Gacanenu ra cabí Yoo stiʼ Reinu
1 Lu dxiiñaʼ guca iza 2007 gurí 357 Yoo stiʼ Reinu ndaaniʼ guidxi Méjicu, ¡biaʼ 7 Yoo stiʼ Reinu gurí lu ti semana! Rihuinni dxichi ca, caguu ndaayaʼ Jiobá dxiiñaʼ cayuni ca xpinni ra cucuicaʼ jma Yoo stiʼ Reinu (Sal. 127:1).
2 Yanna riʼ nuu 32 Grupu ni Rucuí Yoo stiʼ Reinu ndaaniʼ guidxi Méjicu, lu ca grupu riʼ nuu 262 Siervu ne 167 voluntariu. Ca xpinni Cristu riʼ huayuuyacaʼ ndaayaʼ stiʼ Dios purtiʼ rúnicaʼ stale stipa para gacanecaʼ xcaadxi bíʼchicaʼ ne bizáʼnacaʼ. Nécaxa qué ridagulisaacabe ndaaniʼ Yoo stiʼ Reinu ni nacubi gurí ca la? riéchecabe nga gacanécabe para cuí ca yoo sicarú riʼ para cadi guchiiñaʼ gastiʼ ca bíʼchicabe ne bizáʼnacabe ora maʼ guidagulisaacaʼ.
3 Tobi de ca ndaayaʼ ni ricaa cani nuu lade ca grupu ni rucuí Yoo stiʼ Reinu nga riziidicabe de Jiobá (Isa. 54:13). Guiráʼ siadóʼ ante guzulú gúnicabe dxiiñaʼ primeru runi adorárcabe Jiobá. Ne rúnicabe ni ora gúʼndacabe textu ni biaba dxi ca ne guiníʼcabe ni biénecabe de laani, cásica runi ca xpinni Cristu ni nuu Betel. Laaca ruundacabe revista Torre stiʼ ni rapa ca lune huaxhinni. Tobi de ca cosa ni racané laacabe chúʼcabe nayecheʼ nga, qué rucaa diʼ cani runinécabe dxiiñaʼ ca laacabe gúnicabe ni cadi jneza, sínuque racanecaʼ guiniisicabe jma lu stiidxaʼ Dios. Nga runi, riéchecabe gúnicabe dxiiñaʼ ne ca xpinni Cristu ni nuu lade ca binni ridagulisaa, ne dede raca xhamígucaʼ laacabe (Sal. 133:1). Ti bizáʼnanu ni runi dxiiñaʼ ne xheelaʼ lade ti grupu, guníʼ sicaríʼ: «¡Nabé nayecheʼ riuʼdu purtiʼ racabiaʼdu stale xpinni Cristu ni rusihuínnicaʼ nadxiicaʼ laadu ne rudiicaʼ xquíxepeʼ laadu ora gúʼyacaʼ maʼ biluxe Yoo stiʼ Reinu sticaʼ!».
4 Tu guiráʼ ndiʼ zanda gacané lu dxiiñaʼ ra ribeendú binni stale cosa galán riʼ yaʼ. Tutiica de cani rucheeche diidxaʼ ni maʼ guyuunisa ni napa 19 dede 55 iza, ni nazaaca, runibiáʼ ca binni ridagulisaa laa purtiʼ runi ni jneza ne zanda gacané biaʼ chupa si semana o dede xhoopaʼ beeu. Cani qué ganna ximodo raca dxiiñaʼ riʼ peru racaláʼdxicaʼ gacanecaʼ cásica Isaías la? zanda guiziidicabe nagueendaca lade grupu riʼ purtiʼ laacaʼ racaláʼdxicaʼ gusiidicaʼ ni nánnacaʼ (Isa. 6:8; Hech. 20:35). Casi ti bíʼchinu ni huayuni dxiiñaʼ lade ti grupu jma de gadxe iza, ne yanna guizáʼ maʼ nanna guni dxiiñaʼ, nécaxa ante chuʼbe lu grupu riʼ qué gánnapebe biaʼ nánnabe yanna, guníʼ sicaríʼ: «Ra bininedu ca bíʼchidu ni jma nanna modo ribí ti yoo la? gunda bizíʼdidu stale modo raca ti dxiiñaʼ si ne bizíʼdidu gúnidu cani jma jneza».
5 Cumu zeʼ dxi jma maʼ zidale cani rucheeche diidxaʼ la? nga runi caquiiñeʼ cuí jma Yoo stiʼ Reinu. Ñee zanda chigacaneluʼ ra cabí jma yoo para gaca adorar Dios la? Ca binnigola ni riganna ca binni ridagulisaa ca nápacaʼ stale guiʼchiʼ para guchá cani racalaʼdxiʼ chigacané. Cayábidu lii guni orarluʼ Jiobá ne gúʼyaluʼ pa zanda chigacaneluʼ lu dxiiñaʼ sicarú riʼ. Nanna dxíchidu zacaaluʼ ca ndaayaʼ ni rudii Jiobá ca binni ni rudii de tiempu stiʼ ne de ni nanna para gaca dxiiñaʼ riʼ (Mal. 3:10).