zanda diʼ cuezadxí tiempu; ora maʼ zeʼ, maʼ qué ziuu dxi zabiguetaʼ. Nga runi, nabé risaca gácanu binni nuu xpiaaniʼ ne iquiiñenu tiempu stinu jneza (Efe. 5:15, 16).
2 Cani málasi rizaaca. Pa qué gúninu xhiiñaʼ Jiobá yanna zándaca despué maʼ qué zanda gúninu ni (Sant. 4:14). Xiñee yaʼ. Primé la? purtiʼ zándaca málasi gueeda gácanu xiixa (Ecl. 9:11). Guiropa, zeʼ dxi guiranu ziyóxhonu. Ne lu guidxilayú riʼ, ora maʼ ziguiniisi binni rapa jma «dxi nagana» ni zucueeza laa guni jma lu xhiiñaʼ Jiobá (Ecl. 12:1). Nga runi, cadi naquiiñeʼ cuézanu stale tiempu para gudiʼnu laanu Dios ne cadi cuézanu chuʼnu galán para gúninu jma lu xhiiñabe (Luc. 9:59-62). Guzéʼtenu de Abrahán, dede ante gátibe ne dxi gútibe guyuube nayecheʼ purtiʼ bisihuínnibe bidiibe laabe Jiobá biaʼ dxi bibánibe ne ngue biʼniʼ laabe ti binni nuu xpiaaniʼ (Gén. 25:8).
3 Maʼ huaxiéʼ tiempu nápanu. Sti razón nápanu para iquiiñenu tiempu stinu jneza nga purtiʼ «ma huaxiéʼ dxi riaadxa laanu» (1 Cor. 7:29-31). Mayaca guinitilú ca binni qué iquiiñeʼ ni nuu lu guidxilayú riʼ ne mayaca guiluxe dxiiñaʼ risaca stiʼ Dios ne guidxélanu jma binni casi dendxuʼ (Apo. 14:15). Nga runi, cadi gudiʼnu lugar cani racaláʼdxinu gápanu o xcaadxi cosa cuánacaʼ tiempu ni naquiiñeʼ iquiiñenu para gucheechenu diidxaʼ (Luc. 21:34, 35). ¡Ziéchenu stálepeʼ ora guietenaláʼdxinuximodo gucanenu lu xhiiñaʼ Jiobá ne stale gana!
4 Guicaanu intiica dxiiñaʼ ni gudiicabe laanu gúninu ndaaniʼ xquidxi Dios ne quixhe íquenu gúninu ni na Jiobá ne stale gana «laga zanda» (Heb. 3:13). Zacá zusihuínninu nácanu binni nuu xpiaaniʼ, purtiʼ guiráʼ tu guni ni na Jiobá «qué ziuu dxi initilú» (1 Juan 2:17).