Ñee zeluʼ lu neza ni jma sicarú la?

«DE DIOS nga reeda enda ranaxhii.» Ca diidxaʼ ni bicaa apóstol Juan ca rusihuínnicani gunáʼ nga guenda jma risaca ni napa Dios (1 Juan 4:8). Zanda guidxíñanu Jiobá ne gaca xhamígunu laabe purtiʼ nadxiibe binni. Xiruʼ zanda gúninu pur nadxii Jiobá laanu yaʼ. Stale tu huazeeteʼ: «Ni gannaxhiinu nga zucaa laanu gácanu casi laa», ne nga zanda gácani cosa o binni. Peru laaca zanda gucaa ca binni ni nadxiinu ca laanu gácanu casi laacaʼ. Cumu guyanu casi Dios la? zanda gannaxhiinu cásica nadxiibe (Gén. 1:27). Ngue runi, apóstol Juan bicaa nadxiinu Dios «purti nirudóʼ laabe gunaxhii be laanu» (1 Juan 4:19).

Tapa diidxaʼ ni biquiiñeʼ para guníʼcabe guendarannaxhii

Apóstol Pablu bichaaga guendarannaxhii ca casi «ti neza ni jma rusi sicarú» que guiráʼ xixé ni nuu (1 Cor. 12:31). Xiñee guniʼbe zacá nga guendarannaxhii ca yaʼ. Xi clase guendarannaxhii nga ni guniʼbe yaʼ. Para gánnanu ni la? guidúʼyanu xi riníʼ diidxaʼ guendarannaxhii ca.

Dxiqué biquiiñeʼ ca griegu ca tapa diidxaʼ ora guniʼcaʼ guendarannaxhii: storgué, éros, filía ne agápe. Lade ca diidxaʼ ca la? agápe nga ni biquiiñeʼ para guníʼcabe «de Dios nga reeda enda ranaxhii».a Sicaríʼ guníʼ ti maestru ni láʼ William Barclay de guendarannaxhii ca lu ti libru stiʼ ni láʼ Palabras griegas del Nuevo Testamento: «Xquendabiaaniʼ binni nga rucaa laa gusihuinni agape lu xquendanabani. Qué rusihuinni diʼ binni ni purtiʼ málasi guiale de ndaaniʼ ladxidóʼ guni ni, sínuque rannaxhii binni purtiʼ zinanda xiixa conseju. Rusihuínninu agape ca purtiʼ racaláʼdxinu gúninu ni». Ora gusihuinni binni agápe riníʼ ique ante guni ni, ne rinanda xiixa conseju para guni ni, peru laaca runi ni purtiʼ riree ni de ladxidóʼ. Ne naquiiñeʼ gánnanu cadi guiráʼ diʼ conseju nga jneza. Nga runi, ora gannaxhii ca xpinni Cristu la? naquiiñeʼ chinándacaʼ ca conseju ni rudii Jiobá lu Biblia. Pa guchaaganu ni riníʼ agápe ca ne xcaadxi diidxaʼ ni ruzeeteʼ Biblia para guiníʼ de guendarannaxhii la? jma ziénenu ximodo nga naquiiñeʼ gannaxhiinu.

Ora rusihuinni binni nadxii binnilidxi

Nabé sicarú nga ora nuunu lade ti familia ni nadxiisaa ne nuucaʼ tobi si. Storgué ca nga diidxaʼ griegu ni nabé biquiiñeʼ dxiqué para guiníʼcabe nadxii tuuxa binnilidxi. Laanu, ca xpinni Cristu, rúninu stipa pur gusihuínninu nadxiinu ca binnilídxinu, peru Pablu guníʼ «qué zanaxhii [...] binni» lu ca últimu dxi riʼ (2 Tim. 3:1, 3).

Zacá ni, naquiiñeʼ ñannaxhii binni ca binnilidxi, peru yanna rihuinni dxíchica maʼ qué runi diʼ binni zacá. Yanna, xiñee nuu stale gunaa rutiidiʼ xiiñiʼ yaʼ. Xiñee maʼ huaxiéʼ binni rizaalaʼdxiʼ ca binnilidxi ni maʼ nagola yaʼ. Xiñee nabé stale binni cayaca divorciar yaʼ. Purtiʼ maʼ cadi nadxiisaa diʼ binni.

