13. Xi naquiiñeʼ guietenaláʼdxinu ora gudii tuuxa ti conseju laanu para chuʼnu nazaaca.

¹³ Ca dxi riʼ, nin ti xpinni Cristu qué zanda guni milagru para gusianda laanu. Peru nuu tu racalaʼdxiʼ gacané laanu chuʼnu nazaaca ne zándaca pur nga gudiicaʼ conseju laanu, neca qué ninábanu ni laacaʼ. Dxandíʼ, nuu de ca conseju riʼ zanda gacané laanu. Guzéʼtenu ti ejemplu, maca nanna Pablu nabé riuubaʼ ndaaniʼ Timoteo, zándaca purtiʼ huaxiéʼ nayá nisa reʼbe. Ngue runi gudxi Pablu laabe guebe caadxi vinu (biindaʼ 1 Timoteo 5:23).a Peru naquiiñeʼ chuʼnu cuidadu né ca conseju gudiicabe laanu. Zándaca chuʼ ti hermanu ni gacalaʼdxiʼ ucuudxi laanu para iquiiñenu xiixa tratamientu o xiixa remediu natural. O zándaca gábibe laanu chinenu ti dieta ne guiniʼbe gucaneni ti binnilídxibe ni napa ti guendahuará cásica ni nápanu. Peru cadi caníʼ diʼ nga laaca zanda gacaneni laanu. Ti medicina o ti tratamientu ni gacané stale binni la? zanda gueeda guninani xcaadxi binni. Biblia na: «Binni nuu xpiaaniʼ rucaachilú ora guʼyaʼ maʼ zeeda xiixa guendanagana ni zuniná laa; peru cani nahuati la? qué rireecueʼcaʼ ne racanacaʼ» (Proverbios 27:12).