Ñee zanda guni xiiñiluʼ xiixa casi ti binni huaniisi la?
1. Xi huayuni caadxi testigu stiʼ Jiobá ni nahuiiniruʼ ora inábacabe laacaʼ icacaʼ rini yaʼ. Bizeeteʼ xiixa ni bizaaca.
1 Iníʼ ique chaahuinu casi ti binni huaniisi, pora yaʼ. Ora inabadiidxacabe laanu pa zacanu rini. Casi bisiene La Atalaya 15 stiʼ junio 1991 ra na «Guzá casi rusiidiʼ Jiobá», caadxi xiiñiʼ ca testigu stiʼ Jiobá huazuhuaa dxiichicaʼ lu ni runi crecaʼ ne rusihuínnicaʼ rúnicaʼ casi runi ti binni huaniisi, rinándacaʼ ni na ley stiʼ Dios ni caníʼ de rini, cásica runi bixhózecaʼ. Ñee zanda guni xiiñiluʼ zacaca neca caʼruʼ usaa 18 iza la?
2. Xi ley udixhe caadxi juez ora ti dxaapahuiiniʼ qué niná nicá rini, ne xi zanda iziidiʼ cani napa xiiñiʼ ne ca nahuiiniʼ ca de ni bizaaca riʼ yaʼ.
2 Xi riníʼ ley. Ndaaniʼ guidxi Illinois, stiʼ Estados Unidos, nuu caadxi juez ni Jma Risaca Stiidxaʼ, ne laacabe nga uníʼcabe zanda iníʼ ti ni nahuiiniʼ pa zacá rini o coʼ. Ra bíʼyacabe ni bizaaca ti bizáʼnanu napa 17 iza la? ca Juez que uníʼcabe: «Pa nuu ni usihuinni maʼ riníʼ ique dxaapahuiiniʼ riʼ casi ti binni huaniisi ne maʼ nánnabe xi izaacabe pa gúnibe xiixa la? [...] laadu rudiʼdu lugar laabe iniʼbe pa zacaabe xiixa remediu o coʼ, casi rusiene ley zanda guni ti ni nahuiiniʼ». Nga runi, zándaca ca doctor o cani runi dxiiñaʼ para gobiernu iniʼnécabe baʼduʼ ni huará riʼ para gánnacabe pa maʼ riníʼ íquebe casi ti binni huaniisi ne gunadiágacabe xiñee qué nabe icabe rini. Ni nahuiiniʼ ca cadi nápasibe xidé guiénebe pabiáʼ nagana nga modo nuube ne xi zácabe pa iniʼbe xi medicina icaabe, sínuque laaca naquiiñeʼ gánnabe usiene chaahuibe binni cani runi crebe de ni riníʼ Stiidxaʼ Dios de rini.
3. Xi ca endarinabadiidxaʼ ndiʼ naquiiñeʼ iníʼ ique chaahuiʼ ca ni napa xiiñiʼ, ne xiñee.
3 Xi iníʼ xiiñiluʼ yaʼ. Ñee zanda usiene ca xiiñiluʼ xiñee qué ricacaʼ rini la? Runi crécabe de idubi ladxidóʼcabe Dios nga na ucueezanu laanu de idoʼnoʼ ne icanu rini la? (Hech. 15:29; 21:25.) Ñee zanda usienécabe ne Biblia cani runi crécabe la? Zacábicabe ne endanadxibalú xiñee qué ricácabe rini neca gabi doctor laacabe zaca jma nagana para guiándacabe pa qué icácabe ni neca qué guinni bixhózecabe la? Cumu «tiempu ne ni málasi rizaaca rugaandani iranu», xi zanda guni cani napa xiiñiʼ ti acanecaʼ laacabe gánnacabe xi gúnicabe ora idxaagalúcabe xiixa endanagana ni usihuinni pa qué zusaanacabe Dios yaʼ. (Ecl. 9:11; Efe. 6:4).
4, 5. 1) Xii nga naquiiñeʼ guni cani napa xiiñiʼ, ne ximodo zanda gúnicabe ni. 2) Xi zacané laacabe para gúnicabe ni.
4 Ni zanda guni cani napa xiiñiʼ. Nápatu xidé usiiditu xiiñitu ximodo ruuyaʼ Dios rini (2 Tim. 3:14, 15). Lu libru Razonamiento yaza 345 dede 348, rusiene de laani. Biindaʼ chaahuiné ni binnilídxiluʼ. Zanda iquiiñeluʼ ra na «Pa tuuxa iníʼ...» ni zeeda lu yaza 348 dede 350, biindaneni ca xiiñiluʼ ne biʼniné ni laacabe chupa chonna biaje para gánnacabe ximodo usiénecabe ni runi crécabe ne iníʼcabe xiñee qué ricácabe rini (1 Pedro. 3:15). Xcaadxi ni racané laanu idxagalunu endanagana riʼ nga folletu ¿Cómo puede salvarle la vida la sangre? ne La Atalaya 15 stiʼ junio 2004, yaza 14 dede 24. Ne nuu xcaadxi ni zanda acané laanu casi ca videu Asistencia médica sin transfusiones. Necesidades y derechos del paciente ne La negativa a la sangre. La medicina acepta el reto —ni laacaʼ maʼ nuu lu DVD Alternativas a las transfusiones. Serie documental— laaca rusiene cani laanu pabiáʼ jneza iquiiñecabe remediu ne guni operárcabe sin rini. Ñee maʼ huayuuyaneluʼ binnilídxiluʼ ca videu riʼ la?
5 Lagacané ca xiiñitu gánnacaʼ xii nga ni racalaʼdxiʼ ne ni riuulaʼdxiʼ Dios gúnicaʼ de ni caníʼ stiidxabe de rini. Zacá, ora izaacabe xiixa la? zánnacabe xi gúnicabe casi ti binni huaniisi ne zusiéchecabe ladxidóʼ Jiobá (Rom. 12:2).