Gatananu
1 Nabé triste uyuu binni ora biʼyaʼ lu tele modo bilá mil de binni lu xu ni uca nacubigá ca ne xu ni uca ndaaniʼ nisadóʼ ni bininá Asia. Xi cayabi ca ndiʼ laanu yaʼ. Tobi la? qué huayuudxí aca cani dede dxi nabani binni lu Guidxilayú riʼ. Stobi la? naquiiñeʼ gatananu para gúʼyanu seña ni usihuinni mayaca gueeda Jesús ne dxi iluxe guidxilayú stiʼ Binidxabaʼ. Ne Cristu maca uníʼ: «Lachuu listu» ne «lagataná», ca diidxaʼ ca zacané cani laanu cadi usiaandanu mayaca initilú iráʼ ca cosa malu ni cayaca yanna riʼ (Mar. 13:32-37; Mat. 24:42-44).
2 Jesús udixhe ejemplu ni chinándanu ti cadi guiaandaʼ laanu mayaca initilú iráʼ cosa malu riʼ, purtiʼ laabe nabé ucuá íquebe gúnibe ni na Dios ne ilúxebe xhiiñaʼ (Juan 4:34). Ngaca nga ni naquiiñeʼ icá íquenu gúninu. Cumu qué gánnanu padxí ne pora nga málasi gueeda dxi nagana ca la? jma nga naquiiñeʼ cadi usaana de ucheechenu diidxaʼ ne usíʼdinu ni dxandíʼ ca. Naquiiñeʼ guʼyaʼ chaahuinu unáʼ nga ni jma risaca para laanu. Cadi yanna diʼ nga iníʼ íquenu casi hombre ni qué ñaca ricu nezalú Dios ni uníʼ: «Yanna huaxa ma chi iziiladxeʼ ne ma chi guiecheʼ, purti ma napa stale ni gahua ne ni gueeʼ» (Luc. 12:16-21). Nga runi, lugar de uyúbinu modo ibáninu jma galán la? gúnirunu stipa pur gúninu ni na Jiobá (Col. 3:23, 24).
3 Ni zacané laanu chuʼnu listu nga quixhe íquenu xi gúninu ti cadi gásinu, ne gúninu jma lu xhiiñaʼ Dios. Ra biluxe iza dxiiñaʼ 2004 bidale cani rucheeche diidxaʼ: 585.865. Padxí zanda ugaanda ácanu 600.000 yaʼ. Ne ndaayaʼ stiʼ Jiobá zugaandanu ni, peru naquiiñeʼ quixhe íquenu gúninu tapa cosa iza dxiiñaʼ riʼ, idúʼyanu xi laaca ni.
4 Acanenu binni chinanda Cristu (Mateo 28:19, 20). Stale tu zanda aca ni rucheeche diidxaʼ, purtiʼ biaʼ 700.000 ra rigúʼndanenu binni Biblia. Peru caquiiñeʼ uchíñanu laacabe ndaaniʼ xquidxi Jiobá, ra iquiiñenu iráʼ cani nápanu ni rusiidiʼ de Biblia, casi videu, folletu, ne xcaadxi de laacani, ti cadi indaa para ácacabe tobi ni rucheeche stiidxaʼ Reinu.
5 Chuunu ca endaridagulisaa ca. Ca endaridagulisaa ca zeeda aca cani casi ti cosa ni cusigaʼdeʼ Jiobá laanu para icaanu stipa ti chuʼnu galán ne laabe, purtiʼ racá zanda uguusaanu gana laanu pur ni cazíʼdinu ne purtiʼ cadxaaganu xcaadxi (Heb. 10:25). Ora rindá ca guiʼchiʼ ra cá panda uyuu lu ca endaridagulisaa ca Betel la? rihuinni de que lade caadxi neza binni ridagulisaa maʼ huaxiéʼ tu rié ora ruchaagacabe ni ne ra cá panda ni rucheeche diidxaʼ nuu. Nga rucaa laanu iníʼ íquenu. Cadi guiaandaʼ laanu, ca endaridagulisaa ca racané cani laanu ti chuʼnu galán ne Jiobá para cadi guiábanu pur cani culaa Binidxabaʼ luguianu.