De ndaaniʼ ladxidoʼno nga riale gannaxhiinu binnilídxinu. Peru naquiiñeʼ gánnanu Biblia cayabi laanu «ladxidóʼ binni nga ni jma riguite laa que intiica si cosa» (Jer. 17:9). Nabé risaca nga gánnanu ora guníʼ Pablu gannaxhii ti xpinni Cristu xheelaʼ biquiiñeʼ diidxaʼ agápe. Ne guniʼbe cásica modo nadxii tuuxa xheelaʼ zacaca nga nadxii Jesús ca xpinni (Efe. 5:28, 29). Pur modo biʼniʼ Jesús ca bisihuinni yenanda cani maʼ gudixhe Jiobá, Dios ni gudixhestí ca familia ca.

Ora dxandíʼ nadxii cani maʼ bichaganáʼ ca binnilídxicaʼ la? zuucaani laacaʼ gúnicaʼ ni jneza ora guchee xiiñicaʼ, ne qué zudiicabe lugar guni xiiñicabe guiráʼ ni racaláʼdxicaʼ purtiʼ si nadxiicabe laacaʼ. Ne zacanécabe xiiñicabe gúnicaʼ xhiiñacaʼ ne zulídxecabe laacaʼ ne diidxaʼ nadóʼ ora caquiiñecaʼ ni (Efe. 6:1-4). Ora dxandíʼ nadxiinu binnilídxinu la? rucaani laanu gápanu bixhózenu ne jñaanu ora maʼ nagólacaʼ.

Modo gannaxhii binni xheelaʼ ne ni na Stiidxaʼ Dios

Modo nadxii binni xheelaʼ zeeda gaca ni casi ti cosa ni bisigaʼdeʼ Dios laacabe (Pro. 5:15-17). Peru ca hombre ni bicaa Biblia dxiqué qué niquiiñedicaʼ diidxaʼ éros ora guniʼcaʼ modo naquiiñeʼ gannaxhii binni xheelaʼ. Xiñee yaʼ. Dxiqué bieeteʼ lu revista La Atalaya xi pur zándaca qué niquiiñecabe diidxaʼ ca: «Yanna riʼ, guiráʼ xixé binni ni nuu lu guidubi naca Guidxilayú ruluíʼ si cayúnicaʼ cásica biʼniʼ ca griegu de dxiqué. Laacaʼ biʼniʼ adorarcaʼ Eros casi ti dios, bizuxíbicabe lu altar stiʼ ne bidiicabe laa ofrenda. [...] Peru ni huahuinni biaʼ dxi huabani binni nga modo biʼniʼ adorar ca griegu que Eros bicaani binni guni cosa dxabaʼ ora gatané stobi ne gúpacaʼ ni casi ti viciu. Zándaca pur nga qué niquiiñeʼ ca hombre bicaa Biblia diidxaʼ ca». Stale binni richaganáʼ purtiʼ riuulaʼdxiʼ si tuuxa, peru para cadi gúninu zacá ora chuuláʼdxinu tuuxa la? naquiiñeʼ gusihuínninu agápe, purtiʼ zacá nga na Stiidxaʼ Dios. Nga runi, naquiiñeʼ guiníʼ íquenu: Ñee dxandíʼ nadxieeʼ xheelaʼ ne cadi riuuladxesiáʼ laabe la?

Ora maʼ ziniisi ca hombrehuiiniʼ ne ca dxaapahuiiniʼ ca pa ñanda maʼ ñuba nichaganacaʼ, óraca nga naquiiñeʼ chinándacabe conseju stiʼ Biblia ra na chúʼcabe nayá (Col. 3:5). Jiobá nga gudixhestí guendaxheelaʼ, ne zacá nga naquiiñeʼ guidúʼyanu ni. Ora bizeeteʼ Jesús de cani maʼ bichaganáʼ la? guniʼbe ca diidxaʼ riʼ: «Ni ma bichaaga Dios la? ma cadi indaa binni guidxilayú» (Mat. 19:6). Nga runi, qué riníʼ íquenu ora si riuuláʼdxinu xheelanu nga zabézanenu laa, purtiʼ para laanu cadi guendariguite diʼ nga guendaxheelaʼ. Pa gápanu xiixa guendanagana la? qué zuyúbicanu guibiá xquendaxheelanu, sínuque zúninu stipa pur gápanu ca guenda ni gacané laanu chuʼ ca binnilídxinu nayecheʼ. Nga nga ni dxandíʼ zacané laanu guibáninu nayecheʼ (Efe. 5:33; Heb. 13:4).

