6 ndaa

Xii nga Reinu stiʼ Dios

Paraa nuu Reinu stiʼ Dios (1) Tuu nga Rey stini (2)

Ñee nuuruʼ binni guni mandarné Rey riʼ la? Pa zacani, pándacabe yaʼ (3)

Xi culuíʼ laanu de que nabáninu lu ca últimu dxi riʼ (4)

Xi zuni Reinu stiʼ Dios xcaadxi si pur binni guidxilayú (5-7)

1. Dxi biuu Jesús lú Guidxilayú riʼ la? bisiidibe ca ni guzánebe guinábacaʼ gueeda Reinu stiʼ Dios ora laacaʼ guni orarcaʼ. Ti reinu nga ti gobiernu ni napa ti rey casi xaíque. Peru Reinu stiʼ Dios gadxépeni de xcaadxi ni nuu. Purtiʼ laani nuuni guibáʼ ne de racá zuni mandarni lu guidubi naca Guidxilayú riʼ. Ne laaca zusisácani lá Jiobá ne zúnini ni na Dios cásica cayácani guibáʼ, zaqueca gaca ni ndaaniʼ Guidxilayú (Mateo 6:9, 10, NM).

2. Dios bizabiruaa de que Jesús zeeda gaca Rey stiʼ Reinu Stibe (Lucas 1:30-33). Dxi beeda Jesús lu Guidxilayú riʼ la? bisihuínnibe de que zácabe ti Xaíque nachaʼhuiʼ, runi ni jneza, ne qué ruchee. Dxi laabe bibiguétabe guibáʼ la? qué ñácadibe oraqueca Rey stiʼ Reinu stiʼ Dios (Hebreos 10:12, 13). Iza 1914 nga bidii Jiobá laabe guni mandarbe casi modo bizabiruaa. Dede dxiqué la? Jesús bizulú cayuni mandar guibáʼ casi ti Rey ni bibí (Daniel 7:13, 14).

3. Jiobá laaca gulí stuudxi hombre ne gunaa lu Guidxilayú riʼ ni qué nucheené laabe para cheecaʼ guibáʼ. Ca binni riʼ la? zuni mandarnécabe Jesús casi rey, juez, ne ni ruzaaquiʼ guʼxhuʼ (Lucas 22:28-30; Apocalipsis 5:9, 10). Jesús gulee lá ca binni ni chiguni mandarné laa grupu de «dendxu huiini» ne 144.000 nga laacabe (Lucas 12:32; Apocalipsis 14:1-3).

4. Cásipeʼ guca Jesús Rey la? guládxibe Binidxabaʼ ne ca ángel ni qué iquiiñeʼ stiʼ de guibáʼ, ne bisábabe laacaʼ ndaaniʼ Guidxilayú riʼ. Pur nga runi cani cayaca lu Guidxilayú riʼ la? ze dxi jma nagana ni dede 1914 (Apocalipsis 12:9, 12). Guendaridinde stiʼ guidxi, guendarindaana, guendahuará naxoo, ne zadale guendarucheené ley..., guiráʼ ndiʼ la? nácacani ndaa de ti «seña» ni culuíʼ laanu de que Jesús maʼ cayuni mandar ne maʼ nabáninu lu ca últimu dxi stiʼ ca binni qué iquiiñeʼ (Mateo 24:3, 7, 8, 12; Lucas 21:10, 11; 2 Timoteo 3:1-5).

5. Xcaadxi si la? Jesús zuni juzgarbe binni ne zuxhélebe ca dendxuʼ ca de ca chiva ca, casi tobi ni rapa dendxuʼ. Laabe zuuyabe casi «dendxuʼ» cani gusihuinni qué susaana laabe, ne zudiibe laacaʼ guendanabani ni qué ziuu dxi guiluxe lu Guidxilayú riʼ. Cani cucaanáʼ Reinu stiʼ Dios la? zeeda gácacaʼ casi «chiva» (Mateo 25:31-34, 46). Xcaadxi huiiniʼ si la? Jesús zunidebe ca binni ni nácacaʼ casi chiva (2 Tesalonicenses 1:6-9). Pa lii napuʼ gana gacuʼ tobi de ca «dendxuʼ» stiʼ Jesús la? napuʼ xidé gucaadiágaluʼ diidxaʼ riuu neza stiʼ Reinu ne guʼnuʼ guiráʼ ni maʼ ziguiziidiluʼ (Mateo 24:14).

6. Stale guidxi roʼ nga nuu lu Guidxilayú riʼ, ne cada tobi de laaca ni la? nápacani gobiernu stípecani. Gatigá ca guidxi roʼ ca ridxelasaacaʼ. Peru Reinu stiʼ Dios ziuu lugar stiʼ guiráʼ xixé ca gobiernu ni nuu, ne tobi lucha si gobiernu ca ziuu lu guidubi naca Guidxilayú (Daniel 2:44). Óraque la? maʼ qué ziuuruʼ jma guendaridinde stiʼ guidxi, ne maʼ qué ziuuruʼ tu laa guniná stobi. Guiráʼ xixé binni zabánicaʼ tobi si ne guendariuudxi (Miqueas 4:3, 4).

7. Lu Guendaruni Mandar stiʼ Jesús pur ti Mil Iza, guiráʼ binni ni qué guchee zeeda gácacaʼ binni sin donda, ne guidubi naca Guidxilayú riʼ zácani ti paraísu. Ra guiluxe ti mil iza ca la? Jesús zaluxe guiráʼ ni gudxi Dios laa guni. Óraque zudxiguétabe Reinu ca lu ná Bixhózebe (1 Corintios 15:24). Xiñee qué gusiéneluʼ ca xhamíguluʼ ne ca binnilídxiluʼ ni chiguni Reinu stiʼ Dios yaʼ.

[Dibuju/foto ni zeeda lu yaza 13]

Lu guendaruni mandar stiʼ Jesús la? maʼ qué ziuu guendaraca nanalaʼdxiʼ nin guendariníʼ ique mal de stobi