Riuu binni xizaa pur bueltu

Paul, ti hombre maʼ bichaganáʼ ne napa chupa xiiñiʼ, guníʼ xi guca dxi gudxiʼbaʼ lu guiráʼ cosa xquidxi ne bixiéʼ guendaró. Laabe guniʼbe: «Stale biaje ricadu lu fila xadxí para sidu, peru ora gaca caber laadu maʼ gastiʼ nuu. Bilaseʼ binni purtiʼ gastiʼ ni gocaʼ dede rudii gueelacahui laacaʼ. Nabé nagueenda gudxiʼbaʼ lu ca cosa jma riquiiñeʼ binni, bisaca cani millón, despué maʼ mil de millón dede ra maʼ qué nisaca xpuéltudu. Biniteʼ guiráʼ bueltu napaʼ ra bancu, guiráʼ ni gupa chaahueʼ para seguru stinneʼ ne pensión stinneʼ».

Gunna Paul para ganda guilá familia stiʼ naquiiñeʼ guni xiixa (Proverbios 3:21). Laabe guniʼbe: «Biindaʼ de electricista. Peru biaʼ modo nuaaʼ que intiica dxiiñaʼ guiree zuneʼ, neca huaxiéʼ quíxecabe naa. Nuu binni gudixe naa né guendaró o né cosa iquiiñedu ra yoo. Casi pa gudiicabe naa tapa xabú riaananiáʼ chupa ne rutuaaʼ xhupa. Chaahuidugá gupaʼ 40 berehuiiniʼ ne bisiniiseʼ laacame. Ora biroobacame bituaaʼ laacame ne guziéʼ 300. Despué bichaaʼ 50 bere pur chupa sacu harina de 50 kilu cada tobi. Gucané chupa sacu que naa para gunda bidieeʼ ni gó familia stinneʼ xadxíhuiinniʼ dede né xhupa xhonna familia».

Laaca nanna Paul ni jma jneza guni binni nga guni cré zacané Dios laa. Ora ruzuubaʼ tuuxa stiidxaʼ Dios la? racanebe laa. Jesús guníʼ cadi naquiiñepeʼ chuʼnu xizaa ora guyúbinu ni guibaninenu. Laabe guniʼbe: «Nanna Bixhoze tu ni nuu ibáʼ xi irá caquiiñe tu» (Lucas 12:29-31).

Triste guininu ni, peru Binidxabaʼ, xhenemigu Dios, huacaa binni guiníʼ ique ni jma risaca nga gapa bidxichi. Stale tu qué ridxela xi guni para ganda gudii ni iquiiñeʼ binnilidxi, dede qué rasi para gudii laacabe xiixa ni cadi caquiiñecabe. Stale binni rizíʼ ni cadi caquiiñeʼ ne despué maʼ qué ganda quixe ne pur nga reeda gaca «esclavu stiʼ binni ni rutiiñeʼ laa» (Proverbios 22:7).

Nuu tu laa cadi jneza cani riguixhe ique guni. Sicaríʼ guníʼ Paul: «Stale de cani runebiaʼyaʼ bisaanacaʼ familia sticaʼ ne ca xhamígucaʼ ne zecaʼ sti guidxi ziyúbicaʼ dxiiñaʼ para guibánicaʼ jma galán. Cumu nuu de laacabe qué gapa permisu para cueza raqué la? qué nidxélacaʼ dxiiñaʼ. Nuu biaje rucachilúcabe de puliciá o rásicabe lu calle. Qué nudiicabe lugar ñacané Dios laacabe. Peru naa ne familia stinneʼ gudixhe íquedu gudxíʼludu guendanagana que juntu ne bidiʼdu lugar gacané Dios laadu».

CONSEJU BIDII JESÚS

Paul guníʼ: «Jesús guníʼ: “Cadi chuʼ tu xizaa de ni chi gaca ixíʼ, purti ixí ru nga guʼya tu xi gacaʼ. Lagucaa ique si de ni naquiiñe tu yanadxí”. Ngue runi guiráʼ dxi rinabaʼ Dios gudii laadu ni tiidinedu dxi. Ne cásipeʼ guníʼ Jesús, gucané Dios laadu. Dxandíʼ, cadi guiráʼ biaje randa rápadu cani riuuláʼdxidu. Ti dxi gucuayaʼ fila ra ti tienda sin gannaʼ xi cadoo raqué. Ora yendayaʼ ra runi tendércabe binni, biiyaʼ yogur huaʼ cadoo raqué. Qué lica ndaʼ riuuladxeʼ yogur. Peru ró binni ni, laani gúcani guendaroxhi stidu gueelaʼ que. Guizáʼ rudieeʼ xquíxepeʼ Dios qué ñuu dxi nigasi familia stinneʼ candaana biaʼ tiempu que.a

»Yanna jma maʼ nápadu ni guibaninedu. Pur ni bizaacadu riʼ bizíʼdidu para cadi chuʼ xhaatapedu xizaa la? caquiiñeʼ guni credu zanda gacané Jiobá laadu.b Pa gúninu ni nabe qué zusaana de gacanebe laanu. Maʼ bidúʼyadu dxandíʼ ca diidxaʼ ni zeeda lu Salmo 34:8 ra na: “Lagudii cuenta ne laguuyaʼ pabiáʼ nachaʼhuiʼ Jiobá; nayecheʼ nga riuu hombre ni guyubi laabe”. Yanna la? maʼ qué riúʼpedu xizaa pa tiididu sti guendanagana casi gudídidu que.

»Cadi dxiiñaʼ ne bueltu nga caquiiñeʼ binni para ganda guibani, sínuque guendaró. Nga runi, cabézadu ganda dxi gaca ca diidxaʼ riʼ: “Ziuu stale biidxiʼ lu guidxilayú”. Laga cabézadu gaca ni la? ziuʼdu nayecheʼ purtiʼ nápadu ni guidoʼdo ne ni gácudu. Biblia laaca cuzeeteʼ: “Cadi ibani tu para gapa si tu bidxichi, sínuque laguieche né biaʼ tiica napa tu, purti na Dios rabi laanu: «Qué zusaana laatu ne qué ziaana dxie de acaniá laatu»”.c Nabé riguu ca diidxaʼ riʼ gana laadu».

Riquiiñeʼ gapa binni fe para gudii lugar gabi Dios laa xi guni, casi biʼniʼ Paul ne binnilidxi (Génesis 6:9). Pa nuu xhaatapenu xizaa nagasi pur riaadxaʼ bueltu laanu o pa guidxaagalunu ni despué la? zanda chinándanu ejemplu stiʼ Paul ne modo bidxaagalube guendanagana stibe.

Peru xi guninu pa ca guendanagana rápanu ndaaniʼ familia stinu nga ni riguu xizaa laanu yaʼ.