Modo rannaxhii binni xhamigu

¡Nabé triste nga nibani binni pa qué ñapa xhamigu! Sicaríʼ na ti proverbio zeeda lu Biblia: «Nuu ti xhamigu binni ni jma ricanu laa jma que ti biʼchiʼ» (Pro. 18:24). Jiobá racalaʼdxiʼ gápanu xhamígunu ni dxandíʼ gannaxhii laanu. Casi David ne Jonatán la? nabé guca xhamígucaʼ (1 Sam. 18:1). Ne Biblia na gunnaxhii Jesús apóstol Juan (Juan 20:2). Diidxaʼ griegu ni bicaacabe casi «nadxii» o «xhamigu» nga filía. Neca nuu binni ni ridagulisaanenu jma ricánunu laacaʼ la? 2 Pedro 1:7 lu Traducción del Nuevo Mundo na aparte de «ganaxhiisaa[nu] casi guendabiʼchiʼ» (diidxaʼ «lagannaxhii casi guendabiʼchiʼ» ca lu diidxaʼ griegu gucuani filadelfía ti diidxaʼ ni zeeda de fílos [xhamigu] ne adelfós [biʼchiʼ]), laaca naquiiñeʼ gánnaxhiinu laacaʼ de guidubi ladxidoʼno (agápe). Pa qué racaláʼdxinu guixeleʼ ca xhamígunu de laanu la? naquiiñeʼ chinándanu conseju bidii Pedru ca. Galán guidúʼyanu pa nadxiinu ca xhamígunu casi na Stiidxaʼ Dios.

Pa gudiʼnu lugar gacané Stiidxaʼ Dios laanu la? qué zúninu jma pur ca xhamígunu, ne qué zudiʼnu lugar gúnicabe ni cadi jneza purtiʼ si xhamígunu laacabe ne qué zaninanu xcaadxi. Qué zudxíʼbanu tuuxa para si gaca xhamígunu laa. Ne ni jma risaca nga guiduʼyaʼ chaahuinu tuu nga cani gaca xhamígunu ne guixélenu de cani zanda gucaa laanu gúninu «ni nadxaba» (1 Cor. 15:33).

Riuu binni tobi si ora nadxiisaa

Dxandíʼ, riuu binni tobi si ora nadxiisaa. Sicaríʼ bicaa apóstol Pablu: «Laganaxhii saa [agápe] de idubi ladxidóʼ to [...]. Laganaxhii saa casi enda biʼchiʼ» (Rom. 12:9, 10). Zacá ni, laanu, ca xpinni Cristu, nadxiisaanu de guidubi ladxidoʼno. Rusihuínninu nadxiisaanu cadi purtiʼ si nayecheʼ nuu ladxidoʼno, sínuque purtiʼ nadxiinu laacabe cásipeʼ na ca conseju stiʼ Biblia. Peru lu diidxaʼ griegu laaca guníʼ Pablu lu versículo ca filadelfía ni bitiixhicabe casi «laganaxhii saa casi enda biʼchiʼ» ne filóstorgos ti diidxaʼ ni zeeda de fílos ne storgué ni bitiixhicabe casi «laganaxhii saa». Ti hombre ni ruundaʼ de ca diidxaʼ ca na guendarannaxhiisaa casi guendabiʼchiʼ ca nga «[tuuxa ni] nachaʼhuiʼ, riá ne racané» sti binni. Ora rannaxhiinu zacá ne rusihuínninu agápe la? jma riuʼnu tobi si ne ca xpinni Jiobá (1 Tes. 4:9, 10). Yanna filóstorgos («laganaxhii saa») ca, ti biaje si zeeda ni lu diidxaʼ ra gucuá Biblia ca primé ne laani nga modo rihuinni nadxiisaa ti familia.

Ni racané chuʼ cani dxandíʼ xpinni Cristu tobi si nga purtiʼ nadxiicaʼ casi ti familia, casi nadxiicaʼ xhamígucaʼ ne purtiʼ nadxiicaʼ modo na ca conseju stiʼ Biblia. Ca xpinni Cristu qué ridagulisaacaʼ para si guyúbicaʼ tu gaca xhamígucaʼ, sínuque rúnicaʼ ni para guni adorarcaʼ Jiobá casi ti familia ni nuu tobi si. Laanu rábinu xcaadxi xpinni Cristu bíʼchinu ne bizáʼnanu, ne jneza ni purtiʼ ridúʼyanu laacabe casi binnilídxinu. Ne laaca xhamígunu laacabe ne rúninu stipa pur chúʼnenu laacabe galán casi na ca conseju stiʼ Biblia. Nga runi, gúninu stipa pur gannaxhiinu ca binni ridagulisaa jma ne chúʼnenu laacaʼ tobi si, casi naquiiñeʼ guni ca xpinni Cristu (Juan 13:35).

[Cani cá ñee yaza]

[Ni caníʼ yaza 12]

Xi rúniluʼ para gannaxhiisaa ca binni ridagulisaa jma