6 Izaláʼdxinu cani nahuiiniʼ ca. Ximodo zanda ugaandanu guionna ni naguíxhenu gúninu riʼ yaʼ. Nuu chupa modo uluinu rizaláʼdxinu cani nahuiiniʼ ca: ralídxinu ne ra ridagulisaanu. Ndaaniʼ yoo la? bixhózecabe ne jñaacabe nga napa xidé guʼyaʼ laacabe (Efe. 6:4; Pro. 22:6). Dxiiñaʼ stiʼ bixhózecabe ne jñaacabe nga guʼyaʼ dede pabiáʼ nga zanda chécabe scuela, peru cadi para laacaʼ, sínuque para gúnicabe xhiiñaʼ Jiobá jma jneza. Lade ca binni ridagulisaa, ca binnigola ca zanda acanecaʼ stale, ra ucaadiágacaʼ laacabe, usiénecaʼ ne iquiiñecaʼ cada tobi de laacabe para gúnicabe biaʼ ganda ndaaniʼ xquidxi Jiobá ne biaʼ maʼ biniisicabe lu Stiidxabe (1 Tim. 4:15).
7 Izaláʼdxinu cani cayuni xhiiñaʼ Jiobá idubi dxi. Stale biaje huazeetecabe lunu izaláʼdxinu ca precursor regular, ne pur nga stale de laacabe nayécheruʼ nuucabe lu dxiiñaʼ ca. Yanna, ximodo zanda uluinu rizaláʼdxinu cani bisaana dxiiñaʼ stiʼ ne zándaca qué nacaʼ gápacaʼ xiiñicaʼ pur gúnicaʼ jma lu xhiiñaʼ Dios casi, ácacaʼ binnigola ni riganna ca binni ridagulisaa, misioneru, chécabe lade grupu ni rucuí Yoo stiʼ Reinu o chúʼcabe Betel. Gábinu laacabe diidxaʼ ni uguu gana laacabe, zanda idxíñanu laacabe, o useendanu ti guiʼchiʼ huiiniʼ ra nuucabe, guni invitarnu laacabe ra lídxinu, udiʼnu laacabe ti endaró huiiniʼ o gápanu laacabe de biuuzaʼ, ne laaca zanda inabadiidxanu laacabe ximodo nuucabe (Hech. 13:15b). Ne zanda ininu ridxagayaanu laacabe pur runi huantárcabe ne pur bisaanacabe stale cosa, ne uguʼnu gana laacabe gúnirucabe xhiiñaʼ Jiobá. Ne stale biaje, huayuu tuuxa binni o ti neza binni ridagulisaa ni huayacané para gápacaʼ tuuxa binni lídxicabe ni huará o maʼ nagola, ¡galán nga gúninu zacá! Ora uluinu rizaláʼdxinu laacabe zacá la? racanenu laacabe stale.
8 Nabézanu ti tiempu ni nabé rusiecheʼ laanu stale, ne neca cadxagalunu endanagana la? Jiobá caguu ndaayaʼ dxiiñaʼ ni cayúninu de ucheechenu diidxaʼ. Peru nuu stale ni gúninu lu dxiiñaʼ riʼ ra acanenu binni aca xpinni Cristu, ne riquiiñeʼ cadi gásinu ne gúninu jma lu xhiiñaʼ Dios (1 Cor. 15:58). Cadi guiaandaʼ laanu mayaca initilú iráʼ ca cosa malu ca, purtiʼ nga zacané laanu cadi gásinu ne jma zúninu xhiiñaʼ Jiobá. Zacá zanda acanenu ca bíchinu ne ca bizánanu ni cayaandaʼ laacaʼ de que mayaca initilú iráʼ ca cosa malu ca para chúʼcabe galán ne Jiobá ne usisácabe labe.